Kwestin From Reader

Waswe, baby wea dae insaed long bele hem savve laef moa long future?

Sapos iumi no lusim eni baby olsem wea dae long bele, maet hem hard for tingim feeling bilong dadi and mami wea kasem datwan. Samfala mami and dadi barava sorre tumas taem olketa lusim baby bilong olketa. Wanfala mami hem babule faevfala taem and hem lusim olketa baby hia bifor olketa born. Bat bihaen, hem babule tufala taem moa and hem bornem tufala healthy baby. Nomata olsem, disfala mami no forgetim faevfala baby hia. Evri year hem bae kaontem haomas year nao olketa, sapos olketa laef. Waswe, olketa Christian savve garem hope for baby wea dae long bele for laef bak moa long future?

Iumi no savve. Bible no storyim sapos wanfala baby wea dae insaed long bele, hem savve laef moa long future or nomoa. Nomata olsem, iumi savve ting raonem samfala scripture wea savve comfortim iumi.

Tingim tufala kwestin hia. First wan, long tingting bilong Jehovah, waswe, laef bilong baby hem start taem mami babule or taem mami bornem baby? Mek-tu, wanem nao tingting bilong Jehovah abaotem baby wea no born yet? Bible garem gudfala ansa for tufala kwestin hia.

Law bilong Moses talem hao laef hem start taem mami hem babule and no long taem baby hem born. Hao nao olsem? Exodus 21:​22, 23 talem hao man wea killim dae baby insaed long bele hem mas dae tu. Hem sei: “Iufala mas changem laef for laef.”a Nomata baby wea no born yet, hem wanfala laef nao. Disfala tru samting helpem plande million Christian for luksavve hao wei for killim dae baby insaed long bele hem bigfala sin againstim God.

Long tingting bilong Jehovah baby wea no born yet hem wanfala laef, bat waswe, hem important long hem? Law long Exodus 21:​22, 23 talem hao man wea duim eni samting wea mekem baby insaed long bele dae, datfala man mas dae tu. Tru tumas, God barava tinghae long laef bilong baby wea no born yet. Nara samting tu, staka scripture showimaot hao Jehovah ting long baby wea no born yet olsem hem wanfala man nao. Tingim diswan. King David sei olsem abaotem Jehovah: “Iu wakem mi haed insaed long bele bilong mami bilong mi. . . . Iu lukim mi finis from taem mi start nomoa insaed bele, nomata taem olketa part bilong body just start, iu raetem finis evri part hia insaed buk bilong iu.”​—⁠Ps. 139:​13-​16; Job 31:​14, 15.

Jehovah savve lukim tu olketa wei bilong man nomata hem insaed long bele yet and wanem hem maet duim taem hem big finis. Taem Rebekah waef bilong Isaac hem babule witim tufala twin, Jehovah talem profesi hao tufala boy hia bae faet insaed bele bilong mami bilong tufala. Diswan showimaot Jehovah lukim finis samfala wei bilong tufala and hao samting wea kamaot from wanem tufala disaedem savve helpem or spoelem staka pipol.​—⁠Gen. 25:​22, 23; Rom. 9:​10-​13.

Tingim John Baptaesa. Bible hem sei: “Taem Elizabeth herem toktok bilong Mary, pikinini insaed bele bilong hem jamp nao. God givim holy spirit long Elizabeth.” (Luke 1:​41) Luke wea hem wanfala doctor iusim sem Greek word for minim smol baby insaed long bele and baby wea just born. Hem iusim tu datfala sem word taem hem story abaotem Jesus wea leidaon long ples for putim kaikai bilong animal long hem.​—⁠Luke 2:​12, 16; 18:⁠15.

So waswe, Bible storyim baby wea insaed bele hem difren from baby wea just born? Luk olsem nomoa. Datwan hem stret witim wanem olketa savveman lanem distaem. Tingim diswan. Samfala savveman lanem hao baby insaed long bele hem savve feelim and duim samting followim wanem hem herem wea gogo hed aotsaed. Dastawe mami savve lovem tumas baby wea grow insaed long bele bilong hem.

Evri baby no semsem long taem wea olketa born. Tingim diswan. Wanfala mami bornem baby bifor taem bilong hem and hem laef, bat bihaen tu-thri day baby dae. Nara mami hem kasem taem for hem bornem baby, bat baby hia dae just bifor hem born. Waswe, hem fitim for first mami tingse baby bilong hem bae laef bak moa bikos hem born finis bifor hem dae, and baby bilong nara mami hem bae no laef bak moa bikos hem dae bifor hem born?

Wanem nao iumi lanem? Bible talem hao laef hem start taem mami babule and Jehovah ting long datfala laef olsem wanfala man nao. From samting wea iumi lukim long Bible, hem no fitim for iumi sei wanfala bae laef bak and narawan nomoa. Sapos eniwan garem datfala tingting, hem againstim olketa tru samting wea Bible talem hao laef hem start taem mami babule and Jehovah ting long datfala laef olsem wanfala man nao. Hem nao why iumi againstim wei for killim dae baby long bele.

Long bifor kam, Wastaoa magasin mekem samfala for tingse baby wea dae bifor hem born maet no laef bak moa. Wanfala Wastaoa magasin askem disfala kwestin: Long Paradaes, waswe, bae God putim bak long bele bilong mami wanfala baby? Governing Body prea abaotem, ting raonem, studyim gud moa and disaedem hao kwestin olsem no fitim, bikos hem no join witim sapos baby bae laef bak or nomoa. Jesus hem sei: “God savve duim eni samting.” (Mark 10:27) God tekem laef bilong Jesus from heven and putim insaed long bele bilong wanfala young woman. Datwan hem samting wea no eni man savve duim.

From iumi savve long evri samting hia, waswe, Bible hem teachim hao olketa baby wea dae bifor olketa born savve laef bak? Iumi no really savve and hem nao point wea Governing Body laek for strongim long iumi. Bible no ansarem diswan. Iumi no garem eni scripture for pruvim sapos olketa bae laef bak or nomoa. Diswan maet mekem iumi for garem staka nara kwestin moa. Bat hem gud for iumi no trae for disaedem wanem nao bae happen. Iumi savve long diswan: Jehovah God wea garem bigfala love and wea kaen and sorre long pipol nao bae disaedem diswan. (Ps. 86:15) Hem tru tumas, Jehovah barava laek finisim sorre wea man kasem taem samwan hem dae, bikos hem bae mekem man laef bak moa. (Job 14:​14, 15) Iumi savve Jehovah evritaem duim stret samting. Jehovah bae finisim evri nogud feeling wea iumi kasem long laef bilong iumi distaem long disfala rabis world taem hem mekem Son bilong hem for “finisim olketa samting wea Devil duim.”​—⁠1 John 3:⁠8.

[Footnote]

[Piksa long page 13]

Jehovah bae finisim evri nogud feeling wea iumi kasem