Law Bilong Love Insaed Olketa Heart
“Mi bae putim law bilong mi insaed long olketa, and bae mi raetem insaed heart bilong olketa.”—JEREMIAH 31:33.
1, 2. (a) Wanem nao bae iumi story raonem distaem? (b) Jehovah showimaot hemseleva long Maunt Sinai long wanem wei?
LONG tufala article wea iumi studyim finis, iumi lanem hao feis bilong Moses showimaot glory bilong Jehovah thru long wei wea hem shaen braet tumas taem hem kam daon from Maunt Sinai. Iumi storyim tu wei wea Moses kavarem feis bilong hem. Bae iumi story raonem wanfala samting wea join witim diswan and wea important for olketa Christian distaem.
2 Taem Moses stap long maunten, hem kasem olketa instruction from Jehovah. Long botom bilong Maunt Sinai, olketa Israelite lukim barava spesol wei wea God showim hemseleva. “Thunder and laetning start for kamap, and wanfala big cloud kam antap long maunten and olketa herem wanfala horn hem krae big, and evri pipol wea stap long camp start for seksek. . . . And smoke hem kavarem Maunt Sinai, from Jehovah hem kam daon antap insaed fire, and smoke gohed for go ap olsem smoke bilong wanfala oven, and full maunten hem seksek tumas.”—Exodus 19:16-18.
3. Long wanem wei nao Jehovah givim Ten Komandment long Israel, and gogo, wanem nao disfala nation luksavve long hem?
3 Jehovah story long olketa pipol thru long wanfala angel, and givim olketa Law wea distaem olketa kolem Ten Komandment. (Exodus 20:1-17) So, no eniwan fit for daotem hao Olmaeti God nao givim olketa law hia. Jehovah raetem olketa komandment hia long tufala flat ston, bat Moses brekem tufala taem hem lukim olketa Israelite worshipim datfala gold buluka. Jehovah raetem moa olketa komandment hia long nara tufala ston. Taem Moses karem kam daon olketa ston hia feis bilong hem shaen braet tumas. Evri samting hia hem mekem evriwan luksavve hao olketa law hia hem barava important tumas.—Exodus 32:15-19; 34:1, 4, 29, 30.
4. Why nao Ten Komandment important tumas?
4 Olketa putim tufala flat ston wea garem Ten Komandment insaed ark bilong covenant wea stap insaed Most Holy bilong tabernacle, and bihaen insaed Most Holy bilong temple. Olketa law hia nao main principle bilong datfala Law Bilong Moses and hem faondeson bilong wei wea God rulim pipol bilong hem. Olketa showimaot hao Jehovah leadim wanfala grup pipol wea hem chusim.
5. Hao nao olketa law bilong God for Israel showimaot love bilong hem?
5 Olketa law hia showimaot plande samting abaotem Jehovah, especially wei wea hem lovem pipol bilong hem. Olketa law hem nambawan present for olketa wea obeyim olketa. Wanfala savveman talem hao Ten Komandment winim eni nara law wea olketa man wakem. Jehovah hem sei olsem abaotem datfala full Law Bilong Moses: “Sapos iufala obeyim voice bilong mi evribit and keepim covenant bilong mi, then iufala bae kamap spesol samting bilong mi from midolwan long evri narafala pipol, bikos full earth hem bilong mi. And iufala bae kamap wanfala kingdom bilong olketa priest and wanfala holy nation bilong mi.”—Exodus 19:5, 6.
Law Insaed Heart
6. Wanem law nao savve barava helpem man winim olketa law wea Jehovah raetem long ston?
6 Hem tru, olketa law hia savve barava helpem olketa. Bat waswe, iu savve hao olketa anointed Christian garem samting wea savve barava helpem olketa winim olketa law wea Jehovah raetem long ston? Jehovah talem finis hao hem bae mekem wanfala niu covenant wea difren from Law covenant wea hem mekem witim nation bilong Israel. Hem sei: “Mi bae putim law bilong mi insaed long olketa, and bae mi raetem insaed heart bilong olketa.” (Jeremiah 31:31-34) Jesus, wea hem nao mekem wei for niu covenant kamap, hem no raetem wanfala list bilong olketa law for olketa follower bilong hem. Thru long samting hem talem and duim hem strongim go olketa law bilong Jehovah long mind and heart bilong olketa disaepol bilong hem.
