Wat Kaen Sin Nao God No Savve Forgivim?
Ansa from Bible
Sin wea God no savve forgivim hem refer lo akson wea join witim attitude blo wanfala sinner wea mekem hem for no savve kasem forgiveness blo God. Hao nao gogo man garem kaen attitude olsem?
God forgivim olketa wea repent from sin blo olketa, followim olketa standard blo hem lo laef blo olketa, and showimaot faith lo Jesus Christ. (Acts 3:19, 20) Nomata olsem, wanfala person savve garem attitude or wei wea barava nogud tumas, and hem bae never changem datwan. Bible describem dat kaen person olsem hem garem “wicked heart” wea “paoa wea sin garem for trikim man” affectim hem. (Hebrews 3:12, 13) Olsem clay wea man bonem lo fire and hard for hem resheipim, kaen man olsem hem disaed for barava againstim God. (Isaiah 45:9) No eni reason stap for God forgivim kaen man olsem, so hem guilty lo sin wea God no savve forgivim.—Hebrews 10:26, 27.
Samfala Jewish religious leaders lo taem blo Jesus commitim sin wea God no savve forgivim. Olketa savve Jesus iusim holy spirit blo God for duim olketa mirakol, nomata olsem olketa sei Jesus kasem paoa from Satan datfala Devil.—Mark 3:22, 28-30.
Example blo olketa sin wea God savve forgivim
Tok spoelem God bikos man no savve. Wantaem aposol Paul tok spoelem pipol blo God, bat bihaen hem sei: “Hem showim mercy lo mi bikos mi no savve wat mi duim hem rong and from mi no garem faith.”—1 Timothy 1:13.
Adultery. Bible mentionim samfala wea bifor olketa commitim adultery bat olketa changem wei blo olketa and God forgivim olketa.—1 Corinthians 6:9-11.
“Hao, mi commitim sin wea God no savve forgivim?”
If iu barava heitim sin wea iu duim bifor and really laek for change, datwan minim iu no commitim sin wea God no savve forgivim. God savve even forgivim man wea duim sem sin staka taem, as long as lo heart blo hem, hem no really againstim God.—Isaiah 1:18.
Samfala pipol feel dat olketa maet commitim sin wea God no savve forgivim bikos olketa gohed for feel guilty. Bat, Bible teachim dat iumi no savve trustim feeling blo iumi evritaem. (Jeremiah 17:9) God no authorizim iumi for judgem eniwan, even for judgem iumiseleva. (Romans 14:4, 12) Hem savve forgivim iumi even if heart blo iumi gohed for judgem iumi.—1 John 3:19, 20.
Hao, Judas Iscariot commitim sin wea God no savve forgivim?
Yes. From hem greedy datwan mekem hem for stealim selen wea olketa donatem for iusim lo holy waka. Hem even pretend olsem hem concern abaotem pipol wea poor bat real interest blo hem for tekem staka selen mekem hem stealim. (John 12:4-8) Once heart blo Judas disaed nao for gohed duim rong samting, hem betrayim Jesus for 30 silver shekel. Jesus savve dat Judas bae never repent from wat hem duim, and hem kolem Judas “man wea bae distroe.” (John 17:12) Diswan minim taem Judas dae, hem bae permanently distroe and no garem hope for resurrection.—Mark 14:21.
Judas no showim tru repentance from sin blo hem. Hem confess, no lo God, bat lo olketa religious leaders wea hem join witim olketa.—Matthew 27:3-5; 2 Corinthians 7:10.