Hao, Mary Hem Mami blo God?

Ansa from Bible

Nomoa, Bible nating teachim dat Mary hem mami blo God, and hem no talem tu for olketa Christian worshipim or showim big respect for Mary.a Tingim diswan:

No enitaem Mary claimim dat hem mami blo God. Bible talem dat hem bornem “Son blo God,” bat no God.—Mark 1:1; Luke 1:32.
No enitaem Jesus Christ talem dat Mary hem mami blo God or talem for pipol givim spesol honor lo hem. Really, hem stretem wanfala woman wea praisem Mary from hem bornem Jesus, hem sei: “Nomoa, olketa wea herem word blo God and obeyim, olketa nao hapi!”—Luke 11:27, 28.
Datfala term “Mami blo God” and “Theotokos” (Woman wea bornem God) no stap lo Bible.
Lo Bible, datfala expression “Queen blo Heven” hem no refer lo Mary, bat lo wanfala false woman god wea olketa apostate Israelite worshipim. (Jeremiah 44:15-19) Maet “Queen blo Heven” hem nao Ishtar (Astarte), wanfala woman god blo pipol lo Babylon.
Olketa first Christian no worshipim Mary, or givim eni spesol honor lo hem. Wanfala historian sei olketa first Christian “savve againstim olketa cult and fraet dat if olketa givim spesol honor lo Mary, pipol bae ting dat olketa worshipim wanfala woman god.”—In Quest of the Jewish Mary.
Bible sei God no garem start and hem stap for olowe. (Psalm 90:1, 2; Isaiah 40:28) From hem no garem start, hem no garem mami. And tu, Mary no savve karem God lo bele blo hem. Bible talem klia dat heven hem no inaf for God stap lo there.—1 Kings 8:27.

Mary hem mami blo Jesus no “Mami blo God”

Mary hem wanfala Jew, and hem kam from laen blo King David. (Luke 3:23-31) God hapi tumas lo Mary from hem garem faith and strong for worshipim God. (Luke 1:28) God chusim Mary for hem nao mami blo Jesus. (Luke 1:31, 35) Mary witim hasband blo hem Joseph, garem tu olketa nara pikinini.—Mark 6:3.

Nomata Bible showim dat Mary hem disaepol blo Jesus, hem no storyim staka information abaotem hem.—Acts 1:14.

Why nao samfala ting dat Mary hem mami blo God?

Olketa earliest evidence showim dat wei for worshipim Mary hem start klosap lo mek-fo century C.E. Lo datfala taem, Catholic Church nao State religion blo Roman Empire. From datwan, staka wea garem heathen baekgraon olketa garem nem Christian. Church hem teachim tu Trinity teaching wea no kam from Bible.

Datfala doctrine blo Trinity mekem staka pipol ting if Jesus hem God, then Mary hem mas mami blo God. Lo 431 C.E., wanfala church council lo Ephesus officially talem dat Mary hem “Mami blo God.” Start lo datfala taem, for worshipim Mary hem kamap big afta datfala Council blo Ephesus. And gogo, taem olketa man wea garem heathen baekgraon joinim datfala church, olketa putim piksa and icon blo Virgin Mary for replacem fertility woman god blo olketa Artemis (Olketa lo Rome kolem Diana) and Isis.

Lo 432 C.E., Pope Sixtus III givim order for buildim wanfala church lo Rome for givim honor lo “Mami blo God.” Olketa buildim klosap lo ples wea bifor olketa buildim temple for mekhae lo Lucina, woman god blo olketa lo Rome wea olketa biliv hem savve lukaftarem olketa woman taem olketa bornem baby. Wanfala woman author describem datfala church olsem “taem worship blo Great Mother blo olketa heathen cult hem join witim worship blo Mary, hem nao taem Rome kamap wanfala Christian ples.”—Mary—The Complete Resource.

a Samfala religious denomination teachim dat Mary hem mami blo God. Olketa savve ting lo hem olsem “Queen blo Heven” or Theotokos, wanfala Greek word wea minim “Woman wea bornem God.”