Hao for Givim Gud Advaes

1. Hu nao need for givim advaes? Explainim.

HAO nao iu feel abaotem wei for givim advaes? Samfala olketa hapi for givim advaes. Bat samfala hol bak for givim kaonsel or advaes, and olketa no feel free for duim datwan. Nomata olsem, iumi evriwan need for givim advaes samfala taem. Why nao olsem? Jesus sei pipol bae savve lo olketa tru follower blo hem from olketa showimaot love for each other. (John 13:35) And wanfala wei for showimaot iumi lovem olketa brata and sista, hem for givim kaonsel lo taem wea olketa needim. Bible sei “taem samwan givim kaonsel from heart” hem mekem iumi for “fren gud” tugeta.—Prov. 27:9.

2. Wat nao olketa elder mas savve hao for duim, and why nao olsem? (Lukim tu box “Kaonsel lo Midol Week Meeting.”)

² Olketa elder barava need for savve lo hao for givim gud advaes lo olketa narawan. Jehovah and Jesus assignim olketa elder for kamap shepherd lo kongregeson. (1 Pet. 5:​2, 3) Wanfala wei wea olketa savve duim datwan hem taem olketa givim kaonsel from Bible lo olketa tok lo kongregeson. Olketa mas givim kaonsel tu for each wan lo kongregeson, wea datwan includim olketa wea lusim Jehovah. Hao nao olketa elder and iumi evriwan savve givim gud advaes?

3. (a) Hao nao iumi savve lane for givim gud advaes? (Isaiah 9:6; lukim tu box “Followim Example blo Jesus Taem Iu Givim Advaes.”) (b) Wat nao bae iumi storyim lo disfala article?

³ Iumi savve lane for givim gud advaes taem iumi studyim example blo olketa wea Bible storyim, especially Jesus. Wanfala lo olketa title wea God givim lo Jesus, hem nao “Nambawan Man for Givim Kaonsel.” (Readim Isaiah 9:6.) Lo disfala article, bae iumi storyim wat iumi savve duim taem samwan askem iumi for advaes and wat iumi savve duim for givim kaonsel lo samwan nomata hem no askem datwan. Iumi bae storyim tu why hem important for givim advaes lo raet taem and lo raet wei.

TAEM SAMWAN ASKEM IUMI FOR ADVAES

4-5. Taem samwan askem iumi for advaes, wat kwestin nao iumi shud askem iumiseleva firstaem? Storyim example.

⁴ Taem samwan askem iumi for advaes, wat nao first reaction blo iumi? Iumi maet hapi and laek for givim advaes stretawe. Bat, hem gud for askem iumiseleva firstaem, ‘Hao, mi nao really fit for givim advaes lo samting wea hem ask abaotem?’ Samfala taem, best wei for help, hem nao for no givim advaes, bat helpem hem for faendem samwan wea fit for givim advaes lo datfala samting wea hem ask abaotem.

⁵ Tingim disfala example. Wanfala klos fren blo iu hem faendaot hem garem wanfala big sik. Hem talem iu dat hem start for duim samfala research abaotem samfala treatment wea maet fitim hem, and then hem askem tingting blo iu lo which treatment nao iu tingse hem gud for hem tekem. Maet iuseleva laekem wanfala lo olketa treatment hia, bat iu no wanfala doctor or kasem training lo hao for deal witim datfala sik. Lo kaen situation olsem, best wei for helpem fren blo iu, hem nao for helpem hem for faendem samwan wea qualify for helpem hem.

6. Why nao maet hem gud for iumi no kwiktaem for givim advaes?

⁶ Nomata if iumi qualify for givim advaes abaotem wanfala samting, maet hem gud for no kwiktaem givim ansa lo samwan wea askem iumi for advaes. Why nao olsem? Proverbs 15:28 sei, “Raeteous man hem ting raonem samting firstaem bifor hem ansa.” Hao sapos iumi tingse iumi savve lo ansa? Nomata olsem, maet hem gud for tekem lelebet taem for duim research, prea, and for meditate. Then bae iumi confident dat ansa wea iumi givim hem followim tingting blo Jehovah abaotem datfala samting. Tingim example blo profet Nathan.

