Gohed Garem Tingting and Wei Bilong Christ
“Letem [God] nao helpem iufala evriwan for garem tingting olsem Christ Jesus and for followim olketa wei bilong hem.”—ROM. 15:5.
1. Why nao iumi mas garem tingting and wei bilong Christ?
JESUS CHRIST hem sei: “Kam long mi.” “Lane from mi, bikos mi no savve raf and mi hambol. Wei for duim olsem bae strongim iufala.” (Matt. 11:28, 29) Kaenfala samting wea Jesus talem showimaot tingting and wei bilong hem. Hem nao showimaot nambawan wei for iumi followim. Nomata Jesus hem Son bilong God and hem garem bigfala paoa, hem kaen long pipol and tingim olketa. Pipol wea safa nao hem barava kaen long olketa.
2. Wanem nao faevfala wei bilong Jesus wea iumi bae storyim?
2 Long disfala study witim tufala study bihaen, bae iumi storyim wanem nao iumi savve duim for garem “tingting bilong Christ” and for gohed garem datwan. (1 Cor. 2:16) Bae iumi storyim faevfala samting. Jesus hem hambol and no raf, hem kaen, hem obeyim God, hem no fraet, and hem showimaot love evritaem.
Lane From Wei wea Christ No Raf
3. (a) Wanem nao Jesus duim for lanem olketa disaepol for hambol? (b) Hao nao tingting bilong Jesus taem hem lukim wik point bilong olketa disaepol?
3 Jesus hem perfect Son bilong God and hem hapi for kam long earth for waka for helpem pipol wea sin nomata samfala pipol hia bae killim hem dae. Jesus hapi evritaem and wanem hem duim showimaot hem kontrolem hemseleva. (1 Pet. 2:21-23) Taem iumi “lukluk gud” long wei bilong Jesus datwan savve helpem iumi tu for hapi and kontrolem iumiseleva taem narawan duim samting wea mekem iumi feel nogud. (Heb. 12:2) Jesus askem olketa disaepol for waka witim hem and lane from hem. (Matt. 11:29) Wanem nao olketa savve lanem? Wanfala samting nao, Jesus hem no raf bat hem isi witim olketa disaepol bilong hem nomata olketa garem wik point. Long naet bifor Jesus hem dae, hem wasim leg bilong olketa disaepol. Taem hem duim datwan, hem lanem olketa for “hambol.” Olketa bae nating forgetim samting wea hem duim. (Readim John 13:14-17.) Taem Peter, James, and John no “gohed for lukaot,” Jesus luksavve olketa man nomoa and garem wik point. Hem sei long Peter: “Waswe Simon, iu sleep?” “Iufala mas gohed for lukaot and prea, mekem iufala no foldaon long eni samting wea traem iufala. Bat mi savve, nomata man savve laekem tumas for duim samting, maet body bilong hem no strong for duim wanem hem laekem.”—Mark 14:32-38.
4, 5. Hao nao wei bilong Jesus savve helpem iumi taem iumi lukim wik point bilong narawan?
4 Hao nao tingting bilong iumi sapos wanfala brata or sista garem wei for laek winim narawan, savve kwiktaem feel nogud, or no kwiktaem followim kaonsel from olketa elder or from “datfala wakaman wea faithful and wise”? (Matt. 24:45-47) Taem iumi lukim wik point bilong pipol long world, iumi no savve wari tumas bikos hem wei bilong olketa. Bat taem iumi lukim wik point bilong olketa brata and sista, maet hem no isi for iumi forgivim olketa. Sapos iumi kwiktaem feel nogud long wik point bilong narawan, iumi mas tingim diswan, ‘Wanem moa mi savve duim mekem mi garem “tingting bilong Christ”?’ No forgetim hao Jesus no feel nogud long olketa disaepol bilong hem nomata olketa no barava followim ‘tingting bilong hem.’
5 Tingim aposol Peter. Taem Jesus talem hem for lusim boat and wakabaot antap long wata, Peter wakabaot antap long wata for lelebet taem. Bat taem Peter lukim strongfala wind, hem start for sink daon nao. Waswe, Jesus kros long hem and sei: “Iu feelim! Hem nao ia!”? Jesus nating talem datwan! “Semtaem nomoa, Jesus holem hem and sei: ‘Faith bilong iu hem smol tumas, hao nao iu garem daot olsem?’” (Matt. 14:28-31) Waswe, iumi savve helpem brata or sista wea faith bilong hem no mas strong olsem Jesus helpem Peter? From Jesus no kros long Peter, iumi savve lanem gudfala samting from datwan.
