Hao for Gohed Hapi Taem Iu Olo

1-2. Hao nao Jehovah ting lo olketa olo wea faithful? (Psalm 92:​12-14; lukim tu piksa.)

PIPOL evriwea lo world garem olketa difren reaction taem olketa start for olo. For example, tingim disfala situation: Hao, iu tingim yet firstaem wea iu lukim iu garem wanfala gray hair? Maet iu kwiktaem pullimaot nogud eniwan lukim. Bat iumi savve dat for pullimaot datfala gray hair bae no stopem staka moa for grow. Disfala example showimaot hao staka pipol no laek for kamap olo.

² Bat, hao Dadi blo iumi lo heven ting lo olketa servant blo hem wea olo, hem difren. (Prov. 16:31) Hem sei olketa olsem tree wea gohed garem frut. (Readim Psalm 92:​12-14.) Why nao hem talem datwan? Staka taem olketa tree wea barava old nao garem staka leave and flaoa wea smel naes. Wanfala lo olketa kaen tree olsem, hem datfala cherry tree blo Japan wea garem naes flaoa. Samfala lo olketa tree hia wea barava luk naes, olketa laef for winim wan thousand years. Olsem olketa tree hia wea barava old, olketa olo wea faithful luk naes tumas, especially lo eye blo God. Samting wea important lo Jehovah hem wei blo datfala olo and no just gray hair blo hem. Hem tinghae lo olketa beautiful quality blo olketa olo, olsem hao olketa no givap and loyal, and tu, wei wea olketa faithful for servem Hem for staka year.

3. Storyim wanfala example abaotem hao Jehovah iusim olketa olo for duim will blo hem.

³ Taem age blo samwan hem gogo ap, datwan no minim hao Jehovah ting lo hem, hem gogo daon.a Really, staka taem Jehovah iusim olketa olo for duim will blo hem. For example, Sarah hem olo fogud taem Jehovah talem dat hem bae kamap mami blo wanfala maeti nation and Messiah bae born lo laen blo hem. (Gen. 17:​15-19) Moses tu hem olo taem Jehovah talem hem for leadim olketa Israelite kamaot from Egypt. (Ex. 7:​6, 7) And aposol John hem olo nao taem Jehovah iusim hem for raetem faevfala Bible buk.

4. Olsem Proverbs 15:15 talem, wat nao savve helpem olketa olo for no givap taem olketa feisim olketa challenge? (Lukim tu piksa.)

⁴ Olketa olo feisim staka challenge taem age blo olketa gogo ap. Wanfala sista hem fani and sei, “If iu no brave, iu no fit for kamap olo.” Bat, hapib savve helpem olketa olo for no givap taem olketa deal witim olketa hard taem wea kam from wei for olo. (Readim Proverbs 15:15.) Lo disfala article, bae iumi storyim wat olketa olo savve duim for gohed hapi. And tu, iumi bae storyim hao olketa narawan savve helpem olketa olo brata and sista lo kongregeson blo olketa. Firstaem, iumi bae storyim why hem no isi for gohed hapi taem iumi gogo for olo.

HAO WEI FOR OLO SAVVE AFFECTIM HAPI BLO IU

5. Wat nao maet savve mekem samfala wea olo for discourage?

⁵ Wat nao maet savve mekem iu for discourage? Maet iu sorre bikos iu no fit nao for duim wat iu savve duim bifor. Maet iu barava misstim olketa taem wea iu young and healthy. (Eccl. 7:10) For example, Sista Ruby sei: “For werem kaleko hem no isi bikos body blo mi savve pain and hem lelebet hard for mi muv raon. Simpol samting olsem for liftim leg blo mi for werem socks hem hard. Olketa hand blo mi numb and garem arthritis, wea datwan mekem hem hard for even duim olketa smol samting.” And Harold, wea bin stap lo Bethel sei: “Mi no olsem nao bifor, samfala taem mi feel nogud bikos mi no fit for duim evri samting wea mi laek duim. Taem mi young mi barava strong. Baseball nao favorite sports blo mi. Olketa savve sei, ‘Givim ball lo Harold bikos hem no savve miss.’ Bat distaem, ating nomata for torowem ball mi no fit nao.”

