Why Nao Staka Christian Denomination Stap?
Ansa from Bible
Pipol iusim teaching blo Jesus Christ for startim staka difren “Christian” denomination. Nomata olsem, Bible showim klia only wanfala tru Christian denomination nomoa hem stap. Tingim thrifala reason hia why iumi sei olsem.
Jesus sei hem nao teachim “truth,” and olketa early Christian ting dat religion blo olketa nao hem “truth.” (John 8:32; 2 Peter 2:2; 2 John 4; 3 John 3) Diswan showim dat olketa wea promotim olketa doctrine wea conflict witim teaching blo Jesus, olketa no followim tru Christianity.
Bible teachim dat olketa Christian “mas wan mind lo wat [olketa] storyim.” (1 Corinthians 1:10) Bat, staka Christian denomination disagree lo olketa teaching abaotem wat hem stret for olketa Christian mas duim. Olketa kaen denomination olsem hem no stret.—1 Peter 2:21.
Jesus talem profesi hao staka bae claimim dat olketa Christian, bat olketa nating obeyim olketa komandment blo hem and bae hem rejectim olketa. (Matthew 7:21-23; Luke 6:46) Olketa religious leader wea spoelem tru worship bae misleadim samfala pipol for own interest blo olketa. (Matthew 7:15) And samfala pipol bae disaed for followim olketa laea Christian, bikos olketa hia teachim nomoa wat pipol laek for herem instead for herem truth from Bible.—2 Timothy 4:3, 4.
Lo illustration blo Jesus abaotem olketa wheat and rabis grass, hem talem profesi dat staka pipol bae rebel (apostate) againstim tru Christianity. (Matthew 13:24-30, 36-43) For lelebet longtaem, bae hem hard for luksavve which wan nao olketa tru Christian and which wan nao olketa false Christian. Bat olsem Jesus talem finis, olketa apostate staka tumas afta olketa aposol dae. (Acts 20:29, 30) From teaching blo olketa apostate no semsem evritaem, evri difren kaen Christian denomination olketa “go difren from truth.”—2 Timothy 2:18.
Jesus talem tu dat gogo bae iumi luksavve hu nao olketa tru Christian and hu nao olketa false Christian. Diswan happen lo taem blo iumi, taem wea “world hem gogo for finis.”—Matthew 13:30, 39.