Wat Nao 666 Hem Minim?

Ansa from Bible

According lo last Bible buk, 666 hem namba or nem blo wild animal wea garem sevenfala hed and tenfala horn wea kamaot from sea. (Revelation 13:​1, 17, 18) Disfala wild animal hem representim worldwide politikol system, wea rul ovam “evri tribe and pipol and languis and nation.” (Revelation 13:7) Datfala namba 666 showim politikol system hem samting nating nomoa lo eye blo God. Hao nao olsem?

No just wanfala label nomoa. Olketa nem wea God givim olketa garem mining. For example, God givim nem Abram, wea minim “Dadi wea Garem (Bignem),” datfala nem Abraham, wea minim “Dadi blo (Staka Pipol),” taem God promis dat Hem bae mekem Abraham “dadi blo staka nation.” (Genesis 17:5, footnote) Lo sem wei, God nemim datfala wild animal lo 666 olsem symbol for showim olketa wei blo datfala wild animal.

Namba six hem minim imperfection. Staka taem, Bible iusim namba for symbolizim wanfala samting. Namba seven hem evritaem representim samting wea complete or perfect. Namba six, savve minim samting wea incomplete or no stret lo eye blo God, and namba ia savve minim olketa enemy blo God.​—1 Chronicles 20:6; Daniel 3:1.

Thri taems for emphasis. Samtaems taem Bible laek strongim samting, hem repeatim datwan thri taems. (Revelation 4:8; 8:​13) So nem 666 hem barava showim dat lo tingting blo God politikol system blo olketa man hem samting nating nomoa lo God. Olketa no savve mekem lasting peace and security kamap, wea hem samting wea only Kingdom blo God nomoa savve duim.

Mark blo datfala wild animal

Bible sei pipol receivim “mark blo datfala wild animal” bikos olketa wea followim “mekhae” lo hem gogo olketa worshipim hem nao. (Revelation 13:​3, 4; 16:2) Olketa duim olsem taem olketa mekhae lo kantri blo olketa, lo olketa symbol blo hem, or army blo olketa. The Encyclopedia of Religion sei olsem: “Distaem wei for mekhae lo kantri hem big tumas and hem olsem wanfala form of worship.”a

Hao nao mark blo datfala wild animal stap lo raet hand or forhed blo wanfala man? (Revelation 13:16) Regardim komand blo hem lo nation blo Israel, God sei: “Taengem olsem wanfala reminder lo hand blo iufala, and olketa mas olsem wanfala hedband lo forhed blo iufala.” (Deuteronomy 11:18) Diswan no minim olketa Israelite putim mark lo literal hand and forhed blo olketa, bat hem minim word blo God nao gaedem evriting olketa duim and tingting blo olketa. Lo sem wei, 666 no stap lo hand and forhed olsem tattoo, bat datfala mark blo wild animal hia hem symbolically identifyim pipol wea politikol system blo olketa man kontrolem laef blo olketa. Pipol wea mark blo wild animal stap lo olketa, mekem olketa seleva for enemy blo God.​—Revelation 14:​9, 10; 19:19-​21.