Wat Nao Hem Minim for Holy?
Ansa from Bible
For holy hem minim for stap separate from olketa samting wea no klin. Hebrew word wea olketa transleitim “holy” hem kam from wanfala term wea minim “separate.” So, wat hem holy hem no join witim olketa common tings man duim evriday, especially bikos hem klin and pure.
God hem barava holy tumas. Bible sei olsem: “No eniwan hem holy olsem Jehovah.”a (1 Samuel 2:2) So hem fit for God nao setim raet standard lo wat hem holy.
Datfala word “holy” savve apply lo eniting wea connect directly lo God, especially olketa tings wea olketa iusim lo worship. For example, Bible tok abaotem:
Holy ples: God talem Moses wea standap klosap lo datfala thornbush tree wea bone: “Disfala ples wea iu standap hem holy graon.”—Exodus 3:2-5.
Holy events: Olketa Israelite bifor worshipim Jehovah evritaem lo olketa religious festival wea olketa kolem lo “olketa holy convention.”—Leviticus 23:37.
Holy samting: Olketa samting wea olketa iusim lo temple lo Jerusalem bifor lo worship, olketa kolem lo olketa “holy samting.” (1 Kings 8:4) Pipol mas treatim olketa samting hia witim bigfala respect taem olketa iusim, nomata olketa no worshipim olketa samting hia.b
Hao, imperfect man savve holy?
Yes. God givim disfala komand lo olketa Christian: “Iufala mas holy bikos mi holy.” (1 Peter 1:16) Hem tru, olketa imperfect human no savve kasem standard blo God lo wei for holy. Nomata olsem, God savve ting lo olketa man wea obeyim olketa raeteous law blo hem, olketa ‘holy, and God acceptim’ olketa. (Romans 12:1) Man wea traem best for holy showim diswan lo toktok and akson blo hem. For example, hem followim disfala advaes lo Bible for ‘holy and for stap klia lo wei for durong’ and for ‘mas holy lo evri samting wea hem duim.’—1 Thessalonians 4:3; 1 Peter 1:15.
Hao, man savve lusim wei wea hem holy front lo God?
Yes. If samwan no followim olketa standard blo God lo wat hem duim, God bae no longer ting lo man hia hem holy. For example, Bible buk blo Hebrews story lo ‘olketa brata wea holy,’ bat hem warnim olketa if olketa no careful olketa savve garem ‘wicked heart bikos olketa no garem faith.’—Hebrews 3:1, 12.
Tingting wea no stret abaotem wei for holy
Tingting wea no stret: Iu savve holy if iu let go lo olketa samting wea iuseleva laekem.
Tru samting: Bible talem dat ‘worship wea mekem man safa’ or for no duim wat man seleva laekem hem nating important lo God. (Colossians 2:23) Instead, God laekem iumi for enjoyim olketa gud tings. Bible sei: “Each wan shud kaikai and drink and enjoyim evri hard waka blo hem. Diswan hem present from God.”—Ecclesiastes 3:13.
Tingting wea no stret: Man wea no marit hem nao barava holy.
Tru samting: Nomata wanfala Christian maet chus for no marit, ino datwan nomoa savve mekem man holy lo eye blo God. Hem tru, olketa wea gohed stap singol savve duim staka samting lo waka blo God. (1 Corinthians 7:32-34) Bat, Bible showim dat olketa wea marit tu savve holy. Really, wanfala lo olketa aposol blo Jesus wea nem blo hem Peter, hem marit.—Matthew 8:14; 1 Corinthians 9:5.
a Jehovah hem personal nem blo God. Staka handred Bible verse talem dat nem hia hem “holy.”
b Bible stopem wei for worshipim olketa idol.—1 Corinthians 10:14.