Hand blo Jehovah Hem No Short

1. Hao nao Moses showimaot hem trustim Jehovah taem hem leadim olketa Israelite go aot from Egypt?

BIBLE buk blo Hebrew storyim example blo staka wea showimaot faith, and wanfala lo olketa wea garem strong faith, hem Moses. (Heb. 3:​2-5; 11:​23-25) Hem showimaot faith taem hem leadim olketa Israelite go aot from Egypt. Hem no fraetem Pharaoh and army blo hem. From Moses trustim Jehovah, hem leadim olketa Israelite go thru lo Red Sea and bihaen lo wilderness. (Heb. 11:​27-29) Nomata staka Israelite start for no trustim dat Jehovah bae lukaftarem olketa, Moses gohed for trustim God blo hem. And faith wea Moses garem hem strong go moa taem hem lukim Jehovah duim olketa mirakol for provaedem kaikai and wata for helpem pipol blo hem for gohed laef lo wilderness.a—Ex. 15:​22-25; Ps. 78:​23-25.

2. Why nao God askem Moses: “Hao, hand blo Jehovah hem short”? (Numbers 11:​21-23)

² Nomata Moses garem strong faith, samting olsem wan year afta Jehovah duim mirakol for leadim olketa Israelite go aot from Egypt, Moses kwestinim if Jehovah fit for givim meat for pipol blo hem. Moses no savve imaginim hao nao Jehovah bae provaedem inaf meat for staka million pipol wea camp lo wilderness. So Jehovah ansam Moses olsem: “Hao, hand blo Jehovah hem short?” (Readim Numbers 11:​21-23.) Disfala toktok “hand blo Jehovah,” hem minim holy spirit blo God or paoa blo hem for duim samting. So hem olsem Jehovah askem Moses, ‘Hao, iu tingse mi no fit for duim wat mi talem?’

3. Why nao iumi shud interest lo samting wea kasem Moses and olketa Israelites?

³ Hao, enitaem iu wonder if Jehovah bae provaedem material need blo iu or famili blo iu? Nomata wat nao situation blo iu, hem gud for iumi lane from story blo Moses and olketa Israelite taem olketa fail for trustim dat Jehovah fit for provaed for olketa. Olketa principle wea iumi bae lanem from datfala story savve helpem iumi for buildimap wei wea iumi trustim dat hand blo Jehovah hem no short.

LANE FROM EXAMPLE BLO MOSES AND OLKETA ISRAELITE

4. Why nao olketa Israelite start for kwestinim if Jehovah fit for provaedem material need blo olketa?

⁴ Tingim context blo datfala story. Taem nation blo Israel and “staka foreigner” wea go followim olketa, travel from Egypt for go lo Promis Land, olketa stap lo wanfala big wilderness for lelebet longtaem. (Ex. 12:38; Deut. 8:15) Olketa foreigner hia taed for kaikaim manna, so olketa start for komplen and staka Israelite joinim olketa for komplen tu. (Num. 11:​4-6) Pipol hia start for tingim bak olketa kaikai wea olketa kaikaim lo Egypt bifor. Bikos lo pressure wea Moses kasem from olketa, hem tingse hemseleva nao mas provaedem kaikai for pipol hia.—Num. 11:​13, 14.

5-6. Wat nao iumi savve lanem from wat olketa foreigner hia duim wea influencim staka Israelite?

⁵ Luk olsem, attitude wea olketa foreigner garem for no appreciatim wat Jehovah provaedem hem affectim olketa Israelite. Datwan savve kasem iumi tu, bikos attitude blo olketa narawan for no tinghae savve affectim iumi and mekem iumi for start for no satisfae witim wat Jehovah provaedem. Datwan savve happen if iumi start for tingim bak wat iumi garem bifor or jealous lo wat olketa narawan garem. Bat, nomata wat kaen situation nao iumi feisim, iumi savve hapi if iumi lane for satisfae nomoa.

⁶ Olketa Israelite shud remember hao promis blo God abaotem wei wea olketa bae enjoyim staka material tings, hem for taem wea olketa bae stap lo niu hom blo olketa. Datfala promis bae hem kamap tru taem olketa kasem Promis Land, no during lo taem wea olketa travel lo wilderness. Lo sem wei tu, instead for iumi focus lo olketa tings wea iumi no garem lo disfala system, hem gud for iumi tingim wat Jehovah promis for givim iumi lo niu world. Iumi savve ting raonem tu olketa scripture wea savve buildimap trust blo iumi lo Jehovah.

