Hao, God Bae Ansarem Olketa Prea blo Mi?
Ansa from Bible
Yes, hem bae duim. Bible and olketa real laef experience showim dat God ansarem olketa prea. Bible sei: “[God] givim lo olketa wea fraet lo hem wanem olketa laekem tumas, hem herem krae blo olketa for help, and hem rescuem olketa.” (Psalm 145:19) Bat whether God bae ansarem iu taem iu prea, iu need for samfala samting.
Wat God laekem olketa wea prea lo hem for mas duim
Iumi mas prea lo God, no lo Jesus, Mary, olketa saint, angel, or image. Only Jehovah God nomoa hem “Man wea herem olketa prea.”—Psalm 65:2.
Prea abaotem olketa samting wea followim will blo God, olketa samting wea hem hapi lo hem, wea Bible teachim.—1 John 5:14.
Prea thru lo nem blo Jesus, datwan showim iumi luksavve lo authority blo Jesus. Jesus sei, “Mi nomoa only wei for man go lo Dadi lo heven.”—John 14:6.
Garem faith taem iu prea, askem God for givim iu moa faith if iu needim.—Matthew 21:22; Luke 17:5.
Mas hambol and prea from heart. Bible sei: “Nomata Jehovah hem hae, hem luksavve lo man wea hambol.”—Psalm 138:6.
Gohed for prea. Jesus sei: “Gohed for ask, and iufala bae kasem.”—Luke 11:9.
Wat hem no important lo God
Race or nationality blo iu. “God hem no fevarem eniwan, bat lo evri nation, man wea fraet lo hem and duim samting wea stret bae God acceptim hem.”—Acts 10:34, 35.
Position or posture. Iu savve prea lo God taem iu sidaon, baodaon, nildaon, or standap.—1 Chronicles 17:16; Nehemiah 8:6; Daniel 6:10; Mark 11:25.
Whether prea big or silent. God ansarem even olketa silent prea wea no eniwan herem.—Nehemiah 2:1-6.
Whether wat iu concern abaotem hem big or smol. God encouragem iu for “torowem evri wari blo iufala go lo hem bikos hem kea for iufala.”—1 Peter 5:7.