Iu Lanem Finis “Disfala Secret” lo Hao for Satisfae?

1. Wat nao wei for satisfae hem minim, and wat nao hem no minim?

HAO, iu satisfae lo wat iu garem? Samwan wea satisfae hem hapi and garem peace bikos hem focus lo olketa blessing wea hem kasem distaem. Hem no feel nogud or kros nomata hem no garem samfala samting. Bat datwan no minim samwan wea satisfae bae no wari nao for duim eni samting. For example, hem stret for wanfala Christian reach aot for duim moa samting lo service blo hem for Jehovah. (Rom. 12:1; 1 Tim. 3:1) And bae hem no lusim hapi blo hem if hem no kwiktaem kasem privilege wea hem laekem.

2. Why nao wei for no satisfae hem dangerous samting?

² Wei for no satisfae savve lead go lo staka serious problem. Olketa wea no satisfae lo wat olketa garem, savve waka staka hour for kasem olketa material samting wea olketa no really needim. Sorre samting nao, samfala Christian even stealim selen and olketa nara samting wea olketa laekem. Maet olketa tingse, ‘Mi shud kasem diswan,’ ‘Mi weit longtaem nao,’ or ‘Bae mi changem bak selen hia bihaen.’ Bat, Jehovah no hapi lo eni wei for steal and datwan no showimaot respect lo Jehovah. (Prov. 30:9) Olketa narawan maet barava feel nogud bikos olketa no kasem wanfala privilege gogo olketa stop nao for worshipim Jehovah. (Gal. 6:9) Why nao samwan wea dedicate finis for worshipim Jehovah bae ting for duim datwan? Maet datwan savve happen bikos datfala person hem isisi lusim wei for satisfae.

3. Wat nao leson wea iumi lanem from Philippians 4:​11, 12?

³ Iumi evriwan need for gohed lane for satisfae witim wat iumi garem. Aposol Paul sei hem ‘lane for satisfae nomoa, nomata wat nao happen lo laef’ blo hem. (Readim Philippians 4:​11, 12.) Hem raetem olketa toktok hia taem hem stap lo prison. Nomata hem lo prison, hem no lusim hapi blo hem. Hem ‘lanem finis disfala secret’ lo hao for satisfae. So if iumi faendem hem hard for satisfae, toktok blo Paul and experience blo hem savve helpem iumi for sure dat iumi tu savve gohed lane for satisfae. Wei for satisfae witim wat iumi garem hem bae no kamap seleva nomoa. Bat, hem samting wea iumi mas lane for duim. Hao nao iumi savve lanem? Distaem bae iumi storyim olketa quality wea bae helpem iumi for lanem disfala secret lo hao for satisfae.

LANE FOR APPRECIATIM SAMTING

4. Hao nao wei for appreciatim samting helpem iumi for satisfae? (1 Thessalonians 5:18)

⁴ Wei for appreciatim samting bae helpem iumi for satisfae. (Readim 1 Thessalonians 5:18.) For example, taem iumi evritaem thankiu for wat iumi garem lo laef, bae iumi no wari tumas abaotem olketa samting wea iumi laekem bat iumi no garem. Taem iumi ting raonem and appreciatim olketa privilege wea iumi garem distaem, iumi bae focus for duim best blo iumi lo olketa assignment hia and no wari tumas abaotem wei for kasem nara privilege. Dastawe, Bible encouragem iumi for prea and talem thankiu lo Jehovah! Taem iumi garem wei for appreciatim samting, datwan bae helpem iumi for kasem “peace blo God wea winim nao wanem man savve minim.”—Phil. 4:​6, 7.

