Wat Nao Spirituality Hem Minim? Hao, Mi Savve Spiritual Man Nomata Mi No Joinim Eni Religion?

Ansa from Bible

Bible iusim datfala term spirituality for describem man wea garem strong desire and willing for mekem God hapi and hem lane for garem tingting blo God. Wanfala spiritual person hem traem best for live followim olketa standard blo God and followim direction blo holy spirit blo God.a—Romans 8:5; Ephesians 5:1.

Staka taem Bible explainim spirituality taem hem storyim wat pipol duim wea no spiritual. For example, Bible story olsem abaotem physical man, hem sei “physical man no acceptim olketa samting wea kam from spirit blo God,” or olketa teaching blo God. (1 Corinthians 2:14-16) Spiritual pipol olketa difren. Pipol wea garem physical tingting no savve kaen lo narawan and no garem peace bat olketa savve “jealous and raoa.” (1 Corinthians 3:1-3) And olketa pipol wea spredim laea story for spoelem nem blo narawan and separatem olketa klos fren, Bible kolem “olketa olsem olketa animal, olketa no garem spirit blo God.”—Jude 19; Proverbs 16:28.b

Lo disfala article

• Wea nao spirituality kam from?

• Why nao spirituality hem important?

• Hao nao mi savve developim spirituality?

• Hao mi need for joinim religion mekem mi spiritual?

• Tingting wea no stret abaotem spirituality

• Olketa Bible verse abaotem spirituality

Wea nao spirituality kam from?

Iumi needim spiritual samting bikos God wakem iumi lo image blo hem. (Genesis 1:27) Dastawe, iumi no sapraes dat staka pipol garem appreciation and laek for lane abaotem olketa tings wea olketa no savve lukim or feelim.

Iumi born witim ability for showim olketa quality blo Jehovahc God, olsem peace, mercy, and no fevarem eniwan. (James 3:17) And tu, God givim holy spirit blo hem for helpem olketa wea traem best for obeyim olketa komand blo hem.—Acts 5:32.

Why nao spirituality hem important?

Spirituality savve leadim man for kasem “laef and peace.” (Romans 8:6) Olketa gift hia from God, value blo olketa hem winim eni nara samting.

• Laef: God promis for givim laef olowe lo spiritual pipol.—John 17:3; Galatians 6:8.

• Peace: Diswan hem peace iumi garem witim God. Pipol wea only focus lo physical need blo olketa, olketa enemy blo God. (Romans 8:7) And tu, God rewardim olketa wea cultivatim spirituality witim “peace blo God wea winim nao wanem man savve minim.” (Philippians 4:6, 7) Peace olsem wea stap lo heart savve helpem olketa for kasem hapi lo laef.—Matthew 5:3.

Hao nao mi savve developim spirituality?

• Lanem and obeyim olketa komand blo God. Iu savve duim olsem taem iu readim Bible wea garem tingting blo God, wea olketa man wea “holy spirit leadim olketa” nao olketa raetem. (2 Peter 1:21) Wat iu lanem bae helpem iu for worshipim God “followim holy spirit and followim truth,” wea holy spirit nao bae leadim iu and bae iu duim wat God hem laekem.—John 4:24.

• Prea for help blo God. (Luke 11:13) God bae helpem iu for showim olketa quality blo wanfala spiritual person. (Galatians 5:22, 23) And tu, hem savve givim iu wisdom for deal witim olketa challenges lo laef.—James 1:5.

• Associate witim spiritual pipol. Olketa bae encouragem iu for buildim spirituality blo iu. (Romans 1:11, 12) Bat, if iu associate witim pipol wea tingting blo olketa hem conflict witim tingting blo God bae olketa spoelem spirituality blo iu.—James 4:4.

Hao mi need for joinim religion mekem mi spiritual?

For joinim wanfala religion hem no mekem man hem spiritual. Bible sei: “Sapos eniwan tingse hem man for lotu, bat hem no kontrolem tongue blo hem, hem laea lo hemseleva and worship blo hem iusles nomoa.”—James 1:26, footnote.

Nomata olsem, Bible showim dat spiritual pipol worshipim God lo wei wea hem appruvim. Olketa luksavve “wanfala spirit” nomoa stap, hem nao holy spirit blo God. Datfala spirit muvim olketa for worshipim God olsem “wanfala body nomoa,” wanfala grup wea organize wea traem best for maintainim ‘wan mind wea holy spirit helpem olketa for garem mekem olketa stap gud tugeta.’—Ephesians 4:1-4.

Tingting wea no stret abaotem spirituality

Tingting wea no stret: Evri samting wea God creatim olketa spiritual.

Tru samting: Evri samting wea God creatim givim honor lo hem. (Psalm 145:10; Romans 1:20) Bat, olketa man nomoa savve developim spirituality. Olketa animal difren, olketa duim nomoa wat olketa born kam for duim, and olketa no savve fren witim God. Wat olketa duim hem followim nomoa wat body blo olketa laekem. (2 Peter 2:12) Dastawe, Bible showim dat spiritual man hem difren from man wea tingting and behavior blo hem olsem olketa animal.—James 3:15; Jude 19.