Hao, Bible Predictim Tingting and Wei blo Pipol Distaem?

Ansa from Bible

Yes, Bible profesi abaotem tingting and wei blo pipol distaem bae change for worse. Bible showim dat disfala change bae mekem pipol evriwea rejectim olketa gudfala wei, and olketa standard wea helpem pipol for stap gud tugeta bae nomoa nao.a (2 Timothy 3:1-5) Bat Bible profesi tu dat samfala pipol bae no garem olketa nogud wei hia. And from God helpem olketa, bae olketa lane for garem tingting and olketa wei wea followim will blo hem.—Isaiah 2:2, 3.

Lo disfala article

Wat nao Bible profesi talem abaotem tingting and wei blo pipol distaem?

Bible sei dat pipol evriwea bae garem olketa nogud quality and duim olketa nogud tings, and rut blo datwan hem bikos olketa selfish. Pipol bae “no garem wei for kontrolem seleva,” “tingim olketa seleva nomoa” and “laek tumas for duim samting wea olketa seleva laekem instead for lovem God.”—2 Timothy 3:2-4.

Olsem profesi hia talem, evritaem pipol lo taem blo iumi tingim olketa seleva nomoa, focus lo wat bae benefitim olketa, wat bae mekem olketa feel gud, and wat olketa tingse bae mekem laef blo olketa garem mining, and samfala samting moa. From staka pipol garem olketa wei hia, datwan mekem samfala grup for kolem olketa lo Mista Mi Genereson and diskaen attitude hem just worse go moa. Staka pipol barava interest nomoa lo wat olketa seleva laekem so olketa “heitim gud samting,” wea datwan mekem olketa no laek garem gud qualities. From olketa “no savve tinghae,” datwan mekem olketa for no appreciatim wat olketa garem or wat others duim for olketa.—2 Timothy 3:2, 3.

Wei for selfish hem kosim tu olketa nara attitude wea Bible profesi abaotem olsem saen wea bae happen lo taem blo iumi:

Greedy. Staka pipol “laekem tumas selen.” Olketa bilivim dat selen and material tings wea olketa garem, hem showim laef blo olketa hem successful.—2 Timothy 3:2.
Praod. Staka pipol “tokplas, mekhae lo olketa seleva,” and “praod.” (2 Timothy 3:2, 4) Kaen pipol olsem tok praod and haem olketa seleva abaotem ability, qualities, and riches blo olketa.
Slander. Wei for “tok spoelem God and pipol” and “laea for spoelem nem blo narawan,” hem samting wea happen evriwea. (2 Timothy 3:2, 3) Pipol wea garem kaen wei olsem, olketa talem nogud toktok for spoelem reputation blo others or God, or olketa laea abaotem others or God.
Stubborn. Staka pipol olketa “no loyal,” “no willing for agree,” “betrayim fren blo olketa,” and “bighed.” (2 Timothy 3:2-4) Olketa showim olketa quality hia taem olketa refuse for herem tingting blo narawan, for faendem solution lo problem, or no willing for keepim agreement wea olketa bin mekem.
Violent. Distaem staka pipol “raf,” olketa kwiktaem for kros, wea staka taem datwan lead go lo wei for cruel lo others or killim man dae.—2 Timothy 3:3.
Brekem law. Jesus profesi dat during lo taem blo iumi, “pipol wea brekem law [bae] kamap staka.” (Matthew 24:12) And hem talem tu dat lo evri ples bae “evri samting hem olobaot,” or “raeot” bae happen.—Luke 21:9, footnote.
No showim love insaed lo famili. From staka young wan “disobeyim parents” blo olketa and famili “no garem love” for each other, datwan mekem wei for neglectim, abusim, and violent lo olketa famili member blo olketa hem kamap worse.—2 Timothy 3:2, 3.
Hypocrite saed lo worship. Staka pipol “act olsem olketa worshipim God,” bat wei blo olketa hem barava difren from wat Bible storyim. (2 Timothy 3:5) Olketa no followim wat God laekem, bat olketa followim nomoa wat olketa bigman lo religion talem, wea hem nao wat olketa laek for herem.—2 Timothy 4:3, 4.

Hao nao wei blo pipol for selfish hem affectim others?

From staka pipol selfish tumas, staka pipol safa from mentol and emotional health problem winim enitaem bifor. (Ecclesiastes 7:7) For example, samfala wea laekem tumas selen tek advantage lo others. Pipol wea no garem love insaed lo famili, maet abusim olketa famili member, wea datwan savve mekem olketa famili member hia for stress or laek for suisaed. And pipol wea betrayim or no loyal lo others, savve mekem olketa victim hia for kasem emotional pain wea savve stap for longtaem.

Wat nao mekem wei blo pipol for change for worse?

Bible explainim reason why wei blo pipol hem barava change:

Trufala love for God and others hem decrease. (Matthew 24:12) Result blo datwan, wei for selfish hem increase.
Olketa torowem Satan, datfala Devil from heven kam daon lo earth. (Revelation 12:9, 12) Since datfala taem, Satan garem moa influence lo pipol lo world wea datwan mekem wicked and selfish wei for increase.—1 John 5:19.

Wat nao iumi shud duim nomata wei blo pipol hem worse?

Word blo God sei: “Stay awe from kaen pipol olsem.” (2 Timothy 3:5, Easy-to-Read Version) Diswan no minim dat iumi shud isolatem iumiseleva from evri narawan. Bat, iumi shud no fren klos witim pipol wea selfish, and wea no obeyim God lo laef blo olketa.—James 4:4.

Hao, wei blo evriwan nao bae kamap worse?

Nomoa. Bible sei dat samfala pipol bae “sorre and feel nogud lo evri rabis samting wea pipol duim.” (Ezekiel 9:4) Olketa bae rejectim wei for selfish and applyim olketa standard blo God lo laef blo olketa. Toktok and wei blo olketa bae barava difren from pipol wea no worshipim God. (Malachi 3:16, 18) For example, olketa bae traem best for keepim peace witim evri pipol, and no joinim war and duim violence.—Micah 4:3.

Hao, bae world worse gogo evriting olobaot and fulap lo violence?

Nomoa. World bae no worse gogo evriting olobaot and fulap lo violence. Bat, klosap nao God bae finisim pipol wea min for againstim olketa standard blo hem. (Psalm 37:38) Hem bae establishim “wanfala niu earth,” wea hem minim pipol wea followim olketa standard blo God nomoa bae stap lo earth. Olketa hia hambol and bae stap lo peace for olowe. (2 Peter 3:13; Psalm 37:11, 29) Disfala hope hem no wanfala dream nomoa. Nomata distaem, Bible gohed helpem pipol for changem laef blo olketa mekem olketa live followim olketa raeteous wei blo God.—Ephesians 4:23, 24.

a Bible profesi and olketa tings wea gohed for happen lo world distaem pruvim dat iumi stap “lo olketa last day,” wea evriting bae hem “hard tumas” and “no sef.” (2 Timothy 3:1; King James Version) For samfala information moa, lukim article “Wat Nao Saen blo ‘Olketa Last Day’ or ‘Taem blo End’?”