Wanem Nao Jehovah Lukim Long Heart Bilong Mi?
1. Long wanem wei nao Bible hem olsem wanfala mirror?
1 Waswe, iu savve lukluk long mirror? Staka long iumi duim datwan evriday for stretem eni samting wea no luk stret. Bible hem olsem wanfala mirror. Taem iumi readim Bible datwan helpem iumi for luksavve long wanem nao stap long heart bilong iumi, wea hem nao samting Jehovah lukluk long hem. (1 Sam. 16:7; Jas. 1:22-24) Toktok bilong God helpem iumi for ‘luksavve long tingting bilong iumi, and samting wea heart hem laekem.’ (Heb. 4:12) Taem iumi ting raonem wanem iumi readim long Bible evriday, hao nao datwan savve helpem iumi for luksavve long olketa samting wea iumi need for kamap gud long hem long ministry?—Ps. 1:1-3.
2. Long wanem wei nao Bible savve helpem iumi for lukluk long iumiseleva?
2 Iusim Bible Olsem Mirror: Iumi savve lanem samfala wei bilong man wea Jehovah laekem taem iumi readim olketa story long Bible abaotem olketa wea faithful for worshipim hem. Olsem example, David showimaot hem tinghae long nem bilong God. (1 Sam. 17:45, 46) Isaiah hem willing and no fraet for preach long pipol wea no interest. (Isa. 6:8, 9) From Jesus barava lovem Dadi bilong hem, hem hapi for duim ministry and hem no samting wea hard long hem. (John 4:34) Olketa Christian long first century strong for preach, depend long Jehovah, and disaed strong for no givap. (Acts 5:41, 42; 2 Cor. 4:1; 2 Tim. 4:17) Taem iumi ting raonem olketa example hia, datwan bae helpem iumi for lukluk long iumiseleva for lukim wanem nao iumi savve duim for kamap gud long ministry.
3. Why nao iumi mas no delay for kamap gud long samfala samting long ministry?
3 Kamap Gud Long Ministry: Sapos iu lukluk long mirror bat iu no stretem wanem iu lukim, datwan bae no helpem iu. Iumi savve askem Jehovah for helpem iumi for luksavve long wanem iumi savve kamap gud long hem long ministry and then duim samting followim datwan. (Ps. 139:23, 24; Luke 11:13) No delay for duim olsem bikos lelebet taem nomoa hem stap and iumi laek for helpem pipol for sev.—1 Cor. 7:29; 1 Tim. 4:16.
4. Taem man hem studyim Bible and followim wanem hem lanem, hem bae hao?
4 Long tingting bilong Jehovah wanem hem stap long heart bilong man nao hem important winim lukluk bilong hem. (1 Pet. 3:3, 4) Taem man hem studyim Bible and followim wanem hem lanem, hem bae hao? Hem bae ‘no herem datwan and then forgetim nomoa, bat hem bae duim wanem hem herem. From hem duim wanem hem herem, hem bae hapi.’ (Jas. 1:25) Tru nao, iumi bae hapi and duim gud ministry bikos “iumi olsem olketa mirror wea showimaot glory bilong Jehovah.”—2 Cor. 3:18.