7. Jesus givim “law bilong Christ” long hu nao, and bihaen hu moa acceptim datwan?
7 Bible kolem disfala law, “law bilong Christ.” Jesus no givim diswan long really nation bilong Israel wea born kam long laen bilong Jacob, bat hem givim long wanfala spiritual nation, “datfala Israel bilong God.” (Galatians 6:2, 16; Romans 2:28, 29) Olketa Christian wea spirit anointim nao disfala Israel Bilong God. Bihaen, “wanfala big crowd” from evri nation joinim olketa from olketa tu laek for worshipim Jehovah. (Revelation 7:9, 10; Zechariah 8:23) Olketa kamap olsem “wanfala sekson bilong sheep” wea garem “wanfala shepherd nomoa,” and tufala grup evriwan acceptim “law bilong Christ,” and olketa letem datwan leadim olketa long evri samting wea olketa duim.—John 10:16.
8. Wanem nao samting wea difren saed long Law Bilong Moses and law bilong Christ?
8 From olketa Israelite born kam insaed datfala nation olketa mas obeyim Law Bilong Moses, bat, olketa Christian difren bikos olketa seleva nao chus for obeyim law bilong Christ. Ples olketa kam from and kala skin bilong olketa hem no important. Olketa lane abaotem Jehovah and olketa wei bilong hem and olketa barava laek for duim will bilong hem. God putim law bilong hem “insaed olketa,” and “raetem long heart” bilong olketa. From datwan, olketa anointed Christian no obeyim hem bikos hem savve panisim man nomoa and no bikos hem samting wea olketa mas duim. Samting wea muvim olketa for obey hem moa important and moa strong, and olketa nara sheep garem sem feeling for obey tu bikos olketa garem law bilong God long heart bilong olketa.
Olketa Law wea Garem Faondeson Long Love
9. Hao nao Jesus showimaot love nao faondeson bilong olketa law bilong Jehovah?
9 Love nao main faondeson bilong olketa law bilong Jehovah. Start kam from bifor, love hem main part bilong klin worship. Taem samwan askem Jesus wanem komandment bilong Law nao hem important winim olketa narawan, hem sei: “Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.” Mek-tu hem: “Iu mas lovem neiba bilong iu olsem iuseleva.” Then hem sei: “Tufala komandment hia hem faondeson bilong full Law, and olketa Profet.” (Matthew 22:35-40) Taem Jesus talem diswan hem showimaot hao datfala Law wea garem Ten Komandment, and tu, full Hebrew Scripture olketa garem faondeson long love.
10. Hao nao iumi savve love hem faondeson bilong law bilong Christ?
10 Waswe, love for God and neiba hem faondeson bilong law wea stap long heart bilong olketa Christian tu? Barava nao! Law bilong Christ minim man mas barava lovem God, and tu, followim datfala niu komand for garem love wea muvim man for willing for sakrifaesim hemseleva for narawan. Olketa Christian mas garem semkaen love olsem Jesus, wea willing for sakrifaesim laef bilong hem for olketa fren bilong hem. Hem teachim olketa disaepol for lovem God and lovem each other, olsem wei wea hem lovem olketa. Nambawan love hia wea olketa tru Christian showimaot long each other, hem main samting wea mekem pipol luksavve long olketa. (John 13:34, 35; 15:12, 13) Jesus talem olketa for lovem tu enemy bilong olketa.—Matthew 5:44.
11. Hao nao Jesus showimaot love for God and olketa man?
11 Jesus showimaot perfect example saed long love. Taem hem wanfala strongfala angel long heven, hem hapi for acceptim chance for kam daon long earth for duim waka bilong Dadi bilong hem. Hem no just sakrifaesim laef bilong hem for mekem olketa narawan savve laef olowe, bat tu, hem showim pipol wanem kaen fasin nao olketa shud garem. Hem hambol, kaen, tingim olketa narawan, and hem helpem olketa wea stragol and kasem hevi long laef. Hem storyim tu “olketa samting wea bae mekem man kasem laef olowe,” and hem olowe gohed for helpem olketa narawan for savve long Jehovah.—John 6:68.
12. Why nao iumi fit for sei love for God and neiba hem barava join tugeta?
12 Love for God and neiba, hem barava join tugeta. Aposol John hem sei: “Love hem kam from God . . . Sapos eniwan hem sei: ‘Mi lovem God,’ bat hem heitim brata bilong hem, hem laea nao. Hard for man lovem God wea hem no savve lukim, sapos hem no lovem brata bilong hem wea hem savve lukim.” (1 John 4:7, 20) Jehovah nao start bilong love and hem nao love. Love nao muvim hem for duim evri samting. Iumi savve showimaot love bikos hem wakem iumi for olsem hem. (Genesis 1:27) Taem iumi lovem narawan, hem showimaot iumi lovem God.
