OLKETA KWESTIN WEA YOUNG PIPOL GAREM

Hao Nao Mi Savve Stopem Habit for Delay for Duim Samting?

Hao, iu taed for evritaem duim olketa waka lo haos and homwok blo iu lo last minute? Iu mas stop for duim kaen wei olsem! Disfala article bae helpem iu for stopem habit for delay for duim samting, nomata taem

Afta iu readim disfala article, duim quiz abaotem habit for delay for duim samting.

Bible storyim wanfala consequence blo habit for delay for duim samting. Hem sei: “Man wea lukluk lo wind bae no plantim eni seed, and man wea lukluk lo olketa cloud bae no harvestim eni samting.”—Ecclesiastes 11:4.

Tingim samfala samting wea maet contribute lo datfala problem and wat iu savve duim for stopem habit for delay for duim samting.

Wat iu bae duim hem luk big tumas.

Tru samting nao—samfala samting wea iu bae duim hem luk big tumas so hem isi for sei bae mi duim datwan bihaen. Samfala gud idea lo hia.

Divaedem datfala project lo olketa smol sekson. Melissa, wea hem 21 years old, hem sei: “Nomata mi savve dat mi leit for duim wanfala project, mi trae for catch ap lo wei for duim wan ting at a taem.”
Startim kwiktaem. “Startim datfala project as soon as iu kasem, even if datwan minim for addim lo to-do list blo iu or raetem daon samfala idea wea iu garem bifor iu forgetim.”—Vera, 18 years old.
Askem help. Parents and olketa teacher blo iu maet feisim semkaen challenge. Hem gud for askem advaes from olketa. Olketa savve helpem iu for organizem olketa idea blo iu and mekem wanfala plan.

Tip “Mekem wanfala schedule. Hem tru, datwan minim iu mas organize and disaed strong for followim datfala schedule, bat gud samting nao bae iu kasem—iu bae finisim evriting wea iu havtu finisim on taem.”—Abbey, 17 years old.

Iu no feel motivated.

Staka taem, olketa assignment wea iu mas duim hem olketa samting wea iu boring tumas lo hem. So wat nao iu savve duim if datfala project hem samting wea iu no interest lo hem? Traem olketa idea hia.

Tingim wanfala reason why iu mas duim kwiktaem. For example, imaginim hao iu bae feel hapi tumas taem iu finisim datfala assignment. Amy, wea hem 13 years old, hem sei: “Mi laekem tumas feeling wea mi garem taem mi finisim wanfala samting on taem, or taem mi finisim early and afta datwan mi savve relax.”
Remindim iuseleva lo wat nao consequences. Taem iu delay, iu addim go moa stress blo iu and hae chance bae iu no succeed. Bible sei: “Wat iu plantim, datwan nomoa nao bae iu harvestim.”—Galatians 6:7, Good News Translation.
Lo mind blo iu, muvim due date blo project tu-thri days bifor hem due. Wanfala 18 year old gele wea nem blo hem Alicia sei: “Taem mi pretend dat wanfala assignment hem due wan or tu days bifor actual due date, datwan helpem mi. Mi garem taem for chekim moa datfala assignment and mi still garem wan or tufala day bifor hem due.”

Tip “Hem depend lo mind-set blo iu. Remindim iuseleva lo wat iu havtu duim, and no letem eniting for stopem iu for duim datwan. Taem mi remindim miseleva abaotem datwan, mi duim nao wat mi havtu duim.”—Alexis, 19 years old.

Iu busy tumas.

Nathan, wea hem 20 years old, hem sei: “Staka taem pipol savve sei mi man for last minute lo evriting, bat datwan no fair! Olketa no realizim dat mi busy tumas!” If iu garem sem feeling olsem Nathan, traem olketa tips hia.

Duim olketa isi tings first. Amber, wea hem 20 years old, hem sei: “Wantaem samwan talem mi dat if wanfala waka bae tek faev minutes nomoa for completim, iu shud duim stretawe. Datwan includim olketa tings olsem klining, hangem olketa kaleko blo iu, wasim olketa pleit, and for ringim samwan.”
Setim priority. Bible sei: “Luksavve lo olketa samting wea moa important.” (Philippians 1:10) Hao nao iu savve applyim datwan lo daily laef blo iu? Wanfala 20 years old gele wea nem blo hem Anna, hem sei: “Mi keepim wanfala list blo evri assignment wea mi garem and wat taem olketa due. Bat most important samting, mi markem wat taem mi plan for waka lo each project and wat taem for completim.”

Hao, lo tingting blo iu datwan bae mekem iu no garem eni freedom? Tingim diswan! Reality nao, if iu mekem wanfala schedule, iu nao kontrolem taem blo iu instead for taem nao kontrolem iu. And datwan daonem stress blo iu. Wanfala 15 year old gele wea nem blo hem Kelly, hem sei: “Taem mi garem wanfala plan, datwan mekem mi no stress tumas and mi luksavve wat nao priority.”

Removim eniting wea bae distractim iu. Jennifer, wea hem 24 years old, hem sei: “Mi letem olketa lo haos for savve wat taem mi bae startim project blo mi. If olketa laekem mi for duim eniting for olketa, mi talem olketa for letem mi savve firstaem bifor mi start. Then mi offem tu phone and email alerts blo mi.”

Tip “Eniting wea iu need for duim bae hem weit go kasem taem iu duim. So instead for gohed tingim wat taem bae iu duim, iu duim nao. Then bae iu garem taem for relax bihaen.”—Jordan, 19 years old.

Ansarem quiz abaotem habit for delay for duim samting.

Tru or False

Iu shud no delay for duim eni waka.
Eniwan wea garem habit for delay savve change.
Evritaem iu savve duim samting beta taem iu anda pressure.
Iu inheritim habit for delay from parents blo iu.

Olketa ansa

False. Maet iu garem gud reason for weit lelebet bifor iu duim wanfala project. For example, extra taem savve helpem iu for kasem moa information, mekem wanfala plan, or mekem wanfala gud disison.—Bible principle: Proverbs 21:5.
Tru. Eniwan wea garem bad habit savve change. Important samting hem for focus lo olketa benefit wea iu bae kasem if iu changem olketa bad habit blo iu.—Bible principle: Ephesians 4:22, 23.
False. Staka taem datwan no happen. Tru samting nao, best quality waka hem result blo wei for givim inaf taem and for plan ahed.—Bible principle: Proverbs 15:28.
False. Even if wanfala parent garem habit for delay for duim samting, olketa scientist no discoverem yet eni “gene blo habit for delay.”—Bible principle: Galatians 6:5.