6. (a) Wat nao olketa nara reason wea savve mekem samfala olo for discourage? (b) Wat nao savve helpem olketa wea olo for disaed if olketa bae stop for draev or nomoa? (Lukim article lo disfala magasin wea garem title “Hao, Mi Shud Stop Nao for Draev?”)

⁶ Iu maet feel discourage bikos iu no savve duim samfala samting wea iuseleva savve duim bifor, especially if iu needim samwan for lukaftarem iu or iu go stap witim olketa pikinini blo iu. Or maet iu sorre tumas bikos health or eye blo iu hem kamap worse, gogo iu no savve go seleva lo samfala ples or for draevem wanfala vehicle. Datwan savve mekem iu barava sorre! Bat wanfala samting wea savve help, hem nao for remember dat iumi still important lo Jehovah and olketa narawan, nomata iumi no savve draev nao, lukaftarem iumiseleva, or stap seleva. And iumi sure dat Jehovah hem understandim feeling blo iumi. Wat hem stap lo heart blo iumi nao hem important lo hem, wea hem nao love blo iumi for hem and for olketa brata and sista.—1 Sam. 16:7.

7. Wat nao savve helpem olketa wea sorre bikos olketa ting dat olketa maet no laef go kasem end blo disfala system?

⁷ Iu maet sorre bikos iu tingse iu bae no laef go kasem end blo disfala system. If iu feel olsem, wat nao savve helpem iu? Remember, Jehovah hem patient for weit for finisim disfala wicked world. (Isa. 30:18) And hem garem reason for duim datwan. From hem patient hem givim taem and chance for staka million pipol for lane abaotem hem and servem hem. (2 Pet. 3:9) So taem iu feel discourage, trae for tingim haomas pipol bae kasem gud samting bifor end kam bikos Jehovah hem patient. Samfala lo olketa maet hem olketa relative blo iu.

8. Hao nao olketa challenge wea kamap taem man olo hem affectim olketa?

⁸ Nomata iumi young or olo, taem iumi no feel gud, iumi savve talem or duim samting wea bihaen iumi savve regretim. (Eccl. 7:7; Jas. 3:2) For example, taem datfala faithful man Job safa, hem talem olketa “karangge toktok.” (Job 6:​1-3) And tu, sik or medicine wea olketa olo tekem savve mekem olketa for talem or duim samting wea no really wei blo olketa. Nomata olsem, no eniwan lo iumi shud iusim age or health blo iumi olsem excuse for talem toktok wea no kaen or demandim olketa narawan for duim samting for iumi. And if iumi luksavve iumi talem samting wea no kaen lo samwan, iumi shud no hol bak for sei sorre.—Matt. 5:​23, 24.

HAO FOR GOHED HAPI

9. Why nao iu shud acceptim help from olketa narawan? (Lukim tu piksa.)

⁹ Acceptim help from olketa narawan. (Gal. 6:2) Firstaem, maet iu faendem hard for duim datwan. Wanfala sista wea nem blo hem Gretl sei: “Samfala taem mi faendem hard for acceptim help bikos mi feel dat bae mi mek hevi lo narawan. Hem tek lelebet longtaem for changem tingting blo mi and hambol for acceptim dat mi needim help.” Taem iu acceptim help, iu givim chance lo narawan for feelim hapi wea kam from wei for givim samting. (Acts 20:35) And iu bae hapi tumas for lukim hao olketa narawan lovem iu and kea abaotem iu.