For Showimaot Love Iumi Mas Obey
13. For iumi lovem God, wanem nao iumi mas duim fastaem?
13 Hao nao iumi savve lovem God wea iumi no savve lukim? Barava important samting for duim fastaem hem nao for savve long hem, from tru nao, iumi hard for lovem or trustim wanfala stranger. Dastawe, Word bilong God encouragem iumi for savve long God thru long wei for readim Bible, prea, and wei for kaban witim olketa wea savve finis long hem and wea lovem hem. (Psalm 1:1, 2; Philippians 4:6; Hebrews 10:25) Fofala Gospel savve barava helpem iumi, bikos laef and ministry bilong Jesus hem showimaot olketa fasin bilong Jehovah. Wei wea iumi laek for obeyim God and for followim olketa fasin bilong hem, savve kamap barava strong taem iumi savve moa samting abaotem hem and tinghae long love wea hem showimaot long iumi. Tru nao, wei for obey hem join witim love for God.
14. Why nao iumi fit for sei olketa law bilong God olketa no wanfala hevi?
14 Taem iumi lovem samwan, iumi savve wanem olketa laekem and no laekem, and iumi duim samting followim datwan. Iumi no laek for mekem olketa wea iumi lovem for feel nogud. Aposol John hem sei: “For lovem God hem minim iumi mas obeyim olketa komandment bilong hem; bat olketa komandment bilong hem no wanfala hevi.” (1 John 5:3) Olketa no wanfala hevi and no staka tumas. Love savve showim iumi wanem for duim. Iumi no need for baeheartim plande law for savve evri samting wea iumi mas duim; love for God nao mekem iumi savve. Olketa law bilong God no wanfala hevi, bikos wei for servem olketa wea iumi lovem hem savve mekem iumi hapi. Sapos iumi lovem God, iumi hapi for duim wanem hem laekem. Taem iumi duim datwan, God acceptim iumi, and iumi savve kasem gud samting bikos evritaem samting wea hem talem savve helpem iumi.—Isaiah 48:17.
15. Wanem nao bae muvim iumi for followim example bilong Jehovah? Explainim datwan.
15 Love for God muvim iumi for followim fasin bilong hem. Taem iumi lovem samwan, iumi barava tinghae long fasin bilong hem and iumi laek for followim example bilong hem. Tingim wei wea Jehovah and Jesus fren tugeta. Tufala stap tugeta long heven for maet plande billion year. Love wea tufala garem for each other hem perfect and barava strong. From Jesus barava showimaot olketa fasin bilong Dadi bilong hem long heven long perfect wei, hem fit for sei long olketa disaepol bilong hem: “Man wea lukim mi hem lukim Father tu.” (John 14:9) Taem iumi gohed for savve gud and tinghae long Jehovah and Son bilong hem, love hem muvim iumi for followim example bilong tufala. Holy spirit and love bilong iumi for Jehovah, savve helpem iumi for “tek aotem oldfala fasin witim olketa wei bilong hem, and werem datfala niufala fasin.”—Colossians 3:9, 10; Galatians 5:22, 23.
Love Showaot Thru Long Samting Iumi Duim
16. Hao nao preaching and teaching waka bilong iumi hem showimaot iumi lovem God and neiba?
16 From iumi olketa Christian, iumi letem love bilong iumi for God and neiba muvim iumi for preach abaotem Kingdom and mek disaepol. Taem iumi duim diswan, iumi mekem Jehovah God hapi from “will bilong hem nao for evri difren kaen man mas sev and kasem stretfala savve bilong truth.” (1 Timothy 2:3, 4) So iumi savve hapi fogud taem iumi helpem olketa narawan mekem God raetem law bilong Christ insaed heart bilong olketa. And iumi hapi tumas for lukim wei wea fasin bilong olketa change and olketa showimaot olketa fasin bilong Jehovah. (2 Corinthians 3:18) Tru nao, taem iumi helpem narawan for savve long God iumi givim wanfala spesol present wea winim eni narawan. Olketa wea acceptim wei for fren witim Jehovah bae kasem hapi from datwan for olowe.
