Forgiveness blo Jehovah—Hao Nao Iu Savve Followim Example blo Hem?

1-2. (a) Wat nao samfala situation wea iumi maet faendem hem hard for forgivim samwan? (b) Hao nao Denise showim forgiveness?

HAO, iu faendem hem hard for forgivim narawan? Staka lo iumi maet feel olsem, especially taem samwan talem or duim samting wea mekem iumi barava feel nogud. Bat, iumi savve duim samting for deal witim feeling blo iumi and forgivim narawan. For example, tingim experience blo sista wea nem blo hem Denise.a Hem forgive lo wei wea pipol no expectim. Lo 2017, Denise and famili blo hem visitim World Hedquarter blo Olketa Jehovah’s Witness, wea just open lo datfala taem. Taem olketa travel bak hom, wanfala draeva lus kontrol lo car blo hem and bangam vehicle blo olketa. Datfala accident mekem Denise for unconscious. Taem hem wekap, hem faendaot dat olketa pikinini blo hem garekil nogud and hasband blo hem, Brian hem dae. Denise sei: “Lo datfala taem, mi barava sorre tumas and konfius.” Taem hem faendaot samting wea kosim datfala accident, hem no bikos draeva hem drunk, iusim drugs, or eniting distractim hem, Denise prea lo Jehovah for givim hem peace.

² Bikos hasband blo Denise hem dae, olketa chargem datfala draeva witim manslaughter. If judge sei hem guilty, bae hem mas prison. Bat kot talem Denise hao disison for sentencem datfala man bae depend lo testimony blo hem. Denise sei: “From bae mi storyim bak datfala worst moment lo laef blo mi, mi feel olsem samwan katem open olketa stitch blo mi and pourim wan big hip solt insaed.” Tu-thri week bihaen, Denise sidaon lo kotrum and feisim man wea kosim bigfala pain and sorre for famili blo hem. Wat nao Denise duim? Hem askem judge for showim mercy lo datfala man.b Taem hem finis for story, judge hem krae nao. Hem sei: “Lo 25 years wea mi judge, no enitaem mi herem eniwan tok olsem lo kotrum blo mi. No enitaem mi herem famili blo victim ask for showim mercy on behalf lo man wea mekem olketa for safa. Mi never herem samwan talem toktok wea showim love and forgiveness olsem.”

3. Wat nao helpem Denise for forgive?

³ Wat nao helpem Denise for forgive? Hem ting raonem forgiveness blo Jehovah. (Mic. 7:18) Taem iumi appreciatim forgiveness wea Jehovah showim lo iumi, datwan bae helpem iumi for forgivim narawan tu.

4. Wat nao Jehovah laekem iumi for duim? (Ephesus 4:32)

⁴ Jehovah laekem iumi for willing for forgivim narawan lo sem wei wea hem willing for forgivim iumi. (Readim Ephesus 4:32.) Hem expectim iumi for redi for forgivim samwan wea mekem iumi feel nogud. (Ps. 86:5; Luke 17:4) Lo disfala article, bae iumi storyim thrifala samting wea bae helpem iumi for forgive.

NO IGNOREM HAO IU FEEL

5. Olsem Proverbs 12:18 storyim, hao nao maet iumi feel taem samwan mekem iumi feel nogud?

⁵ Samfala taem, wat samwan talem or duim lo iumi maet mekem iumi barava feel nogud, especially if datfala person hem klos fren or famili member. (Ps. 55:​12-14) Maet pain wea iumi feelim hem olsem samwan katem iumi. (Readim Proverbs 12:18.) Maet iumi trae for no ting abaotem or ignorem hao iumi feel. Bat taem iumi duim datwan, hem olsem samwan busarem iumi and then iumi no laek for aotem datfala naef. Lo sem wei tu, hard for iumi expectim feeling blo iumi for kamap gud if iumi gohed for ignorem.

6. Taem samwan mekem iumi feel nogud, wat nao maet reaction blo iumi?

⁶ Taem samwan mekem iumi feel nogud, maet first reaction blo iumi hem for kros. Bible tu storyim hao iumi savve kros. Bat, hem warnim iumi for no letem feeling for kros bossim iumi. (Ps. 4:4; Eph. 4:26) Why? Bikos staka taem feeling nao muvim iumi for duim samting. And no eni gud samting savve kamaot from kros. (Jas. 1:20) Remember, for kros hem wanfala normal reaction, bat disison for keepim kros hem choice blo man seleva.

