Buk blo Revelation—Wat Nao Hem Minim?
Ansa from Bible
Greek nem blo Bible buk Revelation hem, A·po·kaʹly·psis (apocalypse), wea minim “Aotem kava” or “Showim samting wea haed.” Disfala nem showim Revelation hem minim for showim klia olketa samting wea bin haed and olketa event wea fulfill longtaem afta olketa raet abaotem. Staka profesi wea buk hia storyim hem no fulfill yet.
Overview blo buk blo Revelation
Introduction.—Revelation 1:1-9.
Message from Jesus for sevenfala kongregeson.—Revelation 1:10–3:22.
Vision wea showim God sidaon lo throne blo hem lo heven.—Revelation 4:1-11.
Olketa difren vision, each wan lead go for next wan:
Sevenfala seal.—Revelation 5:1–8:6.
Sevenfala trumpet, last thrifala trumpet talemaot thrifala trabol.—Revelation 8:7–14:20.
Sevenfala bowl or dish, wea insaed each wan hem garem trabol wea representim judgment blo God wea bae olketa kapsaetem kam lo earth.—Revelation 15:1–16:21.
Olketa vision wea showim taem God distroem olketa enemy blo hem.—Revelation 17:1–20:10.
Olketa vision wea showim olketa blessing blo God for heven and earth.—Revelation 20:11–22:5.
Conclusion.—Revelation 22:6-21.
Key for understandim buk blo Revelation
Mining blo olketa toktok lo buk hia hem positive, hem no for mekem man fraet or mekem olketa wea duim waka for God fraet. Samfala man sei disfala word “apocalypse” hem join witim big disaster, bat buk blo Revelation hem start and end witim olketa toktok wea sei man wea readim, understandim, and applyim olketa message insaed disfala buk bae hapi.—Revelation 1:3; 22:7.
Revelation iusim staka “saen,” or symbol, wea no isi for understandim from hem literal.—Revelation 1:1.
Staka big samting and olketa symbol lo buk blo Revelation, olketa introducem lo start lo Bible:
Jehovah hem “datfala tru God lo skae and lo earth” and hem Creator blo evri samting.—Deuteronomy 4:39; Psalm 103:19; Revelation 4:11; 15:3.
Jesus Christ hem “Lamb blo God.”—John 1:29; Revelation 5:6; 14:1.
Satan datfala Devil hem enemy blo God.—Genesis 3:14, 15; John 8:44; Revelation 12:9.
Bigfala Babylon hem olsem ancient Babylon (Babel), wanfala enemy blo Jehovah God and pipol blo hem, and hem source blo olketa laea teaching blo religion.—Genesis 11:2-9; Isaiah 13:1, 11; Revelation 17:4-6; 18:4, 20.
“Sea” hem olketa man wea againstim God.—Isaiah 57:20; Revelation 13:1; 21:1.
Olketa samting wea semsem olsem wat olketa iusim lo ancient tabernacle lo worship, includim ark blo covenant, sea wea klia olsem glass (basin for swim), olketa lamp, offering blo incense, and altar for sakrifaes.—Exodus 25:10, 17, 18; 40:24-32; Revelation 4:5, 6; 5:8; 8:3; 11:19.
Wild animal hem symbolizim olketa human gavman.—Daniel 7:1-8, 17-26; Revelation 13:2, 11; 17:3.
Olketa iusim olketa namba olsem symbol.—Revelation 1:20; 8:13; 13:18; 21:16.
Olketa vision join witim “day blo Lord,” wea start taem Kingdom blo God hem set ap lo 1914 and Jesus start for King. (Revelation 1:10) So iumi expectim dat main fulfillment blo Revelation hem lo taem blo iumi.
For understandim buk blo Revelation, iumi needim tu sem samting wea helpem iumi for understandim full Bible, includim wisdom from God and assistance from olketa wea understandim finis disfala buk .—Acts 8:26-39; James 1:5.