6. Wanem nao Jesus teachim olketa aposol bilong hem taem olketa raoa abaotem hu nao important?
6 Peter hem raoa tu witim olketa nara aposol abaotem hu long olketa nao hem important. James and John laek sidaon long raet saed and left saed bilong Jesus taem hem rul long Kingdom. Taem Peter and olketa nara aposol herem diswan, olketa kros tumas. Jesus luksavve olketa garem tingting olsem bikos olketa big kam witim pipol wea garem diskaen tingting. Jesus kolem olketa kam long hem, and sei: “Iufala savve hao olketa wea rulim olketa kantri garem bigfala paoa ovarem pipol, and olketa bigman bilong olketa barava bossim olketa. Iufala mas no olsem. Sapos eniwan long iufala laek for bigman, hem mas kamap man for helpem iufala. And eniwan long iufala wea laek for leader mas kamap wakaman bilong iufala.” Then Jesus storyim hemseleva olsem: “Nomata Son bilong man tu bat no kam for olketa narawan mas waka for helpem hem. Hem kam for hem savve waka for helpem olketa, and for givim laef bilong hem, wea datwan hem price for sevem pipol.”—Matt. 20:20-28.
7. Wanem nao iumi wanwan savve duim for mekem kongregeson garem wan mind?
7 Taem iumi tingim wei wea Jesus hem hambol, datwan savve helpem iumi tu for “hambol” taem iumi stap witim olketa brata. (Luke 9:46-48) Sapos iumi hambol, datwan savve mekem iumi for wan mind. Dadi bilong iumi Jehovah laekem olketa pikinini bilong hem for “wan mind” and stap gud tugeta. (Ps. 133:1) Jesus prea long Dadi bilong hem for olketa tru Christian garem wan mind. Hem sei: “Diswan bae mekem pipol long world savve iu nao sendem mi kam and iu lovem olketa and iu lovem mi tu.” (John 17:23) Taem iumi wan mind, pipol bae luksavve iumi olketa disaepol bilong Christ. Sapos iumi laek garem wan mind, iumi mas garem tingting bilong Christ abaotem wik point bilong narawan. Jesus forgivim pipol, and hem sei God bae forgivim iumi nomoa sapos iumi forgivim nara man.—Readim Matthew 6:14, 15.
8. Wanem nao iumi savve lanem from olketa wea worshipim God for staka year finis?
8 Iumi savve lanem staka samting tu from olketa brata and sista wea followim wei bilong Jesus for staka year finis. Taem olketa lukim wik point bilong narawan, plande taem olketa luksavve wanem nao mekem olketa olsem and no kwiktaem feel nogud. Olketa luksavve sapos iumi tingim pipol olsem Christ, iumi bae “helpem olketa wea no strong for no givap long olketa samting wea traem olketa” and kongregeson tu bae wan mind. Diswan bae strongim tu evriwan long kongregeson for garem tingting and wei bilong Christ. Olketa brata and sista hia laekem evriwan for garem tingting wea aposol Paul laekem olketa Christian long Rome for garem. Hem sei: “God hem savve strongim iufala and helpem iufala for no givap. Letem hem nao helpem iufala evriwan for garem tingting olsem Christ Jesus and for followim olketa wei bilong hem, mekem iufala wan mind and praisem God and Dadi bilong Lord bilong iumi, Jesus Christ.” (Rom. 15:1, 5, 6) Tru tumas, taem iumi wan mind for worshipim Jehovah, datwan praisem hem.
9. Sapos iumi laek followim wei bilong Jesus, why nao iumi needim holy spirit?
9 Jesus hem sei man wea “hambol” hem no raf tu. Holy spirit bilong God nao savve mekem man for no raf. Dastawe taem iumi lanem wei bilong Jesus, iumi needim holy spirit bilong Jehovah for mekem iumi savve followim gud olketa wei bilong Jesus. Iumi mas askem God for holy spirit bilong hem and waka hard for garem olketa gudfala wei bilong spirit, olsem “love, hapi, peace, no givap kwiktaem, kaen long narawan, duim gudfala samting, garem faith, no raf, and kontrolem seleva.” (Gal. 5:22, 23) Taem iumi followim wei bilong Jesus for hambol and no raf, Jehovah bae hapi long iumi.
