War lo Middle East​—Wat Nao Bible Talem?

Full world wari abaotem datfala conflict wea involvim United States, Israel, and Iran. Hao, datfala situation bae kamap worse and kamap war wea bae affectim staka kantri? Hao, olketa gavman savve stopem disaster olsem for happen and achievim lasting peace?

Pipol wea familiar witim Bible profesi maet wonder whether disfala conflict lo Middle East maet hem start blo war blo Armageddon wea buk blo Revelation storyim.

Wat nao Bible talem?

Hao, olketa gavman bae finisim war lo Middle East?

Bible hem sei: “No putim trust blo iu lo olketa leader or lo son blo man, wea no savve sevem man.”—Psalm 146:3.

Iumi no savve if olketa gavman able for mekem situation lo Middle East hem peaceful. Bat, Bible talem klia dat no eni politikol leader, human gavman, or grup blo pipol savve finisim war and mekem lasting peace kamap. Only God nomoa fit for “finisim olketa war lo evri ples lo earth.”—Psalm 46:9.

• For lanem moa samting, readim Wastaoa magasin wea title blo hem “Hao, Enitaem War Bae Finis?”

Hao, war lo Middle East fulfillim profesi?

Bible hem sei: “Iufala bae herem olketa war and herem nius abaotem war. . . . Pipol lo wanfala kantri bae faetem pipol lo nara kantri and kingdom againstim nara kingdom.”—Matthew 24:6, 7.

Current conflict lo Middle East hem nara event wea showim “world hem gogo for finis” and hem olketa evidence wea pruvim iumi stap lo “olketa last day.” (Matthew 24:3; 2 Timothy 3:1) Olketa war wea iumi lukim tuday hem showim dat klosap nao God bae duim samting for finisim war and olketa nara problem wea affectim olketa man.

• For lanem moa samting, readim article “What Is the Sign of ‘the Last Days,’ or ‘End Times’?”

Hao, Armageddon bae start lo Middle East?

Bible hem sei: “Olketa hipimap olketa king hia tugeta lo datfala ples wea lo Hebrew languis olketa kolem Armageddon.”—Revelation 16:16.

Datfala war Armageddon hem no war between olketa gavman blo man wea start lo Middle East. Hem war wea bae affectim full world and hem between evri gavman blo man and God.

• For lanem moa samting, readim article “Wat Nao War blo Armageddon?”

Wat nao savve helpem iumi for cope witim olketa taem olsem wea pipol wari tumas?

Bible hem sei: “No wari tumas abaotem eni samting, bat lo evriting wea iufala needim, barava askem God for datwan, and barava prea strong witim wei for talem thankiu.”—Philippians 4:6.

Jehovaha God invaetem iumi for prea lo hem. Bikos God hem kea for iumi, hem bae herem olketa prea blo iumi and helpem iumi cope witim olketa samting wea mekem iumi wari. (1 Peter 5:7) Wanfala wei hem duim datwan nao, hem helpem iumi understandim why war hem gohed, and tu, hao hem bae finisim war and wat hem bae duim for mekem iumi no kasem moa pain and safaring.—Revelation 21:3, 4.

• For lanem moa samting abaotem wat God provaedem for helpem iumi, readim article “You Can Find Words of Comfort in the Bible.”