17. Why nao hem wise for mekem grow love for God and neiba winim olketa material samting?
17 Iumi distaem stap long taem wea pipol barava tinghae and lovem olketa material samting. Bat olketa material samting no savve stap for olowe. Pipol savve stealim or hem savve kamap nogud. (Matthew 6:19) Bible warnim iumi: “World and evri samting wea pipol long world laekem hem gogo for finis, bat man wea duim will bilong God bae stap for olowe.” (1 John 2:16, 17) Tru nao, Jehovah bae stap for olowe, and olketa wea lovem and servem hem bae stap for olowe tu. So waswe, iu agree hao hem wise for iumi lovem God and pipol, winim wei for aftarem olketa samting bilong disfala world wea bae stap for lelebet taem nomoa?
18. Hao nao wanfala missionary showimaot love wea no selfish?
18 Olketa wea showimaot love mekem Jehovah kasem praise. Tingim Sonia, wanfala missionary long Senegal. Hem studyim Bible witim wanfala woman wea nem bilong hem Heidi. Heidi kasem HIV from hasband bilong hem. Bihaen hasband bilong hem dae, Heidi hem baptaes, bat no longtaem nomoa hem start for sik big, and hem mas admit long hospital from hem garem AIDS. Sonia hem sei: “Olketa wea waka long hospital duim best bilong olketa, bat olketa no staka. Olketa long kongregeson help for lukaftarem hem long hospital. Long mek-tu naet, mi sidaon long mat saed long bed bilong hem and lukaftarem hem go kasem taem hem dae. Doctor wea stap long datfala taem hem sei: ‘Bigfala problem wea mifala feisim hem wei wea nomata olketa relative bat no laek for lukaftarem olketa wea garem AIDS tu. Why nao iu willing for lukaftarem hem, nomata iu savve hem isi for iu kasem wanfala sik, and tu, iu no relative bilong hem, and iu no kam from sem kantri or garem sem kala skin?’ Mi talem hem hao Heidi hem olsem really sista bilong mi, hem olsem mitufala born from wan dadi and mami. From mitufala Heidi fren gud tumas, mi hapi for lukaftarem hem.” Sonia hem no kasem eni sik from loving wei wea hem lukaftarem Heidi.
19. From iumi garem law bilong God insaed heart bilong iumi, iumi mas mekius long wanem samting?
19 Plande servant bilong Jehovah distaem showimaot kaen love olsem wea no selfish. Iumi no garem wanfala list bilong olketa law for mekem iumi luksavve long pipol bilong God distaem. Bat iumi savve lukim wei wea disfala toktok long Hebrews 8:10 hem fulfill: “Jehovah hem sei: ‘Diswan nao covenant wea bae mi mekem witim haos bilong Israel bihaen datfala taem. Bae mi putim olketa law bilong mi insaed mind bilong olketa and bae mi raetem olketa insaed heart bilong olketa. And bae mi kamap God bilong olketa, and olketa bae kamap pipol bilong mi.’” Iumi mas tinghae olowe long law bilong love wea Jehovah raetem long heart bilong iumi, and iumi mas mekius long evri chance iumi kasem for showimaot love.
20. Why nao law bilong Christ hem wanfala barava spesol samting?
20 Iumi hapi tumas from iumi servem God tugeta witim wanfala sekson bilong olketa brata evriwea long world wea showimaot love olsem! Olketa wea garem law bilong Christ insaed long heart bilong olketa garem spesol samting tumas nomata olketa stap insaed world wea no garem love. Olketa hapi from Jehovah lovem olketa, and tu, olketa barava hapi long strongfala love midolwan olketa Christian brata and sista. “Lukim! Hem gud and naes tumas for olketa brata stap tugeta long wan mind!” Nomata Olketa Jehovah’s Witness stap long plande kantri, iusim plande difren languis, and garem plande difren kastom, olketa garem wan mind midolwan olketa seleva wea no eni nara pipol garem. Wei for wan mind olsem mekem Jehovah blessim olketa. Man for raetem psalm hem sei olsem: “[Midolwan pipol wea love mekem olketa garem wan mind], Jehovah komandim olketa blessing for stap, wea datwan nao laef go kasem taem olowe.”—Psalm 133:1-3.
Wanem Nao Ansa Bilong Iu?
• Hao important nao Ten Komandment?
• Wanem nao datfala law wea God raetem long heart?
• Hao important nao love saed long “law bilong Christ”?
• Long olketa wanem wei nao iumi savve showimaot love for God and neiba?
[Piksa long page 25]
God raetem olketa law for Israelite long tufala flat ston
[Olketa Piksa long page 26]
God putim law bilong hem insaed heart bilong olketa Christian
[Piksa long page 28]
Sonia witim wanfala gele from Senegal long 2004 distrik convention