Why Nao Holocaust Happen? Why Nao God No Stopem?

Staka wea askem olketa kwestin hia hem olketa wea safa bikos olketa lusim staka samting and olketa no just laek for savve lo ansa nomoa bat laek for kasem comfort. Olketa narawan ting lo Holocaust olsem wanfala lo most evil tings lo history wea olketa human duim, so olketa faendem hem hard for biliv lo God.

Tingting wea no stret wea staka pipol garem abaotem God and Holocaust

Tingting wea no stret: Hem rong for askem why God letem Holocaust for happen.

Tru samting: Pipol wea garem strong faith bin kwestinim why God letem evil tings for happen. For example, profet Habakkuk askem God: “Why nao iu letem violence, wei for no followim law, crime, and wei wea pipol cruel hem spred evriwea?” (Habakkuk 1:3, Contemporary English Version) Instead for God kros lo Habakkuk, Hem putim olketa kwestin hia lo Bible for iumi savve readim.

Tingting wea no stret: God nating kea abaotem wei wea iumi olketa man safa.

Tru Samting: God heitim olketa wicked samting and safaring wea hem kosim. (Proverbs 6:16-19) Bifor lo taem blo Noah, “heart blo [God] sorre tumas” bikos violence spred lo earth. (Genesis 6:5, 6) For sure, God tu mas barava feelim pain bikos lo Holocaust.—Malachi 3:6.

Tingting wea no stret: Holocaust hem panisment from God for olketa Jew.

Tru samting: God letem army blo Rome for distroem Jerusalem lo first century. (Matthew 23:37–24:2) Bat, since dat taem, God no fevarem wanfala grup of pipol or for panisim olketa. Lo tingting blo God, “no eni difference nomoa between olketa Jew and olketa Gentile.”—Romans 10:12, Good News Translation.

Tingting wea no stret: If wanfala loving and paoaful God exist, hem bae duim samting for preventim Holocaust.

Tru samting: Nomata God no kosim safaring, samtaems hem letem datwan for lelebet taem.—James 1:13; 5:11.

Why nao God letem Holocaust?

God letem Holocaust bikos lo sem reason wea hem letem wei for safa gohed, wea hem nao for ansarem olketa important kwestin wea kamap longtaem ago. Bible talem klia dat distaem Devil nao rulim world, no God. (Luke 4:1, 2, 6; John 12:31) Tufala truth hia from Bible savve helpem iumi for explainim why God letem Holocaust for happen.

1. God creatim olketa man witim free will. God talem first human, Adam and Eve, wat hem expectim from tufala, bat hem no forcem tufala for obey. Tufala chus for mekem disison seleva lo wat hem gud and nogud, and nogud disison blo tufala, witim tu nogud disison pipol mekem thru aot lo history hem mekem pipol for kasem olketa nogud samting. (Genesis 2:17; 3:6; Romans 5:12) Olsem disfala buk Statement of Principles of Conservative Judaism sei: “Staka safaring wea happen lo world hem result blo wei wea pipol misiusim free will wea iumi kasem.” Instead for God tekem bak free will from iumi, hem givim taem for olketa man trae pruvim if olketa savve deal witim olketa problem wea happen seleva.

2. God savve finisim evri nogud samting wea happen bikos lo Holocaust and bae hem duim datwan. God promis dat bae hem mekem staka million pipol wea dae for laef bak, includim olketa victim blo Holocaust. Hem bae finisim tu pain wea olketa wea survive thru lo Holocaust garem bikos lo olketa nogud memory. (Isaiah 65:17; Acts 24:15) From God lovem iumi olketa man, datwan mekem iumi sure dat bae hem fulfillim olketa promis hia.—John 3:16.

Staka victim and survivor blo Holocaust olketa fit for maintainim faith blo olketa, and laef blo olketa garem mining taem olketa understandim why God letem nogud samting for happen, and hao hem bae finisim evri nogud samting wea kamaot form datwan.