Wat Nao Bible Talem Abaotem Nuclear War?

Nuclear war savve happen enitaem and distroem disfala world bikos olketa world paoa continue for keepim and increasim olketa nuclear weapon wea olketa garem. Dastawe pipol concern dat taem namba blo olketa nuclear weapon hem increase, hae risk hem stap for wanfala nuclear war savve happen. Pipol even wari dat if eni kantri iusim wanfala smol nuclear weapon nomoa, datwan bae startim wanfala nuclear war wea bae distroem earth blo iumi. Datfala Bulletin of the Atomic Scientists hem talem dat iumi live witim “risk blo nuclear war wea savve start enitaem.”

Hao, hem possible dat wanfala nuclear war savve happen? If olsem, hao, bae planet blo iumi hem survive? And hao nao iumi savve cope witim anxiety dat wanfala nuclear war maet hem savve happen? Wat nao Bible talem abaotem diswan?

Lo disfala article

Hao, Bible predictim nuclear war bae happen?

Bible no mentionim eniting abaotem nuclear war. Bat, risk blo nuclear war hem result blo olketa attitude and events wea Bible profesi abaotem.

Lukim wat olketa Bible verse hia talem and comparem witim world events distaem:

Bible verse: Olketa disaepol blo Jesus askem hem: “Wat nao saen wea bae showim iu stap and world hem gogo for finis?” Jesus sei: “Pipol lo wanfala kantri bae faetem pipol lo nara kantri and kingdom againstim nara kingdom.”—Matthew 24:3, 7.

World events: Olketa kantri, includim olketa wea garem or savve wakem nuclear weapon, staka taem olketa nao iusim olketa weapon for faetem nara kantri.

“World hem kamap moa violent lo recent years: namba blo olketa conflict hem increase.”—The Armed Conflict Location & Event Data Project.

Bible verse: “Lo taem blo end, [king blo north] and king blo south bae gohed pushim each other.”—Daniel 11:40.

World events: Olsem Bible profesi talem, olketa nation and allies blo olketa gohed for pushim, or compete for paoa. Olketa biggest nuclear paoa distaem olketa no faetem each other, bat olketa continue for mekem olketa nuclear weapon blo olketa for hem moa paoaful.

“Iumi lukim lo tenfala year wea go past, namba blo olketa kantri wea garem conflict hem increase, includim olketa conflict wea tufala world paoa sapotim tufala saed wea faet.”—The Uppsala Conflict Data Program.

Bible verse: “Lo olketa last day bae hem barava difren and bae evri samting hem hard tumas. Pipol bae . . . no willing for agree, laea for spoelem nem blo narawan, no garem wei for kontrolem seleva, raf, heitim gud samting.”—2 Timothy 3:1-3.

World events: Semsem olsem hao staka pipol distaem disagree witim each other, olketa world leader tu disagree staka taem. And instead for olketa setolem olketa disagreement lo peaceful wei, olketa iusim threats or force for trae stretem datwan. Wat olketa duim hem increasim risk for startim nuclear war.

“If olketa no faendem eni gud wei for cooperate tugeta, bae olketa conflict hem kamap moa worse.”—S. Saran and J. Harman, World Economic Forum.

Hao, God bae allowim wanfala nuclear war for happen?

Bible no storyim datwan. Bat hem storyim dat “olketa samting wea mekem [pipol] barava fraet,” bae happen lo taem blo iumi. (Luke 21:11) Wanfala example blo datwan, hem taem olketa dropim atomic bomb during lo Second World War. Bible explainim why God allowim olketa war for happen. For lanem moa samting, watchim video Why Nao God Letem Wei for Safa Hem Gohed?

Hao, bae planet Earth survive?

Yes. Even if olketa man iusim again olketa nuclear weapon, God bae no allowim datfala situation for kamap worse go kasem taem wea full earth hem distroe. Bible sei planet blo iumi bae no distroe, and hem sei tu dat olketa human bae laef olowe lo disfala earth.

“Earth hem stap for olowe.”—Ecclesiastes 1:4.

“God, datfala Man wea formimap earth, . . . wea creatim earth no for stap nating, bat hem wakem for pipol stap lo hem.”—Isaiah 45:18.

Samfala pipol imaginim dat lo future, few pipol wea stap lo earth bae stragol for survive bikos earth hem kamap wasteland from result blo nuclear war. Bat, Bible talem dat eni damage wea war kosim lo earth, God bae completely fixim datwan.

“Wilderness and land wea drae bae hapi, and flat desert bae hapi fogud and fulap lo olketa saffron flaoa.”—Isaiah 35:1.

Pipol waka tugeta and enjoyim laef lo paradaes earth. — God laekem iumi for enjoyim laef lo earth wea hem beautiful

Creator blo iumi hem designim disfala earth witim amazing ability for healim hemseleva. And iumi savve tu dat God bae iusim paoa blo hem for restorem disfala earth. Earth bae kamap beautiful hom blo olketa human for olowe.—Psalm 37:11, 29; Revelation 21:5.

Hao nao iu savve cope witim “nuclear anxiety”?

Samfala maet safa from wat pipol kolem lo “nuclear anxiety,” wea minim “fear dat wanfala nuclear war bae happen and olketa consequences blo hem.” Olketa promis and advaes lo Bible savve helpem eniwan wea garem kaen fear olsem for cope and for daonem wari blo hem. Hao nao datwan savve helpem iu?