5. Wat nao olketa samting wea olketa Israelite shud appreciatim? (Lukim tu piksa.)

⁵ Tingim wat happen lo olketa Israelite. Staka taem nao olketa komplen lo Jehovah and sei olketa no garem kaikai wea olketa enjoyim lo Egypt. (Num. 11:​4-6) Hem tru, laef lo wilderness hem no isi. Wat nao bae helpem olketa for satisfae? Olketa shud ting raonem and appreciatim wat Jehovah duim finis for olketa. Olketa shud tingim dat taem olketa lo Egypt, olketa slave and pipol barava treatim olketa nogud, so Jehovah mekem tenfala trabol for kasem pipol blo Egypt. Bihaen olketa Israelite kamap free, olketa “tekem olketa riches blo olketa Egyptian” olsem silver, gold, and olketa kaleko. (Ex. 12:​35, 36) Taem olketa Israelite ranawe kasem Red Sea, Jehovah mekem mirakol for divaedem datfala wata. And taem olketa travel lo wilderness, hem feedim olketa evriday witim manna. So wat nao problem? Olketa Israelite no satisfae, no bikos olketa no garem kaikai wea olketa needim, bat bikos olketa no appreciatim wat olketa garem finis.

6. Wat nao samfala samting wea iumi savve duim for garem wei for appreciatim samting?

⁶ Wat nao iu savve duim for garem wei for appreciatim samting? First, hem gud for spendem taem evriday for ting abaotem olketa gud samting wea iu garem. Maet iu savve raetem daon tu samfala samting wea iu appreciatim. (Lam. 3:​22, 23) Second, talem thankiu blo iu. Hem gud for iu talem thankiu lo olketa narawan for wat olketa duim for iu. And main samting, talem thankiu lo Jehovah evritaem. (Ps. 75:1) Third, chusim olketa frens wea savve appreciatim samting. If olketa frens blo iumi komplen olowe or no savve sei thankiu, bae iumi tu olsem olketa. (Deut. 1:​26-28; 2 Tim. 3:​1, 2, 5) Taem iumi lukaotem olketa chance for talem thankiu lo narawan, bae iumi no tingting tumas abaotem olketa samting wea iumi laekem bat iumi no garem.

7. Wat nao Aci duim for helpem hem appreciatim wat hem garem, and wat nao result?

⁷ Tingim story blo Sista Aci, wea stap lo Indonesia. Hem sei: “During lo COVID-19 pandemic, mi start for comparem situation blo mi witim olketa nara brata and sista. From datwan, mi start for no satisfae witim wat mi garem.” (Gal. 6:4) Wat nao helpem hem for changem tingting blo hem? Aci sei: “Mi start for ting raonem olketa blessing wea mi kasem each day and for ting abaotem staka gud samting wea mi kasem from mi part lo organization blo God. Then mi talem thankiu lo Jehovah. Datwan mekem mi barava feel satisfae.” If iu start for garem negative tingting, hao sapos iu duim sem samting olsem Aci for gohed appreciatim wat iu garem?

GOHED FOCUS AND HAMBOL

8. Wat nao happen lo Baruch?

⁸ Wantaem, Baruch wea hem secretary blo profet Jeremiah, hem start for no satisfae lo wat hem garem. Assignment blo Baruch hem no isi, hem mas sapotim Jeremiah for talem wanfala strong message lo nation blo Israel wea barava no appreciatim wat Jehovah duim for olketa. Gogo, Baruch lusim focus blo hem. Instead for hem concentrate lo wat Jehovah laekem hem for duim, luk olsem hem start for tingting tumas abaotem hemseleva and wat hemseleva laek for duim. Jehovah iusim Jeremiah for tok olsem lo Baruch: “Iu laek for aftarem olketa big samting for iuseleva. Stop for aftarem olketa samting olsem.” (Jer. 45:​3-5) Hem olsem Jehovah sei lo hem: “Satisfae nomoa witim wat iu garem.” Baruch acceptim datfala kaonsel and gohed duim samting wea Jehovah hapi lo hem.

9. Olsem 1 Corinthians 4:​6, 7 storyim, taem iumi hambol wat nao bae iumi luksavve lo hem? (Lukim tu piksa.)

⁹ Samfala taem, maet wanfala Christian tingse hem shud kasem wanfala privilege lo service blo Jehovah. Maet hem savve tumas hao for duim datfala waka, hem waka hard, or hem garem staka experience. Bat, maet narawan nao kasem datfala privilege wea hem laekem. Wat nao hem savve duim for hem no feel nogud? Hem savve ting raonem toktok wea aposol Paul raetem lo 1 Corinthians 4:​6, 7. (Readim.) Evri privilege wea iumi kasem and savve wea iumi garem, hem kam from Jehovah. Hem no givim olketa present olsem bikos iumi duim samting wea spesol winim olketa narawan. Iumi kasem evri samting hia bikos lo undeserved kaeness blo Jehovah.—Rom. 12:​3, 6, ftn; Eph. 2:​8, 9.

