Olketa Olo—Iufala Still Savve Help lo Kongregeson

Maet distaem iu tu no fit for duim staka samting bikos iu olo. Nomata iu faithful for servem Jehovah for staka year finis, maet iu garem negative tingting abaotem wat iu no fit for duim distaem. For example, staka taem maet iu savve comparem wat iu duim distaem witim wat iu duim bifor. If olsem, wat nao savve helpem iu for deal witim kaen tingting olsem?

WAT JEHOVAH EXPECTIM FROM IU

Askem iuseleva, ‘Wat nao Jehovah expectim from mi?’ Iu savve kasem comfort from olketa toktok lo Deuteronomy 6:​5, wea sei: “Iufala mas lovem Jehovah, God blo iufala, witim full heart blo iufala, witim full laef blo iufala, and witim full strong blo iufala.”

Olsem datfala verse storyim, Jehovah expectim iufala for servem hem witim full heart, laef, and strong blo iufala. Datwan savve helpem iu for no comparem iuseleva witim olketa narawan, or comparem wat iu savve duim distaem witim wat iu bin duim bifor.

Tingim diswan: Taem iu young, wat nao iu givim lo Jehovah? Staka pipol blo Jehovah bae sei dat olketa givim best blo olketa. Iu tu, lo datfala taem iu givim best blo iu followim situation blo iu. Wat nao iu fit for givim lo Jehovah distaem? For sure, wat iu fit for duim distaem hem best blo iu fitim situation blo iu. If iu garem datkaen tingting, bae iu luksavve dat distaem iu givim best blo iu lo Jehovah olsem iu duim bifor. Iu givim best blo iu lo hem lo bifor, and distaem tu iu givim best blo iu lo hem.

EXPERIENCE BLO IU SAVVE BARAVA HELPEM OLKETA NARAWAN

Nara wei for luk lo situation blo iu hem olsem: Winim wei for tingim dat iu no fit for duim staka samting from iu olo, iu savve ting abaotem olketa chance wea iu savve helpem olketa narawan. Olsem wanfala olo Christian, distaem iu savve duim samfala samting wea iu no duim taem iu young. For example, iu savve duim diswan:

Sharem experience blo iu witim olketa narawan. Lukim wat Bible talem:

King David: “Bifor tu mi young and distaem mi olo nao, bat no enitaem mi lukim God lusim eniwan wea raeteous, or pikinini blo hem no garem kaikai.”—Ps. 37:25.

Joshua: “And lukim! Klosap nao bae mi dae, and iufala barava savve gud witim full heart blo iufala and witim full laef blo iufala, hao evri gudfala promis wea Jehovah, God blo iufala talem, hem no fail. Evri promis wea hem talem for iufala hem kamap tru. No eni toktok wea hem talem hem fail.”—Josh. 23:14.

Maet iu tu talem sem samting. David and Joshua storyim personal experience blo tufala. Bikos tufala faithful servant hia blo Jehovah storyim wat tufala seleva bin lukim and experiencem lo laef blo tufala, wat tufala talem hem garem moa mining.

If iu bin servem Jehovah for longtaem finis, iu tu savve story abaotem olketa naes experience blo iu. Hao, iu garem wanfala naes memory blo wanfala taem wea iu lukim hao Jehovah blessim pipol blo hem? Hem gud for storyim datwan lo olketa narawan! Datwan savve barava encouragem olketa, olsem hao hem encouragem iu tu. So taem olketa narawan herem olketa experience blo iu taem iu servem Jehovah, iu kamap samwan wea olketa savve kasem encouragement from hem.—Rom. 1:​11, 12.

Nara wei for iu encouragem olketa narawan hem taem iu attendim olketa kongregeson meeting in person, if iu still fit for duim. Olketa brata and sista savve kasem gud samting from datwan and iu tu. Connie, wea iumi storyim finis, hem sei: “Wei for attendim olketa meeting helpem mi for no discourage. Mi kasem encouragement taem mi lo Kingdom Hall and feelim love blo olketa brata and sista. Mi givim olketa smol present lo olketa narawan for showim mi tinghae lo olketa. And mi mek sure mi gohed share lo olketa spiritual activity witim olketa brata and sista blo mi.”

JEHOVAH TINGHAE LO WEI WEA IU FAITHFUL FOR SERVEM HEM

Bible garem staka example blo pipol wea no fit nao for duim staka samting bikos lo situation blo olketa bat wea Jehovah lovem olketa. Tingim Simeon, wanfala olo Israelite wea laef yet taem Jesus hem born. Taem Simeon savve visit lo temple, maet hem savve lukim olketa young man wea duim important waka lo there. Wat nao maet Simeon tingim? Maet hem ting, from hem olo finis hem no really important lo eye blo Jehovah. Bat Jehovah no ting olsem abaotem hem. Hem lukim hao Simeon hem “wanfala raeteous man wea worshipim God” and blessim hem witim privilege for lukim baby Jesus. Jehovah even iusim Simeon for talem profesi abaotem datfala future Messiah! (Luke 2:​25-35) Hem klia, Jehovah no just lukim wei wea Simeon hem olo bat hem lukim Simeon garem strong faith, “and holy spirit stap lo hem.”

Iu tu savve sure Jehovah tinghae lo wei wea iu faithful nomata situation blo iu mekem iu no fit nao for duim staka samting. Jehovah acceptim sakrifaes “wea man givim from heart . . bikos God hem expectim man for givim samting wea hem garem, no samting wea hem no garem.”—2 Cor. 8:12.

So, focus lo wat iu savve duim. For example, iu savve tingim wat iu still savve duim for share lo ministry nomata for lelebet taem? Hao, iu savve helpem olketa narawan taem iu ringim olketa or raetem smol toktok lo card for olketa? Wei for duim olketa smol samting olsem wea showimaot love, savve barava encouragem olketa brata and sista, especially taem hem kam from wanfala servant blo Jehovah wea faithful for longtaem.

Samfala no fit for duim staka samting from olketa sik. Lukim wanfala experience from East Africa lo datfala box “Datwan Sevem Laef blo Hem.”

No forgetim dat wei wea iu faithful and loyal for longtaem finis hem savve encouragem olketa narawan. Iu samwan wea showim gud example lo wei for no givap, and iu savve sure ‘from God hem raeteous hard for hem forgetim waka wea iu duim, and love wea iu showimaot for nem blo hem taem iu helpem olketa holy wan and gohed for duim datwan.’—Heb. 6:10.

GOHED BUSY

Olketa research showim dat staka man and woman wea olo and gohed helpem olketa narawan, olketa garem gud health, klia tingting, and laef lelebet longtaem.

Hem tru, for duim olketa gud samting for olketa narawan bae no finisim evriting wea kamaot from wei for olo. Kingdom blo God nomoa bae finisim sin wea datwan nao mekem iumi for olo and dae.—Rom. 5:12.

Bat nomata distaem, wat iu duim for Jehovah includim wei for helpem olketa narawan for savve lo hem, bae gohed strongim hope blo iu and savve helpem iu saed lo health. Iufala olketa olo, plis tingim dat Jehovah tinghae lo wat iufala duim for hem, and kongregeson tinghae lo wei wea iufala faithful lo hem.