Jesus Kaen Long Pipol
10. Wanem nao Jesus duim wea showimaot hem kaen?
10 Holy spirit mekem man for kaen tu long narawan. Evritaem Jesus kaen long pipol. Hem “hapi for lukim” evriwan wea kam long hem. (Readim Luke 9:11.) Wanem nao iumi savve lanem from wei wea Jesus hem kaen? Man wea kaen hem fren gud witim narawan, hem no raf, and hem tingim pipol. Hem nao wei bilong Jesus. Hem sorre long pipol “bikos olketa garekil and stap olobaot olsem olketa sheepsheep wea no garem eni man for lukaftarem olketa.”—Matt. 9:35, 36.
11, 12. (a) Storyim samting wea Jesus duim wea showimaot hem tingim man. (b) Wanem nao iu savve lanem from diswan?
11 Jesus sorre long pipol and tingim olketa and hem duim samting tu for helpem olketa. Tingim wanfala samting wea hem duim. Wanfala woman garem sik wea blood hem ran olowe for 12-fala year. From hem garem sik olsem, hem savve hao long Law bilong Moses hem no klin and hem no savve hipap witim olketa narawan for worshipim God. Eniwan wea tasim hem bae no klin tu. (Lev. 15:25-27) Nomata olsem, from hem luksavve Jesus hem kaen long pipol, hem savve Jesus garem paoa for healim hem and bae hem laek mekem hem gud bak moa. Woman hia toktok olsem long hemseleva: “Sapos mi tasim nomoa kaleko bilong hem bae mi gud bak nao.” Woman hia no fraet and hem tasim Jesus nao. Then nomoa hem feelim datfala nogud sik hem finis from hem nao.
12 Jesus savve samwan tasim hem, and hem lukluk raon for lukim hu nao tasim hem. Woman hia fraet fogud bikos hem savve hem duim samting wea brekem Law, so hem baodaon long Jesus and talem evri samting long hem. Waswe, Jesus tok strong long disfala woman wea safa for longfala taem? Nating nomoa! Jesus tok kaen olsem long hem: “Dota bilong mi, faith bilong iu mekem iu gud bak. Iu go and no wari moa.” (Mark 5:25-34) Woman hia mas barava feel gud taem hem herem kaenfala toktok olsem!
13. (a) Long wanem wei nao Jesus difren from olketa Pharisee? (b) Hao nao tingting bilong Jesus abaotem olketa pikinini?
13 Christ hem no olsem olketa Pharisee wea barava no tingim pipol. Nomata hem Son bilong God, no enitaem hem putim hevi long narawan. (Matt. 23:4) Bat taem hem teachim pipol abaotem olketa wei bilong Jehovah, hem kaen long olketa and hem isi witim olketa. Jesus fren gud witim olketa wea followim hem. Evritaem hem lovem olketa and kaen long olketa. (Prov. 17:17; John 15:11-15) Olketa pikinini tu no fraetem hem and hem tu hapi for story witim olketa. Nomata hem busy, hem hapi for iusim taem bilong hem for stap witim olketa. Wantaem olketa disaepol bilong hem trae for stopem pipol for no tekem kam olketa smol pikinini long Jesus for hem savve tasim olketa. Olketa disaepol duim diswan bikos olketa garem yet tingting bilong olketa bigman bilong religion abaotem hu nao important. Jesus feel nogud long olketa disaepol bilong hem and hem sei long olketa: “Letem olketa smol pikinini for kam long mi. No stopem olketa bikos kingdom bilong God hem bilong olketa wea olsem olketa pikinini hia.” From hem laek lanem wanfala important samting long olketa disaepol, hem holem olketa pikinini and sei: “Mi talem iufala tru samting, Eniwan wea no acceptim kingdom bilong God long sem wei wea wanfala smol pikinini savve acceptim samting, bae no go insaed long datfala kingdom.”—Mark 10:13-15.
14. Wanem gud samting nao pikinini kasem taem olketa long kongregeson tingim olketa?
14 Tingim olketa pikinini hia. Taem olketa big, bae olketa tingim yet wanem Jesus duim taem hem ‘holem olketa and blessim olketa.’ (Mark 10:16) Olketa pikinini distaem tu bae olsem. Taem olketa big, olketa bae no forgetim wanem olketa elder and narawan duim for showimaot olketa tingim olketa. Important samting nao, olketa pikinini hia bae luksavve from taem olketa smol, holy spirit bilong Jehovah stap witim pipol bilong hem.