10. Hao nao iumi savve lane for hambol?

¹⁰ Iumi savve lane for hambol taem iumi ting raonem example wea Jesus showim for iumi. Tingim wat happen lo datfala naet wea Jesus wasim feet blo olketa aposol blo hem. Aposol John sei: “Jesus hem savve finis [1] Dadi lo heven givim evriting lo hand blo hem and [2] God nao sendem hem kam and [3] bae hem go bak lo God, [nomata olsem] hem getap . . . and start for wasim feet blo olketa disaepol.” (John 13:​3-5) Hem isi for Jesus ting dat olketa disaepol nao shud wasim leg blo hem. Bat taem Jesus lo earth, no enitaem hem tingse hem shud garem wanfala rich and comfortable laef. (Luke 9:58) Jesus hem hambol and satisfae. Hem showimaot perfect example for iumi.—John 13:15.

11. Hao nao wei for hambol helpem Dennis for satisfae?

¹¹ Dennis, wanfala brata from Netherlands, traem best for followim example blo Jesus for hambol, bat hem no isi. Hem sei: “Samfala taem mi luksavve mi start for feel praod or no satisfae, especially taem mi lukim narawan hem kasem privilege wea mi laekem. Lo olketa taem olsem, mi savve studyim olketa topic abaotem wei for hambol. Lo JW Library^® app, mi taggim olketa scripture abaotem wei for hambol mekem mi savve faendem kwiktaem and readim moa. Mi daonlodim lo phone blo mi tu olketa tok wea story abaotem wei for hambol, and mi savve lisin lo olketa staka taem.a Mi luksavve dat evri waka wea iumi duim hem for givim glory lo Jehovah, no iumiseleva. Each wan lo iumi duim smol samting nomoa for sapotim waka wea Jehovah gohed for duim.” If iu start for no satisfae witim situation blo iu, hem gud for duim samting for helpem iu for hambol. Datwan bae strongim frenship blo iu witim Jehovah and helpem iu for satisfae.—Jas. 4:​6, 8.

TING RAONEM HOPE BLO IUMI

12. Wat nao hope blo iumi for future wea savve helpem iumi for satisfae? (Isaiah 65:​21-25)

¹² Taem iumi ting raonem nambawan hope blo iumi for future, datwan mekem iumi for barava satisfae. Toktok blo Jehovah wea profet Isaiah raetem hem showim hao laef distaem hem barava hard and Jehovah hem promis for finisim evri nogud samting hia. (Readim Isaiah 65:​21-25.) Iumi bae stap sef lo olketa naes haos. Iumi bae enjoyim waka blo iumi, and kaikaim olketa healthy kaikai wea teist naes. Iumi bae no need for wari bikos no eni samting bae spoelem iumi or olketa pikinini blo iumi. (Isa. 32:​17, 18; Ezek. 34:25) Iumi garem wanfala nambawan future wea bae barava sef.

