Wat Nao Bible Talem Abaotem Christmas?

Ansa from Bible

Bible no talem date wea Jesus born, and hem no talem tu for iumi celebratem birthday blo Jesus. Olsem McClintock and Strong’s Cyclopedia talem: “God no talem for iumi celebratem Christmas, and NT [New Testament] tu no storyim eniting abaotem datwan.”

Bat, taem samfala studyim history blo Christmas olketa luksavve hem start kam from pagan religious biliv. Bible showim dat iumi mekem God feel nogud, if iumi trae for worshipim God lo wei wea hem no appruvim.—Exodus 32:5-7.

History blo olketa Christmas kastom

1. Celebratem birthday blo Jesus: “Olketa first century Christian no celebratem birthday blo [Jesus] bikos olketa ting lo wei for celebratem birthday blo samwan hem wanfala pagan kastom.”—The World Book Encyclopedia.

2. December 25: No eni pruv stap for sei Jesus born lo datfala date. Olketa church leaders chusim disfala date bikos luk olsem hem tu date blo pagan festival wea olketa celebratem during or klosap lo taem blo winter solstice.

3. Givim present, feast, party: The Encyclopedia Americana sei: “Saturnalia, wea hem feast wea pipol lo Rome celebratem lo mid-December, hem nao staka kastom blo Christmas celebration kam from. For example, lo disfala celebration olketa savve mekem olketa big feast, givim present, and laetem olketa kandol.” Encyclopædia Britannica sei dat during Saturnalia “evri waka and bisnis olketa klos.”

4. Olketa Christmas laet: According lo The Encyclopedia of Religion, olketa lo Europe decoratem haos blo olketa “witim laets and evri difren kaen green tree” for celebratem winter solstice and for faetem olketa evil spirit.

5. Mistletoe, holly: “Olketa Druids ting lo mistletoe leaf hem garem magic paoa. Olketa worshipim green leaf blo holly plant for sun hem kam bak.”—The Encyclopedia Americana.

6. Christmas tree: “Tree worship hem common lo heathen pipol lo Europe, olketa gohed for duim datwan afta olketa joinim Christianity.” Wanfala wei wea olketa mekem tree worship for gohed hem nao kastom for “putim Christmas tree lo entrance or insaed lo haos lo midwinter holiday.”​—Encyclopædia Britannica.