Iusim Gud Bible Olsem Wanfala Mirror

Disaepol James comparem Bible witim wanfala mirror wea iumi savve iusim for helpem iumi for lukim gud wat kaen person nao iumi. (Jas. 1:​22-25) Hao nao iumi savve iusim gud Bible olsem wanfala mirror?

Barava readim gud. If iumi just luk kwiktaem nomoa lo mirror, maet iumi bae no lukim samfala samting wea iumi shud stretem lo lukluk blo iumi. Lo sem wei tu, for iumi lukim klia wat nao stap insaed heart blo iumi wea iumi need for changem, iumi need for barava lukluk gud lo iumiseleva taem iumi readim Bible.

Focus lo wat iuseleva need for changem and no focus lo narawan. Taem samwan holem mirror and tanem lelebet, hem savve lukim klia reflection blo olketa narawan insaed and maet hem lukim wat nao hem rong lo olketa. Lo sem wei tu, maet taem iumi readim Bible hem isi for iumi lukim wat nao mistek blo olketa narawan. Bat datwan bae no helpem iumi for stretem own mistek blo iumi.

Mas reasonable. If iumi luk lo mirror and focus nomoa lo olketa mistek blo iumi, maet bae iumi discourage. So iumi mas reasonable taem iumi readim Word blo God and no expectim for iumi duim staka samting winim wat Jehovah expectim.—Jas. 3:17.