Wat Taem Nao Jesus Born?
Ansa from Bible
Bible no talem specific date wea Jesus Christ hem born, olsem wat olketa buk hia talem:
“No eni man savve lo stret date wea Christ hem born.”—New Catholic Encyclopedia.
“Exact date wea Christ hem born, no eniwan savve.”—Encyclopedia of Early Christianity.
Bible no givim direct ansa for disfala kwestin, ‘Wat taem nao Jesus born?’ bat hem storyim tufala event wea happen klosap lo taem wea hem born wea mekem staka pipol conclude dat hem no born lo December 25.
No lo winter
Registration. No longtaem bifor Jesus born, Caesar Augustus mekem wanfala law for “evriwan wea stap lo full earth for mas register.” Evriwan mas register lo “taon wea hem born lo hem,” wea datwan tekem wan week or winim for man travel go bak lo ples blo hem. (Luke 2:1-3) Datfala law maet hem for savve hu nao fit for peim tax or joinim army. Hem no isi for travel during cold winter, and Augustus bae spoelem pipol blo hem if hem forcem olketa for tekem long trip lo taem olsem.
Olketa sheepsheep. Olketa shepherd “stap aotsaed, and olketa gohed lukaftarem olketa sheepsheep blo olketa lo naet.” (Luke 2:8) Datfala buk Daily Life in the Time of Jesus storyim dat “week bifor Pasova [end blo March]” kasem midol lo November olketa sheepsheep stap nomoa lo open ples. Hem sei moa: “During winter olketa sheepsheep stap anda wanfala shelter for protectim olketa from weather. So datwan pruvim date blo Christmas hem lo winter, wea datwan hem no stret bikos olketa Gospel storyim dat olketa shepherd stap aotsaed.”
Abaot early October
Iumi savve estimatem taem wea Jesus born taem iumi kaont bak from dae blo hem lo Pasova, Nisan 14 lo spring blo year 33 C.E. (John 19:14-16) Jesus hem abaot 30 years old taem hem startim thri and haf year ministry blo hem, so hem mas born abaot early October, 2 B.C.E.—Luke 3:23.
Why nao Christmas hem lo December 25?
Since no eni evidence showim dat Jesus Christ born lo December 25, why nao pipol celebratem Christmas lo disfala date? Encyclopædia Britannica sei olketa church leader maet chusim day ia for hem “join tu witim pagan Roman festival for markem ‘birthday blo sun,’” lo taem blo winter solstice. Buk The Encyclopedia Americana, storyim staka scholar biliv dat olketa church leader hia duim olsem “mekem olketa heathen pipol kamap Christian.”