Hao for Planim Wanfala Wedding wea Bae Honorim Jehovah

1-2. Wat nao tingting blo Jehovah abaotem olketa wedding?

HAO, iu engage finis and redi for marit? If olsem, congratulations! Maet distaem iu gohed busy nao for planim wedding blo iu. Jehovah hem interest lo marit blo iu. Hem laekem iu for enjoyim weddinga day blo iu and for iu and partner blo iu garem wanfala hapi future.—Prov. 5:18; Song of Sol. 3:11.

² Jehovah hem fit for kasem honor lo wedding blo iu. Why nao iumi sei olsem? And hao nao iu savve duim datwan? Nomata disfala article hem for olketa wea bae marit, olketa principle insaed savve helpem iumi evriwan for honorim Jehovah if iumi attendim wanfala wedding, or if olketa askem advaes from iumi abaotem wedding plan blo olketa.

WHY NAO WEDDING SHUD HONORIM JEHOVAH?

3. Wat nao tufala Christian wea bae marit shud tingim taem tufala planim wedding blo tufala, and why?

³ Olketa wea bae marit shud planim wedding blo olketa followim olketa principle wea Jehovah putim insaed Word blo hem. Why? Bikos Jehovah nao startim marit. Hem nao putim arrangement for first wedding, taem hem mekem Adam and Eve for join tugeta olsem hasband and waef. (Gen. 1:28; 2:24) So tingting blo God shud main samting lo mind blo olketa wea bae marit taem olketa planim wanfala wedding.

4. Why nao olketa wea bae marit shud honorim Jehovah lo wedding day blo olketa?

⁴ Wanfala important reason why iu shud followim tingting blo Jehovah lo wedding day blo iu, hem bikos hem Dadi blo iu lo heven and best Fren blo iu. (Heb. 12:9) For sure iu laek gohed mekem Jehovah hem Dadi and Fren blo iu. Iu no laekem eniting for happen lo datfala day or lo eni nara day, wea bae mekem Fren blo iu feel nogud. (Ps. 25:14) Taem iu tingim evriting wea Jehovah bin duim and bae duim for iu, bae iu agree dat hem fit for kasem honor lo wedding blo iu.—Ps. 116:12.

HAO NAO IU SAVVE HONORIM JEHOVAH?

5. Hao nao Bible savve helpem tufala wea bae marit for planim wedding blo tufala?

⁵ Bible no garem list blo olketa rul for Christian followim saed lo wedding or eni reception wea bae kamap bihaen. So tufala wea bae marit savve planim wedding fitim situation, culture, and wat tufala laekem. And tu, olketa tru Christian mas followim law blo gavman saed lo marit. (Matt. 22:21) Nomata olsem, wedding wea organize followim olketa Bible principle bae honorim Jehovah and mekem hem hapi. So, olketa wanem principle nao iutufala shud tingim?

6. Why nao hem important for tufala wea bae marit followim law blo gavman saed lo marit?

⁶ Followim law blo gavman. (Rom. 13:​1, 2) Lo staka kantri, tufala wea bae marit mas followim samfala law wea gavman putim bifor tufala marit. Tufala wea bae marit shud faendaot wat nao olketa law hia lo ples wea olketa stap. If iutufala garem eni kwestin abaotem datwan, feel free for askem help from olketa elder.b

7. Wat kaen atmosphere nao hem fitim lo taem blo wanfala wedding?

⁷ Creatim gud atmosphere. (1 Cor. 10:​31, 32) Mek sure wedding blo iutufala hem reflectim frut blo spirit blo God and no spirit blo world. (Gal. 5:​19-26) For followim Bible principle abaotem hedship, datfala groom hem responsible for mek sure evriwan hapi and respectim datfala wedding. Hao nao datwan bae happen? Wanfala wedding tok wea base lo Bible, wea brata wea givim hem duim datwan witim love and respect, savve helpem olketa wea attend for tinghae lo marit wea hem arrangement from God. Evriwan wea attend savve kasem gud samting bikos datfala tok bae helpem olketa for luksavve wedding hem important occasion. From datwan, staka Christian chus for duim datfala ceremony lo wanfala Kingdom Hall, if hem fitim. If iutufala laek for iusim Kingdom Hall, iutufala shud raetem leta for requestim datwan lo body of elders longfala taem bifor wedding.

8. Wat nao savve help for mek sure atmosphere lo taem blo reception hem honorim Jehovah? (Romans 13:13)

⁸ Readim Romans 13:13. If iutufala chus for garem wanfala wedding reception, wat nao iutufala savve duim mekem datwan no reflectim spirit blo world? Greek word wea olketa transleitim for “wild party” hem minim olketa gathering wea includim wei for drinkim tumas alcohol and pleim music gogo hem leit naet. (Lukim “wild parties” lo English study note lo Romans 13:13.) If iutufala chus for provaedem alcohol, mek sure no eniwan hem ova tumas for drink.c If iutufala chus for pleim music, mek sure hem no laod tumas mekem olketa guest savve enjoyim story. Chusim gud wat type music and chekim lyrics blo song, mekem no eniwan bae stambol.