7. Why nao iumi savve trustim dat hand blo Jehovah hem no short?

⁷ Nomata olsem, maet iu wonder why nao God askem Moses: “Hao, hand blo Jehovah hem short?” Maet Jehovah iusim disfala kwestin for helpem Moses for ting abaotem hao hand blo hem no just strong nomoa, bat hem savve reach go kasem eni ples wea hem laekem. Datwan minim God fit for provaedem staka meat for olketa Israelite nomata olketa stap midol lo wilderness. Witim “strongfala hand and paoaful arm” blo hem, Jehovah showim hao nomata wea nao pipol blo hem stap, hand blo hem savve reach aot for helpem olketa. (Ps. 136:​11, 12) So taem iumi kasem hard taem, iumi shud no daotem dat hand blo Jehovah bae reach aot for helpem iumi each wan.—Ps. 138:​6, 7.

8. Hao nao iumi savve avoidim wei for mekem sem mistek olsem olketa Israelite lo wilderness? (Lukim tu piksa.)

⁸ No longtaem bihaen, Jehovah provaedem meat for olketa pipol hia, hem givim kam staka quail bird. Bat olketa Israelite nating thankiu lo God for disfala mirakol. Instead, olketa barava greedy. Olketa waka day and naet for hipimap staka quail bird. Jehovah barava kros lo olketa hia wea greedy and hem killim olketa dae. (Num. 11:​31-34) Iumi tu savve lane from datfala example. Iumi need for careful nogud iumi foldaon insaed trap for greedy. Nomata iumi rich or poor, important samting wea iumi shud hipimap hem “riches long heven,” thru lo wei for garem klos frenship witim Jehovah and Jesus. (Matt. 6:​19, 20; Luke 16:9) Taem iumi duim datwan, iumi savve sure dat Jehovah bae provaedem wat iumi needim.

9. Wat nao iumi sure Jehovah bae duim for iumi?

⁹ Distaem tu hand blo Jehovah hem reach aot for helpem pipol blo hem. Nomata olsem, datwan no minim bae iumi no short lo olketa material need blo iumi or bae iumi no hangere.b Bat iumi sure no enitaem Jehovah bae lusim iumi. Hem bae strongim iumi lo olketa difren hard taem wea iumi kasem. Distaem bae storyim tufala situation wea showim hao iumi savve trustim dat Jehovah bae reach aot for provaedem material need blo iumi: (1) taem iumi deal witim hard taem saed lo selen and (2) taem iumi wari abaotem olketa material need blo iumi lo future.

TAEM IUMI DEAL WITIM PROBLEM SAED LO SELEN

10. Wat nao samfala problem saed lo selen wea iumi maet feisim?

¹⁰ Taem disfala system gogo for end, iumi expectim olketa situation saed lo economy for kamap worse. Olketa politikol raoa, war, natural disaster, or olketa niu pandemic maet mekem laef hem expensive tumas or iumi lusim waka blo iumi, olketa tings blo iumi, or haos blo iumi. Maet bae iumi need for faendem niu waka lo ples wea iumi stap or maet iumi ting for famili blo iumi muv lo nara ples mekem iumi savve provaed for olketa. Wat nao savve helpem iumi for mekem olketa disison wea showim iumi trustim Jehovah?

11. Wat nao savve helpem iu for deal witim olketa problem saed lo selen? (Luke 12:​29-31)

¹¹ Wanfala samting wea important and wea savve barava helpem iu, hem nao for storyim olketa wari blo iu lo Jehovah. (Prov. 16:3) Askem hem for givim iu wisdom for mekem olketa gud disison and for garem peace mekem iu no “gohed for wari tumas” abaotem situation blo iu. (Readim Luke 12:​29-31.) Askem hem for helpem iu for satisfae nomoa witim wat iu needim lo laef. (1 Tim. 6:​7, 8) Duim research lo olketa pablikeson blo iumi abaotem hao for deal witim olketa problem saed lo selen. Staka kasem gud samting lo hao for deal witim olketa economic problem from olketa video and article wea stap lo jw.org.

12. Wat nao samfala kwestin wea savve helpem wanfala Christian for mekem best disison for famili blo hem?

¹² Samfala garem chance for acceptim waka wea bae mekem olketa need for muv farawe from famili blo olketa, bat staka taem datwan hem no wise disison. Bifor samwan acceptim wanfala niu waka, hem shud no tingim nomoa gud samting wea bae hem kasem saed lo selen, bat hao datwan bae affectim tu spiritual saed blo hem and famili blo hem. (Luke 14:28) Hem gud for iumi tingim olketa kwestin hia: ‘If mi stap farawe from marit partner blo mi, hao nao datwan bae affectim marit blo mitufala? If mi muv, hao nao datwan bae affectim wei wea mi attendim olketa meeting and ministry blo mi?’ And if iu garem olketa pikinini, iu need for tingim disfala important kwestin: ‘Hao nao bae mi ‘stretem and trainim olketa pikinini blo mi followim samting wea Jehovah talem’ if mi no stap witim olketa?’ (Eph. 6:4) Iumi mas followim tingting blo God and no idea blo olketa frens and famili wea no respectim olketa Bible principle.c Tony, wea stap lo western Asia, kasem samfala chance for go waka overseas. Bat, afta hem prea abaotem datwan and story witim waef blo hem, hem disaed for no acceptim olketa waka hia, bat instead hem disaed for famili katdaon lo samfala expenses and mekem laef for kamap moa simpol. Taem Tony luk bak, hem sei: “Bikos lo datfala disison, mi hapi tumas from mi helpem samfala pipol for savve lo Jehovah and olketa pikinini blo mitufala hapi for gohed servem Jehovah. Famili blo mi luksavve taem mifala followim toktok wea stap lo Matthew 6:​33, Jehovah evritaem lukaftarem mifala.”