Bible storyim wanfala braet future for disfala earth and for olketa wea live lo hem. Taem iu lane abaotem disfala hope, hem olsem ‘wanfala anka for laef blo iu,’ and hem savve helpem iu for no wari tumas. (Hebrews 6:19) And nara samting wea savve daonem wari hem for tek wanday at a taem, and no wari tumas abaotem wat nao maet happen lo future. Olsem Jesus sei: “Each day garem own problem blo hem.”—Matthew 6:34.

Important samting nao, hem for iumi evriwan lukaftarem gud mental and emotional health blo iumi. Iumi savve duim datwan taem iumi avoidim unnecessary information, discussion, prediction, and opinion blo pipol abaotem olketa latest nuclear developments, bikos datwan savve kosim wei for wari tumas. Diswan no minim dat iumi chus for ignorem reality. Bat, iumi duim wat iumi fit for duim for mekem iumi no tingim olowe olketa events wea iumi no garem eni kontrol lo hem, and wea maet hem never happen.

“Wari wea insaed lo heart blo man mekem hem for feel daon, bat gudfala toktok mekem hem for hapi.”—Proverbs 12:25.

If iu focus lo olketa positive tings lo laef blo iu, bae iu no garem taem for ting abaotem olketa bad nius.

“Mi prea for God wea givim hope hem mekem hapi and peace blo iufala hem complete bikos iufala trustim hem.”—Romans 15:13.

Olketa piksa: Wanfala man luk go lo future witim confidence. 1. Lo bihaen, olketa tings wea olketa iusim lo war, includim wanfala military aircraft, nuclear missiles, and wanfala mushroom cloud. 2. Lo front, hem wanfala klin and peaceful earth witim olketa maunten, green valleys, wanfala river wea flow, and olketa bird. — Bible storyim wanfala gud future wea iumi fit for trustim

Taem iu lanem moa samting abaotem olketa promis blo God, hem savve mekem iu garem hope, hapi, and peace lo mind.

Hao, Bible profesi dat Armageddon hem wanfala nuclear war?

Samfala tingse Armageddon hem wanfala nuclear war wea bae happen lo full world. Datwan mekem olketa for imaginim olketa barava nogud consequences if samting olsem hem happen.

Bat taem Bible iusim datfala word “Armageddon,” hem story abaotem wanfala war wea bae kamap between “olketa king evriwea lo earth,” wea hem nao olketa human gavman, and God.a (Revelation 16:14, 16) Armageddon hem no semsem witim wanfala nuclear war wea savve distroem evriting lo world. Bat lo Armageddon, God bae distroem only olketa wicked pipol, wea datwan bae mekem tru peace and security hem possible.—Psalm 37:9, 10; Isaiah 32:17, 18; Matthew 6:10.

Wat nao Bible sei bae happen lo war?

“Hem finisim olketa war lo evri ples lo earth. Hem brekem olketa bow and pisisim olketa spia. Hem bonem olketa wagon for faet lo fire.”—Psalm 46:9.

Jehovahb God bae showim paoa blo hem for finisim conflicts between olketa kantri and bae hem distroem tu olketa weapon wea olketa iusim lo war. For duim diswan, bae hem iusim Kingdom blo hem, wea hem wanfala gavman wea stap lo heven, wea bae hem rul ovarem evriting lo full earth.—Daniel 2:44.

Kingdom blo God bae hem teachim evriwan hao for live lo peace and lo harmony. Bikos only wanfala gavman nomoa bae rul ovarem full earth, bae no eni disagreement kamap between olketa gavman. Lo datfala taem, pipol bae no enitaem lanem moa hao for faet! (Micah 4:1-3) Wat nao result? “Evriwan bae live lo peace lo own vineyard and fig-tree blo hem, and no eniwan bae mekem hem fraet.”—Micah 4:4, Today’s English Version.

a Lukim article “Wat Nao War blo Armageddon?”

b Jehovah hem nem blo God. (Psalm 83:18) Lukim article “Hu Nao Jehovah?”

Hao, Bible buk Revelation hem story abaotem nuclear war?

Samfala tingse dat Bible buk Revelation hem story abaotem destruction wea wanfala nuclear war bae kosim. (Revelation 6:14; 8:7-12; 16:1-21) For example, hem storyim dat “hem mekem tu fire from skae kam daon lo earth.” (Revelation 13:11-13) Olketa Jehovah’s Witness bilivim dat diswan hem no minim wanfala nuclear war wea bae happen lo full world, bat hem story abaotem olketa atomic bomb wea olketa iusim during lo Second World War.

Nomata Bible buk Revelation hem storyim olketa nuclear events hia, hem no duim datwan for describem olketa detail for mekem man fraet. Taem iu readim Bible buk Revelation, rememberim diswan:

Disfala buk storyim staka saen, or olketa symbol, wea hem no representim olketa literal samting.—Revelation 1:1.
Disfala buk hem no for mekem man wea readim for fraet. Bat, message blo hem bae mekem man wea understandim and applyim for hapi.—Revelation 1:3.

For moa information, lukim article “The Book of Revelation—What Does It Mean?”