7. Wat nao iu lanem from example blo profet Nathan?

⁷ Taem King David story witim profet Nathan, David talem Nathan dat hem laek for buildim wanfala temple for Jehovah. Semtaem nomoa, Nathan advaesem David for duim datwan. Bat Nathan shud faendaot firstaem lo tingting blo Jehovah. Why nao olsem? Bikos Jehovah no laekem David for buildim datfala temple. (1 Chron. 17:​1-4) Olsem iumi lukim lo datfala situation, taem samwan askem iumi for advaes, hem wise for iumi “no kwiktaem” for talem samting.—Jas. 1:19.

8. Wat nao nara reason why iumi shud careful taem iumi givim advaes?

⁸ Tingim nara reason why iumi shud careful taem iumi givim advaes lo samwan. If advaes wea iumi givim, hem mekem samwan for disaedem samting wea kosim problem for kamap, maet iumi tu responsible lo datwan. Dastawe hem gud for iumi tingting gud firstaem bifor iumi givim advaes.

HAO FOR GIVIM KAONSEL NOMATA SAMWAN NO ASKEM

9. Bifor olketa elder givim kaonsel, wat nao olketa mas mek sure lo hem? (Galatians 6:1)

⁹ Samfala taem, olketa elder need for givim kaonsel lo wanfala brata or sista wea “start for go difren.” (Readim Galatians 6:1.) Wanfala study note lo disfala verse sei taem samwan start for go difren maet hem no duim eni serious sin yet. Goal blo olketa elder hem for helpem datfala person for gohed stap lo road wea lead go for laef olowe. (Jas. 5:​19, 20) Bat for kaonsel blo olketa elder hem really help, olketa mas mek sure firstaem if datfala person hem really start for go difren. Olketa elder luksavve dat Jehovah letem each wan lo iumi for mekem olketa disison followim konsens blo iumiseleva. (Rom. 14:​1-4) Bat hao if wanfala brata hem really start for go difren and olketa elder disaed for givim hem kaonsel?

10-12. Taem elder givim kaonsel lo samwan nomata hem no askem, wat nao elder shud duim? Storyim example. (Lukim tu piksa.)

¹⁰ Taem olketa elder mas givim kaonsel lo samwan wea no ask for datwan, samfala taem hem no isi. Why nao olsem? Olsem aposol Paul talem, samwan maet start for go difren bat hem no luksavve lo datwan. So firstaem, olketa elder need for helpem hem for redyim tingting blo hem for acceptim datfala kaonsel.

¹¹ For givim kaonsel lo samwan wea no ask for datwan, hem olsem iu trae for plantim seed lo strong graon. Bifor wanfala farmer hem plant, hem need for houm graon. Diswan hem for mekem graon soft and redi for plantim seed insaed. Then hem plantim datfala seed. Afta, hem savve watarem datfala seed for hem grow. Lo sem wei tu, bifor wanfala elder givim kaonsel lo samwan wea no ask for datwan, hem bae gud for datfala elder redyim tingting blo datfala person for acceptim kaonsel hia. For example, datfala elder maet weit for raet taem for story and talem brata hia dat hem barava tingim hem. If man wea givim kaonsel hem evritaem showimaot love and hem kaen, datwan bae mekem hem isi for olketa narawan acceptim advaes blo hem.

¹² Taem tufala story, elder savve gohed for mekem datfala graon soft taem hem explainim hao evriwan savve mekem mistek and needim kaonsel samfala taem. (Rom. 3:23) Datfala elder no tok raf and lo wei wea showimaot big respect hem iusim Bible for showim hao datfala brata hem start for go difren. Taem brata hia luksavve dat hem duim mistek, elder savve “plantim seed” taem hem explainim lo kliafala wei wat hem need for duim for stretem situation blo hem. Then, elder “watarem” datfala seed taem hem praisem brata hia and prea witim hem.—Jas. 5:15.

