Hao, Jesus Resurrect Witim Physical Body or Spirit Body?

Ansa from Bible

Bible sei Jesus “hem man taem olketa killim hem dae bat hem wanfala spirit taem God mekem hem laef bak [resurrect.]”​—1 Peter 3:​18; Acts 13:34; 1 Corinthians 15:45; 2 Corinthians 5:​16.

Jesus seleva talem toktok wea showim hem bae no resurrect witim physical body. Jesus sei hem bae givim “body blo hem on behalf lo pipol lo world for sevem olketa,” olsem ransom for iumi olketa man. (John 6:​51; Matthew 20:28) If hem tekem bak physical body taem hem resurrect, datfala ransom sakrifaes bae hem samting nating nomoa. Nomata olsem, hard for datwan happen bikos Bible sei hem sakrifaesim body blo hem “wantaem nomoa . . . and for olowe.”—Hebrews 9:​11, 12.

If Jesus hem resurrect witim spirit body, hao nao olketa disaepol savve lukim hem?

• Olketa spirit creature savve change for garem physical body. For example, lo bifor olketa angel change for garem physical body and even kaikai and drink witim olketa man. (Genesis 18:​1-8; 19:​1-3) Bat, olketa savve change bak for spirit and lusim disfala earth.​—Judges 13:15-​21.

• Afta Jesus resurrect, hem tu change for garem physical body for lelebet taem, olsem olketa angel duim bifor. From Jesus hem wanfala spirit, hem savve appear lo olketa man and disappear tu. (Luke 24:31; John 20:19, 26) Hem no appear lo olketa man witim sem physical body. Dastawe, even olketa klos frens blo Jesus recognizim hem only lo wat hem talem and duim.​—Luke 24:30, 31, 35; John 20:14-​16; 21:​6, 7.

• Taem Jesus appear lo aposol Thomas, hem change lo body wea garem mark blo olketa garekil taem olketa killim hem. Hem duim diswan for mekem Thomas biliv, bikos Thomas daotem if Jesus hem really laef bak.​—John 20:24-​29.