Wanem Nao Bible Hem Talem?
Waswe, God hem herem evri prea?
LONG TINGTING BILONG IU, GOD HEREM PREA BILONG . . .
Evriwan
Samfala pipol nomoa
No eniwan
BIBLE HEM SEI
“Jehovah hem fren witim olketa wea prea long hem from heart bilong olketa.”—Psalm 145:18.
WANEM NAO OLKETA NARA SAMTING WEA IUMI SAVVE LANEM FROM BIBLE?
God no savve herem prea bilong pipol wea againstim hem. (Isaiah 1:15) Bat olketa savve fren witim hem sapos olketa changem wei bilong olketa.—Isaiah 1:18.
God savve herem prea bilong iumi sapos iumi duim samting followim wanem Bible talem.—1 John 5:14.
Waswe, iumi shud standap or nildaon taem iumi prea?
SAMFALA TINGSE olketa mas evritaem nildaon, baodaon, or putim hand tugeta taem olketa prea. Hao nao tingting bilong iu?
BIBLE HEM SEI
Nomata man hem “sidaon,” “standap,” “leidaon,” or “nildaon” God savve herem prea bilong hem. (1 Chronicles 17:16; 2 Chronicles 30:27; Ezra 10:1; Acts 9:40) So iumi savve duim eni samting long olketa samting hia taem iumi prea.
WANEM NAO OLKETA NARA SAMTING WEA IUMI SAVVE LANEM FROM BIBLE?
God hem herem prea bilong olketa wea hambol.—Psalm 138:6.
Iu savve iusim eni languis taem iu prea, or prea kwaet nomoa.—2 Chronicles 6:32, 33; Nehemiah 2:1-6.