7. Taem samwan mekem iumi feel nogud, wat nao samfala nara negative feeling iumi savve garem?

⁷ Taem samwan treatim iumi nogud, maet iumi savve garem samfala nara negative feeling. For example, sista wea nem blo hem Ann sei: “Taem mi pikinini, dadi blo mi lusim mami blo mi and maritim woman wea lukaftarem mi. Mi feel olsem no eniwan tingim mi. Taem tufala garem pikinini, mi feel olketa tekova lo dadi blo mi. Taem mi gohed growap, mi feel no eniwan lovem mi.” Wanfala sista wea nem blo hem Georgette storyim feeling blo hem taem hasband no faithful lo hem, hem sei: “Mitufala bin frens since mitufala smol. Mitufala pioneer tugeta tu! Heart blo mi barava brek.” Wanfala sista wea nem blo hem Naomi sei: “No enitaem mi ting dat hasband blo mi bae mekem mi barava feel nogud. So taem hem talem mi hem bin lukluk lo pornography and haedem, mi feel dat hem betrayim mi and laea.”

8. (a) Why nao iumi shud forgivim narawan? (b) Taem iumi forgive, wat nao olketa gud samting iumi kasem? (Lukim tu box “Wat if Samwan Kosim Iumi for Garem Trauma?”)

⁸ Hard for iumi kontrolem wat olketa narawan talem or duim lo iumi, bat iumi savve kontrolem hao iumi respond. And staka taem, best response hem for forgive. Why? Bikos iumi lovem Jehovah and hem laekem iumi for forgive. If iumi gohed kros and no forgive, iumi maet duim karangge samting and spoelem health blo iumi. (Prov. 14:​17, 29, 30) Tingim example blo Sista Christine. Hem sei: “Taem mi tingting tumas abaotem hao mi feel, hem mekem mi no smile staka taem. Hem affectim hao mi chusim kaikai. Mi no savve sleep gud, and hem no isi for mi kontrolem feeling blo mi, and datwan affectim marit blo mi and frenship blo mi witim olketa narawan.”

9. Why nao iumi shud no keepim kros?

⁹ Nomata person wea mekem iumi feel nogud, no duim eni samting for stretem datfala problem, iumi savve duim samting for no letem datwan affectim iumi. Wat nao iumi savve duim? Georgette, hem sei: “Hem tek taem, bat gogo mi disaed for let go and no keepim wei for kros and feel nogud lo ex-hasband blo mi. Taem mi duim datwan, mi barava kasem peace.” Taem iumi no keepim kros, iumi protectim heart blo iumi. And tu, hem olsem iumi givim wanfala present lo iumiseleva, wea hem nao for iumi muv on and enjoyim laef moa. (Prov. 11:17) Hao sapos iu duim olketa samting hia finis, bat iu still no redi for forgive?

DEAL WITIM FEELING BLO IU

10. Why nao iumi needim taem for feeling blo iumi recover? (Lukim tu piksa.)

¹⁰ Wat nao iu savve duim for deal witim wei wea iu feel nogud? Wanfala samting, hem for luksavve hao iu needim taem for recover. For example, samwan wea garekil nogud need for kasem medical kea, and needim taem for datfala garekil hem heal. Lo sem wei tu, iumi needim taem for feeling blo iumi hem heal bifor iumi savve redi for forgivim samwan from heart blo iumi.—Eccl. 3:3; 1 Pet. 1:22.

11. Hao nao prea savve helpem iu for forgive?

¹¹ Prea and askem Jehovah for helpem iu for forgive.c Ann explainim hao prea helpem hem. Hem sei: “Mi askem Jehovah for forgivim each wan lo mifala lo famili for samting wea mifala talem and duim wea no stret. Then mi raetem leta for dadi blo mi and niu waef blo hem and talem dat mi forgivim tufala.” Ann sei hem no isi for hem duim datwan. Bat hem sei: “Mi hope wei wea mi trae for followim example blo Jehovah for forgive, bae mekem dadi blo mi and waef blo hem laek for lane abaotem Jehovah.”

12. Why nao iumi shud trustim Jehovah and no feeling blo iumiseleva?

¹² Trustim Jehovah and no feeling blo iu. (Readim Proverbs 3:​5, 6.) Evritaem Jehovah savve wat nao best samting for iumi. (Isa. 55:​8, 9) And no enitaem hem askem iumi for duim samting wea spoelem iumi. Dastawe, taem hem encouragem iumi for forgive, iumi sure bae iumi kasem gud samting. (Ps. 40:4; Isa. 48:​17, 18) Bat, if iumi trustim feeling blo iumi nomoa, maet hem hard for iumi forgive. (Prov. 14:12; Jer. 17:9) Naomi sei: “Lo firstaem, mi tingse mi no need for forgivim hasband blo mi bikos hem lukluk lo pornography. Mi wari nogud hem duim moa samting wea bae mekem mi feel nogud or hem forget dat wat hem duim hem kosim staka pain. And mi tingse hem olraet nomoa bikos Jehovah understandim feeling blo mi. Bat, mi start for luksavve dat just bikos Jehovah understandim feeling blo mi, hem no minim dat hem agree witim tingting blo mi. Hem luksavve hao mi feel and dat mi needim taem for recover, bat hem laekem mi for forgive tu.”d

