Devil Stap lo Wea?

Ansa from Bible

Devil hem wanfala spirit creature wea stap lo invisible ples. Bat, diswan no minim hem stap lo hell fire for mekem olketa wicked pipol safa, olsem iu lukim lo piksa blo disfala article.

“War lo heven”

For lelebet taem, Satan datfala Devil still garem freedom for go raon lo heven, includim for go standap front lo God witim olketa faithful angel. (Job 1:6) Bat Bible talem dat bae “war lo heven” and from datwan bae olketa aotem Satan from heven and “torowem hem kam lo earth.” (Revelation 12:7-9, King James Version) Bible chronology and olketa event lo world confirmim dat disfala war lo heven hem happen finis. Distaem, Devil hem raraon nomoa lo earth.

Hao, datwan minim Devil hem stap lo wanfala specific ples lo planet blo iumi? For example, olketa sei dat ancient city blo Pergamum hem ples “throne blo Satan lo hem” and hem “ples wea Satan hem stap.” (Revelation 2:13) Really, olketa expression hia refer nomoa lo wei wea pipol lo there duim staka samting for worshipim Satan. Bible sei Devil rul ovarem “evri kingdom lo earth,” so datwan pruvim dat Satan hem no stap lo wanfala location lo earth bat hem raraon nomoa lo earth.​—Luke 4:​5, 6.