HELP FOR FAMILI
Hao for Kontrolem Kros Blo Iu
Spouse blo iu talem or duim samting wea mekem iu kros, and iu trae for haedem kros blo iu. Bat then hem feel savve dat iu feel nogud and hem gohed for askem iu wat nao rong. Datwan just irritatem iu go moa. Hao nao iu savve kontrolem kros blo iu lo kaen situation olsem?
Wat iu shud savve
Wei for no kontrolem kros savve damagem health blo iu. Research showim dat if man no kontrolem kros datwan savve increasim risk blo hae blood pressure, heart disease, depression, and digestive problem. Olketa sei kros hem link tu witim insomnia, increase anxiety, skin problem, and stroke. Dastawe Bible sei: “Mas no kros . . . , bikos datwan savve mekem nogud samting kamap.”—Psalm 37:8, footnote.
Wei for haedem kros hem savve damagem man tu. Wei for keepim kros hem olsem wanfala disease wea spoelem insaed body. For example, iu savve start for garem negative attitude or wei for criticise. If iu garem kaen tingting olsem bae hem hard for iu stap gud witim narawan and datwan savve spoelem marit blo iu.
Wat iu savve duim
Tingim olketa gud quality blo spouse blo iu. Raetem thrifala quality wea iu admirem abaotem spouse blo iu. Next taem wea iu kros lo eniting wea hem duim, tingim olketa quality hia. Diswan maet helpem iu kontrolem kros blo iu.
Bible principle: “Showimaot iufala thankiu long God.”—Colossae 3:15.
Garem attitude for forgive. First samting, trae for lukim tings from viewpoint blo spouse blo iu. Diswan bae helpem iu for start for understandim hem—wea Bible kolem datwan “sorre witim olketa wea safa.” (1 Peter 3:8) Next samting, tingim diswan, ‘Hao, reason blo mi for kros hem serious tumas dastawe mi no savve forgive?’
Bible principle: “Pipol bae tinghae lo hem sapos hem no tingim rong samting wea samwan duim lo hem.”—Proverbs 19:11.
Kaen taem iu talem feeling blo iu and tingim feeling blo hem. No accusim hem. For example, winim wei for sei, “Iu nating tingim feeling blo mi taem iu no ring for talem mi wea nao iu,” bat instead sei olsem, “Mi wari taem hem leit and mi no savve if iu sef or nomoa.” Wei for kaen taem iu storyim feeling blo iu savve helpem iu for kontrolem kros blo iu.
Bible principle: “Toktok bilong iufala mas evritaem kaen and olsem iufala putim solt long hem.”—Colossae 4:6.
Lisin witim respect. Afta iu talem feeling blo iu, letem spouse blo iu for story and no interruptim hem. Taem spouse blo iu finis story, repeatim bak main point lo story blo hem for lukim if iu understandim wat hem talem. For lisin hem simpol samting bat hem savve barava helpem iu for kontrolem kros blo iu.
Bible principle: “Willing for lisin, no kwiktaem for toktok.”—James 1:19.