9. Wat nao tufala wea bae marit shud tingim saed lo speech or olketa nara entertainment during lo reception?

⁹ Hao, bae iutufala garem olketa short toktok from olketa narawan, slideshow, video, or nara type entertainment lo reception? Olketa samting olsem savve mekem datfala day hem moa spesol. Nomata olsem, mek sure olketa samting hia strongim narawan. (Phil. 4:8) Askem iuseleva: ‘Hao, bae hem showim respect lo olketa narawan? Hao, bae hem showim respect lo marit arrangement?’ And samting wea barava important: ‘Hao, bae hem honorim Jehovah?’ Nomata maet hem no rong for talem samfala joke, avoidim eni toktok wea no fitim, olsem wei for talem samting wea maet mekem pipol for tingim sex. (Eph. 5:3) Mek sure famili member and frens wea bae talem short toktok olketa minim and respectim wish blo iutufala.

10. Why nao tufala wea bae marit shud no ova tumas taem tufala planim wedding? (1 John 2:​15-17)

¹⁰ No ova tumas. (Readim 1 John 2:​15-17.) Jehovah hapi taem olketa worshiper blo hem duim samting for honorim hem winim wei for mekhae lo olketa seleva. So olketa Christian wea no ova tumas bae avoidim wei for spendem tumas selen and “show-off” witim wat olketa garem. Wanem gud samting nao bae iutufala kasem if iutufala mekem wedding blo iutufala simpol? Maet bae iutufala kasem gud samting olsem Mike, wanfala brata from Norway. Hem sei: “Mitufala no garem kaon so mitufala fit for gohed pioneer. Wedding blo mitufala hem simpol, bat hem still naes and mitufala garem staka naes memory.” Tabitha, wanfala sista from India, sei: “Mitufala no stress tumas. From wedding blo mitufala hem simpol, mitufala no garem staka samting for planim and for disagree lo hem.”

11. Hao nao bride and groom savve showim tufala modest saed lo kaleko or grooming? (Lukim tu piksa)

¹¹ Hao, iutufala disaedem finis wat bae iutufala werem lo wedding day? For sure iutufala laek for luk naes. Even lo taem blo Bible, bride and groom laek for werem olketa samting wea mekem tufala luk naes. (Isa. 61:10) Hem tru, wat iutufala bae werem lo wedding day maet hem bae difren from wat iutufala savve werem lo olketa nara taem, bat hem mas modest. (1 Tim. 2:9) No letem kaleko or eni nara material tings for kamap main samting lo wedding blo iutufala.—1 Pet. 3:​3, 4.

12. Why nao tufala wea bae marit shud rejectim eni kastom saed lo wedding lo ples tufala stap if datwan againstim Bible?

¹² Rejectim olketa kastom wea againstim Bible. (Rev. 18:4) Staka taem olketa wedding blo world join witim false religion, spiritism, and kastom biliv. Jehovah warnim iumi for stap klia from kaen samting olsem wea no klin. (2 Cor. 6:​14-17) If iutufala no sure sapos Jehovah hapi lo samfala kastom lo ples blo iutufala, duim research and tingim eni Bible principle abaotem datwan, bifor iutufala disaedem wat for duim lo wedding blo iutufala.

13. Hao nao tufala wea bae marit savve garem tingting blo Jehovah abaotem wei for kasem present?

¹³ Hao, lo ples wea iutufala stap olketa guest savve givim present lo tufala wea marit? Present wea samfala guest chus for givim maet hem depend lo financial situation blo olketa. Hem tru, olketa Christian kasem encouragement for givim samting, and olketa hapi taem olketa duim datwan. (Prov. 11:25; Acts 20:35) Bat, iumi bae no laek for mekem olketa guest for feel olketa mas givim samting, or for mekem olketa feel iumi no tinghae lo present wea olketa givim. Iumi followim example blo Jehovah and garem tingting blo hem abaotem present, taem iumi acceptim present wea olketa narawan fit for givim wea kam from heart.—2 Cor. 9:7.

AVOIDEM AND WINIM OLKETA CHALLENGE

14. Wat nao samfala challenge wea tufala wea bae marit savve feisim?

¹⁴ Iutufala maet feisim samfala challenge taem iutufala trae for planim wedding wea bae honorim Jehovah. For example, maet iutufala faendem hem no isi for planim wanfala simpol wedding. Charlie, wea hem from Solomon Islands, sei: “Hem no isi for disaedem hu nao bae iutufala invaetem lo reception. Mifala garem staka fren, and lo culture blo mifala evriwan expect for kasem invitation!” Tabitha, wea iumi storyim finis, sei: “Lo ples wea mi stap, hem wei blo pipol for garem big party. Hem tek taem for parents blo mitufala acceptim disison blo mitufala for invaetem nomoa samting olsem 100 pipol.” Sarah, wea hem from India, sei: “Samfala pipol focus tumas abaotem haomas selen olketa garem and position blo olketa. Olketa kasin blo mi bin garem olketa expensive wedding, so mi kasem lelebet pressure for garem wedding wea expensive go moa.” Wat nao savve helpem iutufala for winim olketa challenge hia and olketa nara challenge?

