Hao Nao Mi Savve Faendem Tru Religion?
Ansa from Bible
Bible iusim wanfala illustration for luksavve lo difference between pipol wea followim tru religion and pipol wea no followim tru religion taem hem sei: “Iufala bae luksavve lo olketa hia from frut blo olketa. Pipol no harvestim olketa grape or fig from nila grass, iaman?” (Matthew 7:16) Bae iu luksavve lo difference between grape and nila grass, from frut blo tufala. Lo sem wei, bae iu luksavve lo difference between tru religion and false religion from frut blo olketa, or from olketa features hia.
Tru religion teachim truth wea base lo Bible, no lo human philosophies. (John 4:24; 17:17) Diswan includim olketa truth abaotem soul and hope for laef olowe lo wanfala paradaes earth. (Psalm 37:29; Isaiah 35:5, 6; Ezekiel 18:4) And tu, tru religion no hol bak for exposim olketa laea teaching blo false religion.—Matthew 15:9; 23:27, 28.
Tru religion helpem pipol for savve lo God, includim wei for teachim pipol abaotem nem blo hem, Jehovah. (Psalm 83:18; Isaiah 42:8; John 17:3, 6) Hem no teachim dat iumi hard for savve lo God, or hem hae tumas, bat hem teachim dat God laekem iumi for fren witim hem.—James 4:8.
Tru religion storyim dat Jesus Christ nao man wea God iusim for sevem pipol. (Acts 4:10, 12) Olketa wea followim tru religion obeyim komand blo Jesus and traem best for followim example blo hem.—John 13:15; 15:14.
Tru religion teachim dat Kingdom blo God nomoa only hope blo olketa man. Olketa follower blo hem strong for talem olketa narawan abaotem datfala Kingdom.—Matthew 10:7; 24:14.
Tru religion promotim unselfish love. (John 13:35) Hem teachim pipol for respectim evri ethnic grup and welkamim pipol from evri race, culture, languis, and baekgraon. (Acts 10:34, 35) Olketa follower blo hem no go faet lo war bikos olketa lovem pipol.—Micah 4:3; 1 John 3:11, 12.
Tru religion no peim olketa bigman blo hem, and hem no givim title lo olketa minister blo hem for mekem pipol luk ap lo olketa.—Matthew 23:8-12; 1 Peter 5:2, 3.
Tru religion hem completely neutral lo olketa politikol affairs. (John 17:16; 18:36) Bat, olketa follower blo hem respectim and obeyim gavman lo ples wea olketa stap, followim komand lo Bible wea sei: “Peim bak lo Caesar olketa samting wea hem blo Caesar [wea representim olketa civil authority], and givim go bak lo God olketa samting wea hem blo God.”—Mark 12:17; Romans 13:1, 2.
Tru religion hem helpem man lo laef, no just wanfala kastom or samting for show-off lo hem nomoa. Olketa follower blo tru religion followim olketa hae standard lo Bible, lo evri samting wea olketa duim lo laef. (Ephesians 5:3-5; 1 John 3:18) Instead for feel nogud for duim olsem, olketa hapi taem olketa worshipim “datfala hapi God.”—1 Timothy 1:11.
Olketa wea followim tru religion olketa no staka. (Matthew 7:13, 14) Pipol savve ting daonem olketa, mekfani, and persecutim olketa wea duim will blo God.—Matthew 5:10-12.
Tru religion hem no minim ‘religion wea stret nomoa lo mi’
Danger hem stap if man chusim nomoa religion wea base lo hao hem feel abaotem. Bible talem finis taem bae kam wea pipol “lukaotem olketa teacher wea talem nomoa samting wea olketa laekem tumas for herem.” (2 Timothy 4:3) Bat, Bible encouragem iumi for followim “religion wea hem klin and stret lo tingting blo God and Dadi blo iumi,” even if datfala religion staka pipol no laekem.—James 1:27, footnote; John 15:18, 19.