13. Lo olketa wanem situation nao iumi barava need for focus lo hope blo iumi?

¹³ Winim enitaem bifor iumi need for focus lo hope blo iumi. Why? Bikos iumi stap lo “olketa last day” and iumi evriwan kasem olketa problem wea “hard tumas” for deal witim. (2 Tim. 3:1) Evriday Jehovah helpem iumi for no givap taem hem provaedem direction, strong, and sapot wea iumi needim. (Ps. 145:14) And tu, hope blo iumi savve strongim iumi lo olketa hard taem. Maet iu stragol for provaedem olketa material need blo famili blo iu. Hao, datwan minim bae iu stragol olsem for olowe nao? Barava nomoa nao! Lo Paradaes, Jehovah promis finis for givim iu wat iu needim and staka nara samting tu. (Ps. 9:18; 72:​12-14) Maet evriday, iu mas deal witim bigfala pain, depression, or nara big sik. Hao, datwan minim bae iu safa olsem for olowe nao? Nomoa. Lo niu world blo God, sik and dae bae finis for olowe. (Rev. 21:​3, 4) Datfala hope helpem iumi for satisfae distaem, and for no kros or feel nogud. Iumi savve feel satisfae nomata iumi kasem injustice, lusim loved wan lo dae, deal witim sik, or eni nara hard taem. Why nao olsem? Bikos nomata hao hard nao eni situation iumi feisim distaem, iumi savve dat olketa hard taem hia “hem for lelebet taem” nomoa and lo niu world evri wei for safa bae finis for olowe.—2 Cor. 4:​17, 18.

14. Hao nao iumi savve strongim hope blo iumi?

¹⁴ From hope hem wanfala important samting wea helpem iumi for satisfae, hao nao iumi savve strongim datfala hope? Olsem wanfala man wea needim eye glass for lukim klia samting wea stap farawe, iumi tu need for duim samting for strongim hope blo iumi mekem iumi savve lukim klia Paradaes wea bae kamap lo future. If iumi savve wari tumas abaotem selen, hem gud for imaginim taem wea iumi bae no needim eni selen, no garem eni kaon, and no eniwan bae poor. If iumi wari abaotem olketa privilege wea iumi no kasem yet lo service blo Jehovah, hem gud for tingim hao lo future olketa samting olsem bae no really important bikos iumi bae perfect and servem Jehovah for staka thousand years. (1 Tim. 6:19) Firstaem, maet hem no isi for ting raonem future and stop for wari abaotem wat hem happen distaem. Bat gogo, bae iu faendem hem moa isi for ting abaotem olketa promis blo Jehovah for future.

15. Wat nao iu lanem from story blo Christa?

¹⁵ Tingim hao wei for garem hope hem helpem Christa, wea hem waef blo Dennis, wea iumi storyim finis. Hem sei: “Mi garem wanfala sik wea affectim olketa masol lo body blo mi so mi mas iusim wheelchair, and klosap full day mi leidaon nomoa lo bed. Evriday mi feelim pain. Doctor blo mi talem dat situation blo mi hem bae no kamap gud. Bat kwiktaem nomoa mi tingim, ‘Hao hem ting abaotem future hem difren from mi.’ Mi focus lo hope blo mi and datwan mekem mi garem peace lo mind. Distaem, mi mas gohed deal witim olketa problem lo disfala world, bat lo niu world mi bae barava enjoyim laef!”

“OLKETA WEA FRAET LO HEM NO SHORT LO ENI SAMTING”

16. Why nao King David sei olketa wea fraet lo Jehovah “no short lo eni samting”?

¹⁶ Nomata iumi satisfae, iumi still savve kasem olketa problem. Tingim King David, samting olsem thrifala pikinini blo hem dae. Olketa accusim hem, betrayim hem, and hem mas ranawe and haed for staka year. Bat, nomata during lo wanfala hard taem, hem sei olsem abaotem Jehovah: “Olketa wea fraet lo hem no short lo eni samting.” (Ps. 34:​9, 10) Why nao hem sei olsem? Bikos, hem luksavve nomata iumi pipol blo Jehovah iumi bae kasem olketa hard taem lo laef, bat iumi sure no enitaem bae iumi short lo eni samting wea iumi really needim. (Ps. 145:16) And iumi savve depend lo Jehovah for helpem iumi lo eni hard taem. Iumi savve satisfae nomata wat nao situation blo iumi.

17. Why nao iu disaed strong for gohed lanem secret lo hao for satisfae?

¹⁷ Jehovah laekem iu for satisfae. (Ps. 131:​1, 2) So traem best for lanem datfala secret lo hao for satisfae. If iu waka hard for lanem wei for appreciatim samting, gohed focus and hambol, and strongim hope blo iu, bae iu fit for sei: “Yes, mi satisfae.”—Ps. 16:​5, 6.