TAEM IUMI WARI ABAOTEM OLKETA MATERIAL NEED BLO IUMI LO FUTURE

13. Wat nao samfala samting wea iumi savve duim distaem for helpem iumi garem wat iumi needim taem iumi olo?

¹³ Wanfala samting wea savve testim hao iumi trustim hand blo Jehovah, hem nao taem iumi ting abaotem wat nao bae happen taem iumi olo. Bible encouragem iumi for waka hard mekem iumi garem olketa material need blo iumi for future. (Prov. 6:​6-11) If situation blo iu hem fitim, hem gud for sevem lelebet selen for future. Selen hem savve protectim man samfala taem. (Eccl. 7:12) Bat, iumi no laek for mekem olketa material samting for kamap main focus lo laef blo iumi.

14. Hao nao Hebrew 13:5 helpem iumi for no wari tumas abaotem selen for future?

¹⁴ Jesus storyim wanfala tokpiksa wea showim hem karangge samting for man hipimap selen and no duim samting wea showim hem “tingim God.” (Luke 12:​16-21) No eniwan lo iumi savve wat nao bae happen tumoro. (Prov. 23:​4, 5; Jas. 4:​13-15) Bikos iumi followim Christ iumi feisim samfala specific challenge. Jesus sei if iumi kamap olketa disaepol blo hem, iumi mas redi for “lusim evri samting.” (Luke 14:33) Olketa Christian lo Judea lo first century hapi nomoa for lusim evri samting wea olketa garem. (Heb. 10:34) Distaem tu, staka brata and sista blo iumi mas lusim olketa material tings blo olketa bikos olketa no sapotim eni politikol party. (Rev. 13:​16, 17) Wat nao helpem olketa for duim datwan? Olketa barava trustim promis blo Jehovah wea sei: “Bae mi nating lusim iu.” (Readim Hebrew 13:5.) Iumi duim best for plan for olketa future need blo iumi, bat if eni samting wea iumi no expectim hem happen, iumi trustim dat Jehovah bae sapotim iumi.

15. Hao nao Christian parents shud ting lo pikinini blo olketa? (Lukim tu piksa.)

¹⁵ Lo samfala culture, parents disaed for garem pikinini mekem olketa pikinini hia sapotim olketa saed lo selen taem olketa kamap olo. Hem olsem pikinini hem kamap “bank account” wea olketa deposit lo hem and wea olketa bae benefit from datwan. Bat, Bible sei parents shud provaedem need blo olketa pikinini. (2 Cor. 12:14) Hem tru, taem parents kamap olo, olketa maet needim samfala help from pikinini blo olketa, and staka pikinini hapi for duim datwan. (1 Tim. 5:4) Bat olketa Christian parents luksavve dat trufala hapi, hem no kam from wei for bornem pikinini mekem pikinini sapotim olketa saed lo selen, bat hem kam from wei for helpem olketa pikinini for kamap olketa servant blo Jehovah.—3 John 4.

16. Hao nao olketa parents savve teachim pikinini blo olketa for kasem selen for lukaftarem olketa seleva? (Ephesus 4:28)

¹⁶ Teachim pikinini blo iufala for trustim Jehovah thru lo wei for showimaot gud example and lo semtaem teachim olketa hao for lukaftarem need blo olketa seleva. Start from taem olketa smol yet, teachim olketa for luksavve wei for waka hard hem gud samting. (Prov. 29:21; readim Ephesus 4:28.) Taem olketa gohed for growap, helpem olketa for duim best lo skul. Olketa Christian parents bae kasem gud samting taem olketa duim research and followim olketa Bible principle for helpem pikinini for savve hao for mekem wise disison saed lo education. Diswan bae helpem olketa pikinini for sapotim olketa seleva and for barava duim gud Christian ministry blo olketa.

17. Wat nao iumi barava sure lo hem?

¹⁷ Olketa loyal servant blo Jehovah savve barava trustim dat hem savve hao for provaedem olketa material need blo olketa and hem barava laek for duim datwan tu. Taem iumi gogo for end blo disfala system, iumi expectim dat wei wea iumi trustim Jehovah bae kasem test. Bat, nomata wat hem happen, iumi laek for disaed strong for trustim dat Jehovah bae iusim paoa blo hem for provaedem olketa material need blo iumi. Iumi savve sure dat strong hand blo hem and paoaful arm blo hem bae no short for reach aot for helpem iumi.