Wat Nao Bible Talem Abaotem Abortion?

Ansa wea Bible givim

Bible no iusim datfala English word “abortion,” wea minim for killim dae and aotem baby wea stap lo bele blo mami blo hem. Nomata olsem, staka verse lo Bible storyim tingting blo God abaotem laef blo pipol, wea insaed diswan tu hem laef blo olketa baby wea no born yet.

Laef hem wanfala present from God. (Jenesis 9:6; Sams 36:9) Lo tingting blo God, laef blo pipol hem spesol, wea minim tu laef blo olketa baby wea stap yet lo bele blo mami. So, sapos samwan hem min for killim dae wanfala baby wea no born yet, datwan hem murder.

Law blo God for olketa Israelite hem sei: “Sapos samfala man faet and olketa killim wanfala woman wea babule and pikinini blo hem kamaot early bat hem no dae, man wea killim woman hia mas peim compensation fitim wanem hasband blo woman hem markem and wea olketa judge agree witim. Bat sapos eniwan lo tufala dae, iufala mas changem laef for laef.”—Exodus 21:22, 23, NWT.a

• Wat taem nao laef blo man hem start?

• Waswe, God bae forgivim samwan wea killim dae baby lo bele?

• Waswe, hem rong for killim dae baby lo bele taem laef blo mami or baby stap lo danger?

Wat taem nao laef blo man hem start?

Lo tingting blo God laef blo samwan hem start taem hem start for grow olsem baby insaed lo bele blo mami. Lo Word blo God, Bible, God evritaem storyim baby wea no born yet olsem hem wanfala really man. Tingim samfala example wea showimaot God ting lo baby lo bele hem semsem olsem samwan wea born finis.

• Holy spirit muvim King David for sei lo God: “Taem mi no bon kam yet, yu lukim mi.” (Sams 139:16) God tingim David hem really man nomata lo taem wea hem no born yet.

• And tu, nomata bifor profet Jeremiah hem born, God savve hem bae iusim Jeremiah lo spesol wei. God sei lo hem: “Jeremaea. Taem mi no wakem yu yet insaet long bele blong mami blong yu, mi save long yu finis. Ya, taem yu no bon kam yet, mi bin makem yu fo wanfala spesol waka. An mi nao siusim yu fo kamap profet blong mi wea bae yu talemaot toktok blong mi long olketa kantri long wol.”—Jeremaea 1:5.

• Luke, wea hem wanfala doctor and wea raetem samfala part lo Bible, hem iusim sem Greek word for storyim baby wea no born yet olsem hem iusim for storyim baby wea born finis.—Luke 1:41; 2:12, 16.

Waswe, God bae forgivim samwan wea killim dae baby lo bele?

Olketa wea killim dae baby lo bele savve kasem forgiveness from God. Sapos olketa changem tingting blo olketa for garem sem tingting wea God garem abaotem laef, olketa no need for feel guilty tumas. “[Jehovah] hemi sore long yumi, an hemi kaen tumas long yumi . . . Hemi gohed fo tekem go farawe olketa sin blong yumi, olsem ples wea san hemi kamap hemi farawe from ples wea san hemi godaon.”b (Sams 103:8-12) Jehovah bae forgivim evriwan wea repent from olketa sin wea olketa duim bifor, wea insaed diswan tu hem wei for killim dae baby lo bele.—Sams 86:5.

Waswe, hem rong for killim dae baby lo bele taem laef blo mami or baby stap lo danger?

Iumi storyim finis wanem Bible talem abaotem laef blo baby wea no born yet. Wanem iumi storyim finis hem showimaot hem no stret for samwan killim dae baby lo bele lo taem wea laef blo datfala mami or baby maet stap lo danger.

Waswe sapos, lo taem wea mami bornem datfala baby wanfala emergency happen and olketa doctor savve sevem nomoa laef blo mami or baby, no tufala evriwan? Diswan hem samting wea no happen staka taem. Lo taem olsem, olketa wea insaed disfala situation bae need for disaed sapos olketa bae trae for sevem laef blo datfala mami or datfala baby.