Iumi Mas Kaen Nomata Pipol Long World No Kaen
15. Why nao iumi savve samfala pipol bae no kaen long iumi?
15 Staka pipol distaem sei olketa no garem taem for duim kaenfala samting long narawan. Dastawe taem pipol bilong Jehovah go long skul, waka, go long olketa nara ples, or duim ministry, samfala pipol no savve kaen long olketa. Maet iumi feel nogud taem pipol no kaen long iumi, bat iumi mas savve pipol bae olsem long iumi. Paul talem hao long olketa “last day,” olketa tru Christian bae meetim pipol wea “lovem olketa seleva, . . . [and] no garem love wea olketa long famili shud garem.”—2 Tim. 3:1-3.
16. Wanem nao iumi savve duim for followim wei bilong Christ for kaen long olketa long kongregeson?
16 Kongregeson bilong olketa tru Christian barava difren from pipol long world wea no kaen. Iumi evriwan savve followim wei bilong Jesus and duim samting for mekem kongregeson hem naesfala ples. Wanem nao iumi savve duim? From staka long kongregeson sik and kasem hard taem, iumi savve helpem and strongim olketa. Nomata olketa problem long “olketa last day” hem big tumas, olketa Christian bifor tu kasem semkaen samting. Iumi savve duim samting for helpem pipol olsem olketa Christian bifor tu duim. Paul strongim olketa Christian for “tok kaen long olketa wea wikdaon, helpem olketa wea no strong, and for no raf long eniwan.” (1 Thess. 5:14) Diswan minim iumi mas duim kaenfala samting long narawan olsem Christ.
17, 18. Wanem nao samfala samting wea iumi savve duim for kaen olsem Jesus?
17 Iumi mas ‘kaen long olketa brata’ olsem hao Jesus bae kaen long olketa. Iumi mas tingim pipol wea iumi savve gud long olketa for staka year finis and pipol wea iumi no savve long olketa tu. (3 John 5-8) Jesus nao firstaem duim samting wea showimaot hem tingim narawan, dastawe iumi tu mas duim samting for tingim narawan and evritaem strongim olketa.—Isa. 32:2; Matt. 11:28-30.
18 Iumi evriwan savve duim samting wea showimaot iumi tingim narawan and minim problem wea kasem olketa. Tingim olketa samting wea iu savve duim for helpem olketa and trae hard for duim datwan! Paul hem sei: “Iufala mas garem feeling for narawan and lovem narawan olsem brata. Iufala nao mas firstaem showimaot respect long nara man.” (Rom. 12:10) Datwan minim iumi mas followim wei bilong Jesus and kaen long pipol. Iumi mas trae hard for showimaot “trufala love.” (2 Cor. 6:6) Paul storyim love wea olketa Christian mas garem. Hem sei: “Love hem mekem man no kros kwiktaem and kaen long narawan. Love hem mekem man no jealous, no praod, and no bighed.” (1 Cor. 13:4) Iumi mas no feel nogud olowe long olketa brata and sista, bat hem gud tumas for iumi followim disfala kaonsel long Bible: “Iufala mas kaen long narawan and tingim feeling bilong pipol, and forgivim olketa olsem God tu hem forgivim iufala bikos long Christ.”—Eph. 4:32.
19. Taem iumi kaen, iumi bae kasem olketa wanem gud samting?
19 Taem iumi waka hard for duim kaenfala samting evritaem, iumi bae kasem olketa gud samting. Jehovah bae givim holy spirit long kongregeson and datwan bae helpem olketa for garem olketa gudfala wei. Nara samting tu, taem iumi followim wei bilong Jesus and helpem narawan for duim sem samting, iumi bae hapi and wan mind for worshipim God and hem tu bae hapi long iumi. So iumi mas evritaem waka hard for kaen long pipol and no raf olsem Jesus.
Waswe, Iu Savve Minim Kam?
• Wanem nao Jesus duim wea showimaot hem ‘hambol and no savve raf’?
• Wanem nao Jesus duim wea showimaot hem kaen?
• Wanem nao samfala samting wea iumi savve duim for showimaot iumi kaen and no raf olsem Christ?
[Piksa long page 8]
Sapos faith bilong wanfala brata hem no mas strong olsem Peter bifor, waswe, bae iu helpem hem?
[Piksa long page 10]
Wanem nao iu savve duim mekem kongregeson hem ples wea pipol kaen long narawan?