JW Satellite Channel Kasem Olketa Ples wea No Garem Internet

Each month, iumi luk forward for watchim olketa spiritual program and video wea olketa releasem lo JW Broadcasting. Bat plande brata and sista lo Africa no savve lukim olketa program hia lo Internet. Why nao olsem?

Staka ples lo Africa no garem gudfala Internet. And lo olketa ples wea garem Internet, hem savve slow or expensive tumas. Olsem example, wanfala circuit overseer lo Madagascar daonlodim wan program lo JW Broadcasting nomoa lo Internet café. Hem mas peim $16, wea datwan hem winim pei wea samfala pipol kasem insaed wan week!a

Nomata problem olsem hem happen, staka million pipol lo Africa distaem savve enjoyim JW Broadcasting nomata olketa no garem Internet. Hao nao olsem?

Start kam lo 2017, olketa wea stap lo sub-Saharan Africa savve lukim JW Broadcasting thru lo wanfala satellite-television channel. Disfala channel hem free, and pipol savve watchim 24 hour lo day, evriday lo week, lo 16-fala languis.

For duim diswan, Olketa Jehovah’s Witness rentim wanfala channel from wanfala television broadcast service for pleim olketa video blo iumi thru lo satellite blo olketa. Signal blo datfala satellite savve catch lo samting olsem 35 kantri lo sub-Saharan Africa. Kost blo datfala channel hem winim $12,000 each month. And samfala taem, olketa mas peim extra selen for duim broadcast lo olketa spesol program blo iumi lo nara channel, olsem olketa convention or branch visit. Diswan mekem staka thousand savve enjoyim olketa program hia.

Plande pipol, witim olketa wea no Witness tu, savve watchim JW satellite channel lo TV lo haos blo olketa. Bat staka brata no garem inaf selen for baem equipment wea olketa needim for watchim datfala satellite channel. For helpem olketa, olketa brata setimap olketa equipment hia lo winim 3,670 Kingdom Hall, mekem olketa brata and sista savve watchim JW Broadcasting lo there. Kost blo equipment hia witim transport hem samting olsem $70 sapos Kingdom Hall garem finis wanfala TV or projector. Sapos nomoa, kost hem samting olsem $530.

Olketa brata and sista blo iumi tinghae tumas lo disfala channel. Wanfala elder lo Cameroon sei: “Hem olsem manna wea mifala kasem lo midol lo desert for famili blo mifala.” Odebode, wanfala brata lo Nigeria, sei: “Mifala famili watchim disfala channel thrifala taem lo week. Olketa pikinini blo mi luk forward lo diswan. Olketa savve ask for changem channel mekem olketa savve watchim JW channel lo olketa nara taem tu.” Rose, wea stap lo Nigeria tu, sei: “Bifor, mi watchim nius channel olowe, bat distaem mi watchim JW satellite channel. Taem mi lukim nius, mi savve feel nogud lo wanem mi lukim and blood pressure blo mi savve go ap. Bat JW Broadcasting barava encouragem mi and mekem mi relax! Hem fevaret channel blo mi. Hem big blessing from Jehovah.”

Wanfala circuit overseer lo Mozambique talem dat lo circuit blo hem, olketa Kingdom Hall garem finis equipment for catch lo datfala satellite channel. Olketa brata and sista lo olketa kongregeson hia arrive wan hour bifor meeting hem start, or winim datwan, for watchim JW Broadcasting thru lo satellite.

Lo 2019 international convention lo Johannesburg, South Africa, olketa brata iusim datfala channel for mekem 9-fala ples herem samfala main tok, witim olketa tok wea wanfala member blo Governing Body givim. Sphumelele, from Broadcasting Department lo South Africa branch sei: “Bifor, mifala mas sendem olketa tok hia thru lo Internet. Bat iumi mas garem gudfala Internet and peim datwan tu. Disfala JW satellite channel hem no expensive tumas and savve waka gud.”

From olketa kaenfala donation wea iumi kasem for olketa waka raonem world, staka brata and sista lo Africa savve watchim JW Broadcasting thru lo satellite. Mifala barava tinghae lo olketa donation wea iumi givim lo olketa difren wei lo donate.jw.org.