Hao Nao Parents Savve Teachim Pikinini Bilong Olketa Abaotem Sex?

Ansa from Bible

Hu nao shud teachim olketa pikinini abaotem sex? Bible sei hem responsibility bilong parents for duim datwan and plande parents agree hao olketa idea hia savve help:

• No shame for story witim olketa. Bible story stret abaotem sex and olketa private part bilong man and woman, and God talem nation bilong Israel olketa shud lanem “olketa pikinini” abaotem olketa samting hia. (Diutronomi 31:12; Levitikas 15:​2, 16-​19) Iu savve iusim olketa stretfala word wea no mekem iu shame for story abaotem sex and olketa private part long body.

• Isisi lanem olketa. Hem moabeta for isisi lanem olketa pikinini abaotem sex taem olketa start for minim, winim wei for weit go kasem taem olketa teenager and then talem olketa evri samting abaotem datwan.​—1 Corinth 13:11.

• Teachim pikinini abaotem olketa standard long Bible. Samfala taem olketa teacher long skul maet teachim olketa pikinini abaotem sex. Bat Bible encouragem parents for no just teachim pikinini abaotem sex and olketa private part long body, bat for helpem olketa garem stretfala tingting abaotem sex and for savve wanem nao Bible talem abaotem datwan.​—Provebs 5:​1-​23.

• Lisin long pikinini bilong iu. No kros or tingim pikinini duim nogud samting sapos hem askem iu samfala kwestin abaotem sex. Bat iu “mas willing for lisin, no kwiktaem for toktok.”​—James 1:​19.

Hao for protectim pikinini bilong iu from pipol wea laek spoelem olketa saed long sex

• Lane hao for protectim pikinini. Lanem wanem olketa wea spoelem pikinini saed long sex savve duim for trikim pikinini.​—Provebs 18:15; lukim chapter 32 long buk Questions Young People Ask​—Answers That Work, Volume 1.

• Fren gud witim pikinini bilong iu and savve wanem olketa duim. No letem narawan for lukaftarem pikinini bilong iu sapos iu no savve gud long hem and no trustim hem, and iu nao mas “stretem” pikinini mekem hem no go olobaot.​—Provebs 29:15.

• Teachim pikinini for luksavve hu nao olketa shud obeyim. Olketa pikinini mas lane for obeyim parents bilong olketa. (Colossae 3:​20) Bat sapos iu lanem pikinini for mas evritaem obeyim evri adult, then maet samwan mekius long datwan and spoelem pikinini. Christian parents savve talem olketa pikinini, “Sapos samwan talem iu for duim samting wea God sei hem no stret, iu mas no duim.”​—Acts 5:​29.

• Practice witim pikinini wanem hem savve duim for protectim hemseleva. Helpem pikinini bilong iu savve wanem for duim sapos samwan trae for spoelem hem taem iu no stap. Practice wanem for duim sapos samwan trae for tasim pikinini long rongfala wei and for tok strong “No duim datwan! Bae mi reportim iu ia!” and talem hem for ranawe kwiktaem. Maet iu need for remindim “olketa pikinini staka taem” bikos olketa savve forget wanem for duim.​—Deuteronomy 6:7, Contemporary English Version.