Hao Nao Wanfala Christian Shud Live?—Wat Nao Bible Talem?

Distaem staka pipol evriwea lo world praod for sei olketa Christian; bat olketa samting wea olketa duim hem hurtim others. Samfala olketa selfish, no honest, or unkind. Others maet no faithful lo marit partner blo olketa. Behavior blo olketa mekem samfala pipol for wonder: ‘Hao nao wanfala Christian shud live?’

Hao wanfala Christian shud live

Hem isi for samwan sei hem wanfala Christian. Bat staka samting nao insaed lo datwan. According lo Bible, wanfala Christian hem samwan wea hem disaepol blo Jesus Christ. (Acts 11:26) Jesus seleva sei: “Sapos iufala followim teaching blo mi, iufala nao olketa tru disaepol blo mi.” (John 8:31) Hem tru, no eniwan savve obeyim olketa toktok blo Jesus perfectly. Bat wanfala Christian bae traem best for applyim olketa teaching blo Jesus and showim diswan lo laef blo hem each day. Tingim samfala example.

Olketa Christian lovem others

Wat Jesus sei: “Mi givim wanfala niu komandment lo iufala. Iufala mas lovem iufala evriwan. Mi lovem iufala, and iufala tu mas lovem iufala evriwan lo sem wei. Sapos iufala lovem iufala evriwan, pipol bae savve iufala olketa disaepol blo mi.”—John 13:34, 35.

Wat Jesus duim: Jesus lovem evriwan nomata wat nao social status or baekgraon blo olketa. Hem healim olketa wea sik, feedim olketa wea hangere, and even givim laef blo hem for others.—Matthew 14:14-21; 20:28.

Wat olketa Christian shud duim: Hao olketa Christian lovem others hem showaot lo wei for generous, no fevarem eniwan, and forgivim others. Olketa helpem pipol wea in need, and olketa willing for mekem olketa sakrifaes for others.—1 John 3:16.

Olketa Christian honest

Wat Jesus sei: “Mi nao. . . truth.”—John 14:6.

Wat Jesus duim: Jesus hem honest lo evriting wea hem talem and duim. Hem never trikim others or talem samting for misleadim pipol. Hem well known for honesty blo hem, nomata datwan mekem pipol for againstim hem.—Matthew 22:16; 26:63-67.

Wat olketa Christian shud duim: Olketa Christian no laea. Olketa peim tax, no steal, and honest lo boss blo olketa. (Romans 13:5-7; Ephesians 4:28) Olketa no ravem others, olketa no cheat lo exam, or no putim false information lo résumés or similar documents.—Hebrews 13:18.

Olketa Christian kaen lo others

Wat Jesus sei: “Kam lo mi, iufala wea waka hard and wea karem hevi samting, and bae mi strongim iufala. Iufala karem yoke witim mi and lane from mi, bikos mi no savve raf and mi hambol, and iufala bae kasem strong from datwan. Bikos yoke blo mi hem isi nomoa, and load wea mi askem iufala for karem hem no hevi.”—Matthew 11:28-30.

Wat Jesus duim: Jesus hem approachable and kaen. Olketa pikinini no fraetem hem, hem comfortim olketa wea sorre, and hem dignifyim others.—Mark 10:13-15; Luke 9:11.

Wat olketa Christian shud duim: Olketa Christian story kaen lo others; olketa no rude or no abusim others. (Ephesians 4:29, 31, 32) Olketa kea abaotem others and luk for opportunities for help.—Galatians 6:10.

Olketa Christian stay faithful lo marit partner blo olketa

Wat Jesus sei: “Samting wea God joinim tugeta, no eni man mas aotem.”—Mark 10:9.

Wat Jesus duim: Nomata Jesus hem no marit, hem encouragem olketa wea marit for faithful lo each other. (Matthew 19:9) Hem talem warning abaotem wat samwan maet duim wea savve brekem marit.—Matthew 5:28.

Wat olketa Christian shud duim: Olketa Christian avoidim olketa conduct wea no respectim marit. (Hebrews 13:4) Olketa wea marit treatim each other witim love and respect.—Ephesians 5:28, 33.