13. Wat nao olketa elder savve duim for mek sure datfala person hem minim gud kaonsel wea hem herem?

¹³ Samfala taem person wea herem kaonsel hem no minim gud wat datfala man wea givim kaonsel hem talem. Wat nao olketa elder savve duim for samting olsem no happen? Olketa elder savve iusim olketa kwestin wea showimaot respect for helpem datfala person for minim gud olketa point. (Eccl. 12:11) Ansa blo hem bae helpem elder wea givim kaonsel for luksavve if datfala person hem minim wat hem herem.

GIVIM ADVAES LO RAET TAEM AND LO RAET WEI

14. Why nao iumi shud no givim advaes taem iumi kros? Explainim.

¹⁴ From iumi evriwan no perfect, samfala taem bae iumi duim or talem samting wea mekem olketa narawan feel nogud. (Col. 3:13) Bible storyim hao samfala taem iumi savve duim samting wea mekem each other for kros. (Eph. 4:26) Bat iumi mas traem best for no givim advaes taem iumi kros. Why nao olsem? Bikos taem man kros datwan no stretem samting followim “samting wea God laekem.” (Jas. 1:20) If iumi givim advaes taem iumi kros, maet iumi bae mekem situation for kamap worst. Diswan no minim bae iumi kwaet nomoa and no talem feeling blo iumi lo man wea mekem iumi kros. Bat if iumi weit go kasem taem kros blo iumi katdaon, bae iumi savve story gud. Iumi savve lane from gud example blo Elihu wea givim gud kaonsel lo Job.

15. Wat nao iumi lanem from example blo Elihu? (Lukim tu piksa.)

¹⁵ Taem Job gohed defendim hemseleva bikos olketa fren blo hem accusim hem, Elihu gohed for lisin lo Job for staka day. Elihu sorre lo Job. Bat Elihu kros tumas tu bikos Job no talem stret samting abaotem Jehovah and hem tingting tumas abaotem hemseleva. Nomata olsem, Elihu weit go kasem taem blo hem for story, and then lo kaenfala wei and witim big respect hem kaonselem Job. (Job 32:2; 33:​1-7) Example blo Elihu teachim iumi lo wanfala important samting: Taem iumi givim advaes, hem best for givim lo raet taem and lo raet wei, wea hem nao for duim witim respect and love.—Eccl. 3:​1, 7.

GOHED FOR GIVIM AND ACCEPTIM ADVAES

16. Wat nao iu lanem from Psalm 32:8?

¹⁶ Theme scripture for disfala article hem sei ‘Jehovah lukluk gud lo iumi for givim advaes lo iumi.’ (Readim Psalm 32:8.) Disfala verse showimaot dat hem bae gohed sapotim iumi. So hem no just givim iumi advaes nomoa, bat hem helpem iumi for followim tu. Datwan hem wanfala barava gud example for iumi! Taem iumi garem privilege for givim advaes lo olketa narawan, iumi laek followim example blo Jehovah taem iumi gohed luk for olketa narawan and givim eni sapot wea olketa needim.

17. Taem olketa elder givim advaes from Bible wea barava fitim, hao nao datwan mekem iu feel? Explainim. (Isaiah 32:​1, 2)

¹⁷ Winim enitaem bifor, iumi need for givim gud advaes and for acceptim gud advaes. (2 Tim. 3:1) Olketa elder wea givim advaes from Bible wea barava fitim, olketa “olsem olketa stream blo wata lo land wea no garem wata.” (Readim Isaiah 32:​1, 2.) Taem olketa frens givim advaes wea iumi barava needim nomata olketa savve iumi maet no laek for herem, hem olsem olketa givim iumi wanfala present wea “olsem olketa golden apple insaed lo silver bowl.” (Prov. 25:11) Dastawe, iumi laek gohed for kasem wisdom wea iumi needim for givim advaes and for acceptim gud advaes.