Ten Komandment stap lo tufala ston tablet

Wat Nao Ten Komandment blo God?

Ansa from Bible

Ten Komandment hem olketa law wea God givim lo nation blo Israel bifor. Olketa kolem olketa law hia Tenfala Toktok, wea hem literal transleison blo datfala Hebrew expression ʽaseʹreth had·deva·rimʹ. Disfala expression kamap thri taems insaed Pentateuch (Torah), first faevfala buk blo Bible. (Exodus 34:28; Deuteronomy 4:13; 10:4) Sem expression lo Greek hem, deʹka (tenfala) loʹgous (toktok), and hem kamap disfala term “Decalogue.”

God raetem Ten Komandment lo tufala ston tablet and givim lo profet blo hem Moses lo Maunt Sinai. (Exodus 24:12-18) Ten Komandment hia stap lo Exodus 20:1-17 and Deuteronomy 5:6-21.

List blo Ten Komandment

Worshipim only Jehovah God.—Exodus 20:3.
No worshipim idol.—Exodus 20:4-6.
No iusim rong lo nem blo God.—Exodus 20:7.
Keepim Sabbath.—Exodus 20:8-11.
Honorim parents blo iu.—Exodus 20:12.
No murder.—Exodus 20:13.
No duim adultery.—Exodus 20:14.
No steal.—Exodus 20:15.
No talem laea story abaotem narawan.—Exodus 20:16.
No kavet.—Exodus 20:17.

Why nao list blo Ten Komandment hem difren?

Bible no assignim namba lo each komandment. From datwan, pipol garem difren opinion lo hao olketa komandment hia shud arrange. List lo antap hem common arrangement blo olketa law hia. Bat, samfala listim difren lo datfala Ten Komandment. Olketa separatem lo each grup olsem first, second, and last komandment.a

Wat nao purpose blo datfala Ten Komandment?

Ten Komandment hem part lo Law blo Moses. Law hia garem winim 600 komandment and hem formim wanfala agreement, or covenant between God and nation blo Israel bifor. (Exodus 34:27) God promisim pipol lo Israel dat olketa bae garem gud laef if olketa obeyim Law blo Moses. (Deuteronomy 28:1-14) Bat, main purpose blo datfala Law hem for mekem olketa Israelite redi for datfala promis Messiah, or Christ.—Galatians 3:24.

Hao, olketa Christian mas keepim Ten Komandment?

Nomoa. God givim Law blo hem, includim datfala Ten Komandment specifically for nation blo Israel bifor. (Deuteronomy 5:2, 3; Psalm 147:19, 20) Olketa Christian no need for followim Law blo Moses, and even olketa Jew Christian olketa “free from Law.” (Romans 7:6)b “Law blo Christ” wea hem includim evri samting wea Jesus instructim olketa follower blo hem for duim, hem replacem nao Law blo Moses.—Galatians 6:2; Matthew 28:19, 20.

Ten Komandment hem fitim distaem?

Yes. Bikos Ten Komandment showim tingting blo God, and iumi savve benefit from taem iumi studyim olketa komandment hia. (2 Timothy 3:16, 17) Ten Komandment hem base lo olketa reliable principle wea hem never aot of date. (Psalm 111:7, 8) Staka lo olketa principle hia hem faondeson for olketa teaching wea pipol savve kolem lo Niu Testament.—Lukim “Olketa principle from Ten Komandment wea stap lo Niu Testament.”

Jesus teachim dat full Law blo Moses, includim Ten Komandment hem base lo tufala important komandment. Hem sei: “‘Iufala mas lovem Jehovah, God blo iufala, witim full heart blo iufala, witim full laef blo iufala, and witim full mind blo iufala.’ Diswan nao hem first komandment and hem barava important. Mek-tu hem olsem: ‘Iufala mas lovem neiba blo iufala olsem iufala lovem iufala seleva.’ Lo tufala komandment hia nao full Law and Olketa Profet base lo hem.” (Matthew 22:34-40) So nomata olketa Christian no followim Law blo Moses, Jesus talem olketa for lovem God and olketa narawan.—John 13:34; 1 John 4:20, 21.

Olketa principle from Ten Komandment wea stap lo Niu Testament

Principle	Reference lo Niu Testament
Worshipim only Jehovah God	Revelation 22:8, 9
No worshipim idol	1 Corinthians 10:14
Honorim nem blo God	Matthew 6:9
Worshipim God evritaem	Hebrews 10:24, 25
Honorim parents blo iu	Ephesians 6:1, 2
No murder	1 John 3:15
No duim adultery	Hebrews 13:4
No steal	Ephesians 4:28
No talem laea story abaotem narawan	Ephesians 4:25
No kavet	Luke 12:15

a Followim traditional Jewish arrangement olketa “mekem Ex[odus] xx. 2 kam first ‘word,’ and verse 3-6 olsem wan grup; viz., second.” (The Jewish Encyclopedia) Bat olketa Catholic ting dat Exodus chapter 20, verse 1-6, hem shud wanfala singol komandment. Dastawe, komandment for no spoelem nem blo God hem kamap second komandment. For keepim sem namba lo olketa komandment, olketa divaedem last komandment lo tufala separate law, wanfala for no kavetem waef blo neiba and narawan for no kavetem property blo narawan.

b Romans 7:7 iusim mek-ten komandment olsem example blo “Law,” so hem pruvim Law blo Moses hem includim Ten Komandment.