Bae God Forgivim Mi?
Ansa from Bible
Yes, God bae forgivim olketa sin blo iu if iu tekem proper steps. Bible sei God hem “redi for forgive” and hem ‘bae barava forgivim man.’ (Nehemiah 9:17; Psalm 86:5; Isaiah 55:7) Taem hem forgivim iumi, hem forgive lo bigfala wei. Hem “waepem aot,” or erasim olketa sin blo iumi. (Acts 3:19) And tu, God permanently forgivim iumi, bikos hem sei: “Mi bae no tingim moa sin blo olketa.” (Jeremiah 31:34) Taem hem forgivim iumi, hem no tingim moa olketa sin blo iumi for hem accusim iumi lo hem, or panisim iumi again and again.
Bat, forgiveness blo God hem no bikos hem wik or no garem paoa for panisim iumi. No enitaem hem changem olketa raeteous standard blo hem. From datwan, hem no laek forgivim samfala sin.—Joshua 24:19, 20.
Steps for kasem forgiveness blo God
Luksavve taem iu sin iu brekem standard blo God. Maet wat iu duim hem hurtim others, firstaem iu mas luksavve dat sin blo iu hem againstim God.—Psalm 51:1, 4; Acts 24:16.
Confessim sin blo iu lo God lo prea.—Psalm 32:5; 1 John 1:9.
Barava feel sorre from sin blo iu. Disfala wei for “sorre wea mekem God hapi” savve leadim man for repent, or changem tingting blo hem. (2 Corinthians 7:10) Hem includim tu for regret dat iu mekem olketa rong step wea lead go lo sin.—Matthew 5:27, 28.
Changem wei blo iu, wea hem nao for “tane raon.” (Acts 3:19) Diswan minim for avoidim wei for repeatim sem rong samting, or hem savve minim for changem full tingting and wat iu duim.—Ephesians 4:23, 24.
Duim samting for stretem rong samting iu duim or repairim damage iu duim. (Matthew 5:23, 24; 2 Corinthians 7:11) Apologize lo olketa wea safa from wat iu duim or fail for duim, and if fitim duim samting for showim sorre blo iu.—Luke 19:7-10.
Askem God lo prea for forgivim iu, wea base lo ransom blo Jesus. (Ephesians 1:7) For God ansarem prea blo iu, iu mas forgivim olketa wea sin againstim iu.—Matthew 6:14, 15.
If sin iu duim hem serious, story lo samwan wea qualify for givim spiritual help lo iu and wea savve prea on behalf lo iu.—James 5:14-16.
Tingting wea no stret abaotem wei for kasem forgiveness blo God
“Mi duim staka sin tumas so hard for God forgivim mi.”
God forgivim David wea duim adultery and murder
As long as iumi followim olketa step wea God putim insaed Bible, iumi bae kasem forgiveness, bikos no eni sin hem big winim forgiveness blo hem. Hem savve forgivim olketa serious sin and olketa sin wea man bin repeatim staka taem.—Isaiah 1:18.
For example, God forgivim King David blo Israel wea duim adultery and murder. (2 Samuel 12:7-13) God forgivim tu aposol Paul, wea feel dat hem nao worst wan winim olketa nara man wea sin. (1 Timothy 1:15, 16) Even olketa Jew lo first century wea God blamem olketa from olketa killim dae Jesus, datfala Messiah, olketa savve kasem forgiveness if olketa changem wei blo olketa.—Acts 3:15, 19.
“If mi confess lo wanfala priest or minister, bae hem forgivim olketa sin blo mi nao.”
No eni human hem authorize for forgivim sin blo nara man wea sin againstim God. Hem tru for confess lo nara person savve helpem sinner for recover, bat only God nomoa savve forgivim olketa sin.—Ephesians 4:32; 1 John 1:7, 9.
If hem olsem, then wat nao Jesus minim taem hem talem olketa aposol blo hem: “Sapos iufala forgivim man wea sin, God forgivim hem finis. Bat sapos iufala no forgivim hem, God no forgivim hem tu”? (John 20:23) Jesus story abaotem spesol authority wea hem bae givim lo olketa aposol taem olketa kasem holy spirit.—John 20:22.
Olsem hem promisim, olketa aposol kasem datfala gift taem holy spirit kam daon lo olketa lo 33 C.E. (Acts 2:1-4) Aposol Peter iusim paoa hia taem hem judgem disaepol Ananias and Sapphira. Holy spirit showim lo Peter rabis plan blo tufala, and judgment blo hem showim God no savve forgivim tufala.—Acts 5:1-11.
Miraculous gift blo holy spirit, witim olketa nara gift olsem for duim healing, story lo olketa difren languis, hem finis afta olketa aposol dae. (1 Corinthians 13:8-10) Dastawe, no eni man distaem savve forgivim sin blo nara person.