10. Why nao iu shud remember for showim thankiu blo iu? (Lukim tu piksa.)

¹⁰ Showim thankiu blo iu. (Col. 3:15; 1 Thess. 5:18) Taem olketa narawan duim gud samting for iumi, iumi tinghae lo datwan, bat maet iumi forget for showim thankiu blo iumi. Bat, if iumi smile and sei thankiu, bae iumi mekem olketa frens blo iumi feel gud and for olketa savve dat iumi appreciatim olketa. Leah, wea hem lukaftarem olketa olo lo Bethel sei: “Wanfala olo sista wea mi lukaftarem savve raetem olketa smol thankiu note for mi. Hem no talem staka samting, bat hem talem olketa naes toktok. Mi enjoy for readim wat hem talem, and mi hapi for savve dat hem appreciatim help blo mi.”

11. Hao nao iu savve helpem olketa narawan? (Lukim tu piksa.)

¹¹ Traem best for helpem olketa narawan. Taem iu iusim taem and strong blo iu for helpem olketa narawan, bae iu no tingim tumas olketa problem blo iuseleva. Wanfala toktok blo olketa lo Africa sei olketa olo olsem wanfala library wea garem olketa buk wea fulap witim staka wisdom. Bat if olketa buk stap nomoa lo shelf bae olketa no teachim or talem iumi eni story. Iufala olketa olo olsem wanfala library, so duim samting for sharem savve wea iufala garem and experience blo iufala witim olketa young wan. Askem olketa kwestin and lisin lo olketa. Teachim olketa why hem evritaem best for followim standard blo Jehovah and why datwan bae mekem olketa hapi. For sure, iu bae hapi taem iu comfortim and strongim olketa young frens blo iu.—Ps. 71:18.

12. Olsem Isaiah 46:4 storyim, wat nao Jehovah promis for duim for olketa olo? (Lukim tu piksa.)

¹² Prea lo Jehovah for strongim iu. Nomata iu maet feel barava taed or discourage, Jehovah “hem no savve kamap taed or wik.” (Isa. 40:28) Jehovah iusim strong blo hem for duim wat? Wanfala samting nao hem for strongim olketa olo wea faithful. (Isa. 40:​29-31) Hem promis for helpem olketa. (Readim Isaiah 46:4.) And Jehovah evritaem duim wat hem promisim. (Josh. 23:14; Isa. 55:​10, 11) Taem iu prea lo Jehovah and feelim love and hao hem sapotim iu, datwan bae mekem iu barava hapi.

13. Olsem 2 Corinthians 4:​16-18 storyim, wat nao iumi shud tingim? (Lukim tu piksa.)

¹³ Tingim bae iu no olo for olowe. Hem moa isi for iumi deal witim wanfala hard situation taem iumi tingim dat hem for lelebet taem nomoa. Bible talem hao wei for olo and olketa problem saed lo health bae finis. (Job 33:25; Isa. 33:24) So iu savve hapi bikos iu savve dat lo future, laef blo iu bae hem beta winim lo bifor. (Readim 2 Corinthians 4:​16-18.) Bat wat nao olketa narawan savve duim for help?

WAT OLKETA NARAWAN SAVVE DUIM FOR HELP

14. Why nao hem important for visitim and ringim olketa olo?

¹⁴ Evritaem visitim and ringim olketa olo brata and sista. (Heb. 13:16) Olketa olo savve feel olsem olketa stap seleva. Wanfala olo brata wea hard for lusim haos, wea nem blo hem Camille hem sei: “Mi mas stap lo haos start lo morning go kasem evening. So mi no garem eniting for duim. Samtaems mi feel olsem wanfala olo lion insaed cage. Mi savve wari and kros.” Taem iumi visitim olketa olo, talem olketa dat iumi tingim and lovem olketa. Maet iumi evriwan tingim, hao samfala taem iumi ting for visitim or ringim wanfala olo lo kongregeson bat iumi no duim. Iumi evriwan savve busy. So, wat nao savve helpem iumi for duim “olketa samting wea moa important,” wea includim wei for visitim olketa olo? (Phil. 1:10) Maet wanfala samting nao hem for raetem note lo kalenda blo iu for remindim iu for sendem text message or for ringim olketa olo lo kongregeson. And tu, iu savve markem taem for visitim olketa, winim for weitim nomoa eni chance wea kamap.