TRAE FOR GAREM POSITIVE FEELING

13. Olsem Rome 12:​18-21 storyim, wat nao iumi need for duim?

¹³ Taem iumi forgivim samwan wea mekem iumi barava feel nogud, iumi laek for duim moa samting winim for just disaed for no tok abaotem samting wea happen. If person wea mekem iumi feel nogud hem wanfala Christian brata or sista, goal blo iumi hem for mek peace. (Matt. 5:​23, 24) So instead for kros, iumi chus for showim mercy and instead for iumi feel nogud, iumi showim forgiveness. (Readim Rome 12:​18-21; 1 Pet. 3:9) Wat nao savve helpem iumi for duim datwan?

14. Wat nao iumi shud trae for duim, and why nao olsem?

¹⁴ Iumi shud trae for ting lo person wea mekem iumi feel nogud olsem hao Jehovah ting lo hem. Jehovah chus for luk for olketa gud quality blo pipol. (2 Chron. 16:9; Ps. 130:3) If iumi luk for gud quality blo pipol bae iumi lukim gud saed blo olketa, bat if iumi luk lo bad saed, bae iumi lukim bad quality tu. Taem iumi luk for gud saed, bae hem isi for forgivim narawan. For example, wanfala brata wea nem blo hem Jarrod sei: “Hem isi for mi forgivim wanfala brata taem mi ting abaotem staka gud quality blo hem, winim for tingim samting wea hem duim wea mekem mi feel nogud.”

15. Taem iu forgivim samwan, why nao maet hem gud for talem hem?

¹⁵ Nara important samting wea iumi savve duim, hem for talem datfala person iumi forgivim hem. Why? Tingim wat Naomi hem sei: “Hasband blo mi askem mi, ‘Waswe, iu forgivim mi tu?’ Taem mi laek for sei, ‘Mi forgivim iu,’ mi hard for talem. Mi luksavve dat lo heart blo mi, mi no really forgivim hem yet. Hem tek taem, bat gogo mi fit for talem thrifala important word hia, ‘Mi forgivim iu.’ Mi lukim hao taem mi talem datwan lo hasband blo mi, tias fulap lo eye blo hem, and mi kasem peace tu. Since dat taem, mi start for trustim hem moa and mitufala best frens again.”

16. Wat nao iumi lanem abaotem forgiveness?

¹⁶ Jehovah laekem iumi for forgivim olketa narawan. (Col. 3:13) Nomata olsem, maet hem no isi for duim datwan. Bat samting wea savve helpem iumi, hem nao for iumi no ignorem hao iumi feel and traem best for deal witim feeling blo iumi. Then iumi savve duim samting for garem olketa niu positive feeling.—Lukim box “Thrifala Step for Duim for Forgive.”

FOCUS LO GUD SAMTING IUMI BAE KASEM TAEM IUMI FORGIVE

17. Wat nao olketa gud samting wea iumi kasem from wei for forgive?

¹⁷ Iumi garem staka reason for forgive. Distaem bae iumi storyim samfala. First reason, iumi laek for followim example blo Dadi blo iumi, Jehovah, for showimaot mercy and iumi laek for mekem hem hapi. (Luke 6:36) Second, iumi showimaot iumi barava appreciatim forgiveness blo Jehovah for iumi. (Matt. 6:12) And third, iumi savve garem gud health and olketa frens wea lovem iumi.

18-19. Wat nao gud samting wea iumi kasem from wei for forgive?

¹⁸ Taem iumi forgivim narawan, maet iumi kasem blessing wea iumi no expectim. For example, tingim wat happen lo situation blo Denise. During lo datfala kot case, Denise no savve dat man wea kosim datfala accident, hem plan for suisaed afta kot case blo hem. Bat, taem Denise forgivim hem, datwan barava affectim hem and hem start for studyim Bible witim Olketa Jehovah’s Witness.

¹⁹ Maet iumi feel dat for forgivim samwan, hem barava hard samting for duim, bat staka taem bae iumi kasem gud samting taem iumi duim datwan. (Matt. 5:7) Dastawe, iumi evriwan laek for duim best blo iumi for followim example blo Jehovah for forgive.