15. Why nao hem important for prea taem iutufala planim wedding?

¹⁵ Prea taem iutufala planim wedding. Iutufala savve prea lo Jehovah abaotem eni issue wea iutufala feisim or abaotem hao iutufala feel. (Phil. 4:​6, 7 and English study note “in everything”) Iutufala savve askem hem for helpem iutufala mekem olketa gud disison, garem peace lo mind taem iutufala wari, and for garem courage taem iutufala needim datwan. (1 Pet. 5:7) Trust blo iutufala lo Jehovah bae grow taem iutufala lukim hem duim samting for helpem iutufala. Tabitha, wea iumi storyim finis, sei: “Mi and boyfren blo mi wari nogud mitufala no agree witim each other and witim famili blo mitufala. So evritaem mifala discussim olketa plan for wedding, mifala start witim prea. Mifala really feelim help blo Jehovah and garem peace witim each other and famili.”

16-17. Hao nao wei for story gud tugeta help taem iutufala planim wanfala wedding?

¹⁶ Story klia and witim respect. (Prov. 15:22) From iutufala bae marit, iutufala need for mekem staka disison abaotem wedding blo iutufala. Diswan includim wei for disaedem date, haomas selen for spendem, invitation list, and staka nara samting. Bifor iutufala mekem disison, reviewim tugeta olketa option, and discussim olketa Bible principle wea fitim and eni advaes wea iutufala kasem from olketa mature Christian wea garem gudfala marit. Taem iutufala storyim wat nao iutufala laekem, hem gud for kaen, balance, and willing for adjust. If olketa klos famili member, olsem parents blo iutufala, talem wat olketa laekem wea fitim, hem gud for followim. Disfala occasion hem spesol for olketa tu. If iutufala no savve duim wat olketa laekem, explainim reason blo iutufala witim respect. (Col. 4:6) Storyim klia lo olketa famili member dat main goal blo iutufala hem for garem wanfala hapi wedding wea honorim Jehovah.

¹⁷ For explainim wat iutufala laekem lo olketa parents blo iutufala maet no isi especially if olketa no insaed lo truth, bat iutufala savve succeed. Santhosh, wanfala brata lo India sei: “Olketa famili blo mitufala laekem mitufala for includim olketa difren kaen Hindu kastom lo wedding blo mitufala. So hem tek longtaem for mi and gelfren blo mi explainim disison blo mitufala lo olketa. Mitufala mekem samfala adjustment taem mitufala luksavve samfala samting wea olketa talem no againstim wat Jehovah laekem. For example, mitufala changem kaikai wea mitufala planim for reception for kaikai wea olketa laekem, and mitufala disaed for no garem eni singsing or dance bikos olketa no getius lo datwan.”

18. Wat nao savve helpem iutufala for mek sure wedding day hem gohed gud? (1 Corinthians 14:40) (Lukim tu piksa.)

¹⁸ Plan gud. Taem iutufala organizem gud evriting, bae iutufala no stress tumas lo wedding day blo iutufala. (Readim 1 Corinthians 14:40.) Wayne, from Taiwan, sei: “Tu-thri day bifor wedding, mitufala garem smol meeting witim olketa wea bae volunteer for help lo datfala occasion. Mifala storyim olketa arrangement and duim rehearsal lo samfala part lo wedding program for mek sure hem gohed gud.” For showim iutufala respectim olketa guest blo iutufala, traem best for mek sure evriting hem followim taem.

19. Wat nao savve helpem iutufala for mek sure wedding reception hem gohed gud?

¹⁹ Iutufala savve avoidim staka problem wea savve kamap if iutufala ting raonem firstaem. (Prov. 22:3) For example, if iutufala stap lo ples wea hem wei blo pipol for kam lo wedding reception nomata olketa no kasem invitation, tingim wat iutufala savve duim mekem datwan no happen. Mek sure eni relative wea no insaed truth olketa savve lo wat olketa bae expectim, and explainim tingting blo iutufala abaotem samfala wedding kastom. Iutufala savve sharem witim olketa datfala article “What Happens at a Wedding of Jehovah’s Witnesses?” lo jw.org. For helpem iutufala mek sure evriting lo reception hem gohed gud, iutufala savve askem wanfala mature brata for lukaftarem datfala reception. (John 2:8) If iutufala storyim klia olketa wedding plan blo iutufala lo hem, hem savve help for mek sure evriting lo wedding hem followim plan and honorim Jehovah.

20. Wat nao tufala wea bae marit shud tingim abaotem wedding blo tufala?

²⁰ Maet iutufala feel stress tumas taem iutufala tingim evriting wea iutufala mas duim for planim wedding blo iutufala. Bat tingim, wedding blo iutufala hem just wanfala day nomoa. Hem just start blo wanfala beautiful laef wea iutufala bae servem Jehovah tugeta. So traem best for mekem wedding blo iutufala hem simpol and honorim Jehovah. Trustim Jehovah. Witim help blo hem, iutufala savve garem wanfala wedding wea organize, wea taem iutufala luk bak lo datfala day, iutufala bae barava hapi lo olketa naes memory blo iutufala and no garem eni regret.—Ps. 37:​3, 4.