15. Wat nao olketa young wan and olketa olo savve duim tugeta?

¹⁵ If iu wanfala young wan, maet iu wonder wat nao bae mi storyim or duim witim olketa olo. Bat trae for no wari tumas abaotem wat for talem. Just kamap gud fren blo olketa. (Prov. 17:17) Bifor or afta lo meeting, stop and story witim olketa olo lo kongregeson. Maet iu savve askem olketa for storyim fevaret scripture blo olketa or eni fani story taem olketa young. Iu savve invaetem olketa tu for watchim wanfala JW Broadcasting^® program witim iu. And tu, maet iu savve duim samting for helpem olketa. For example, iu savve help for updatem device blo olketa or daonlodim olketa latest study pablikeson. Sista Carol sei: “Duim tings witim olketa olo wea iu enjoy for duim. Nomata mi olo, mi still laek for enjoyim laef. Mi laek for shopping, go kaikai witim olketa narawan, and for lukluk lo creation.” And Sista Maira sei: “Wanfala lo olketa fren blo mi hem 90 years old, hem 57-years old winim mi. Bat staka taem mi savve forgetim nomoa age blo hem bikos mitufala savve watch movie and laflaf tugeta. And taem mitufala feisim problem, mitufala savve depend lo each other for advaes.”

16. Why nao hem gud for go witim olketa olo taem olketa go for lukim doctor?

¹⁶ Go witim olketa for lukim doctor. Maet samfala taem iu savve provaedem transport for olketa olo, and for go witim olketa for mek sure olketa medical staff treatim olketa gud and givim help wea olketa needim. (Isa. 1:17) Maet iu savve helpem olketa hia for raetem daon wat olketa doctor talem. Wanfala olo sista wea nem blo hem Ruth sei: “Taem mi go seleva lo olketa doctor, staka taem olketa no tinghevi nomoa lo wat mi talem. Maet olketa doctor savve sei, ‘Problem blo iu hem lo mind nomoa ia.’ Bat taem samwan go witim mi, olketa doctor treatim mi gud. Mi thankiu tumas lo olketa brata and sista wea savve givim taem blo olketa for go witim mi.”

17. Wat nao samfala difren wei wea iu savve waka witim olketa olo lo ministry?

¹⁷ Waka witim olketa olo lo ministry. Samfala olo maet no strong for go preach from haos-tu-haos. Hao, iu savve invaetem eni olo sista for iutufala duim trolley witnessing? Maet iu savve tekem wanfala chair for hem savve sidaon lo hem saed lo trolley. Or hao, iu savve invaetem wanfala olo brata for go witim iu lo Bible study, or even conductim study lo haos blo hem? Maet olketa elder savve arrangem meeting for field service lo haos blo olketa olo mekem hem isi for olketa join lo field service. Taem iumi duim eni samting wea showim honor lo olketa olo, datwan mekem Jehovah hapi.—Prov. 3:27; Rom. 12:10.

18. Wat nao bae iumi storyim lo next study article?

¹⁸ Disfala article remindim iumi dat Jehovah tinghae lo olketa olo and lovem olketa. And iumi evriwan lo kongregeson tu garem sem tingting olsem Jehovah! Taem man gogo for olo hem no isi, bat witim help blo Jehovah, iu savve gohed for hapi. (Ps. 37:25) Hem barava encouraging for iu savve dat lo future, laef blo iu bae hem beta winim lo bifor! Waswe lo olketa wea lukaftarem famili member wea olo, pikinini, or wanfala fren wea sik? Hao nao iu savve gohed for hapi? Bae iumi storyim ansa for datfala kwestin lo next study article.