HAO MIFALA IUSIM OLKETA DONATION WEA IUFALA GIVIM
Disaster Relief lo 2021—Helpem Olketa Brata and Sista blo Iumi
JANUARY 1, 2022
Lo 2021 service year,a pipol lo world gohed safa bikos lo COVID-19 pandemic. Olsem iumi explainim lo article “Global Relief for a Global Pandemic,” iumi spendem plande million dollarb lo pandemic relief and startim winim 950 Disaster Relief Komiti.
Tru tumas, taem pandemic spred lo staka ples, olketa natural disaster witim olketa disaster wea man kosim happen tu and diswan affectim olketa brata and sista blo iumi raonem world. Lo winim 200 lo olketa disaster hia, Coordinators’ Komiti blo Governing Body appruvim for olketa spendem $8 million antap lo selen wea olketa iusim for provaedem relief supply for COVID-19. Tingim tufala disaster wea happen no longtaem go nomoa wea olketa donation blo iu helpem olketa brata and sista.
Maunt Nyiragongo Hem Bosta
Lo May 22, 2021, Maunt Nyiragongo, wanfala volkeno lo Democratic Republic of the Congo, start for bosta. Lava wea flow kam distroem olketa haos, skul, and wanfala wata supply. Bat hem no lava nomoa wea danger for olketa pipol. For staka day bihaen volkeno hem bosta, barava nogud dust from volkeno foldaon lo datfala city Goma and staka smol earthquake happen. Winim haf lo olketa pipol wea stap lo city mas ranawe lo sef ples. Staka handred thousand ranawe, and samfala akrosim border for go lo Rwanda.
Lo wanfala Kingdom Hall property, relief komiti provaedem hot porridge
Samting olsem 5,000 Jehovah’s Witness mas ranawe. Volkeno distroem haos blo samfala brata and sista, and pipol stealim olketa samting from haos blo olketa narawan. Olketa relief komiti lo Rwanda and lo Democratic Republic of the Congo waka tugeta for provaedem relief. Congo (Kinshasa) branch report olsem abaotem wanfala relief komiti: “Nomata evriting lo city hem barava olobaot and gavman no announcem yet for pipol ranawe, komiti start for givimaot kaikai, wata, olketa bedsheet and blanket, and kaleko.” Lo wanfala taon wea winim 2,000 brata and sista hipap, wanfala relief komiti setimap olketa tent, givimaot olketa mask, and explainim hao for olketa stap sef from COVID-19 and cholera.
Olketa weim olketa bag kaikai bifor olketa givimaot lo olketa Witness wea disaster spoelem
For thrifala month bihaen disaster, olketa brata givimaot winim sixfala ton rice, sixfala ton maize flour, 8,000 liter oil for kuki, and 8,000 liter wata. For sevem selen, branch arrange for peim staka kaikai wantaem lo datfala kantri winim wei for orderim kaikai wea moa expensive from olketa nara kantri.
Wanfala sista wea haos blo hem distroe bikos volkeno hem bosta sei: “Mifala feel wikdaon tumas and sorre.” Bat then famili blo hem kasem material help and encouragement for gohed faithful. Hem sei distaem: “Witim help blo Jehovah, mifala still kasem wanem mifala needim. Mifala lukim Jehovah karem hevi blo mifala and mekem hem isi for mifala deal witim.”
Big Problem Saed lo Selen lo Venezuela
Big problem saed lo selen hem gohed for plande year lo Venezuela. Olketa brata kasem hard taem saed lo living, no garem inaf kaikai, and crime kamap big tumas lo there. Bat organization blo Jehovah no forgetim olketa.
Olketa loadim olketa bag rice for transportim lo olketa difren area lo Venezuela
Lo last service year, organization blo iumi spendem winim $1.5 million for peim and transportim kaikai and soap for olketa famili wea needim help. Venezuela branch givim report olsem: “Hem no isi for transportim 130 ton kaikai each month lo evri ples lo kantri and then for mek sure olketa brata wea really needim kaikai hia savve kasem datwan.” For mek sure kaikai hia no savve rotten, plande taem olketa brata sendem kaikai wea savve last longtaem. Branch sei tu: “Mifala trae for peim plande kaikai wantaem nomoa and baem kaikai wea hem season for harvestim bikos price hem moa cheap. Then mifala chusim best wei for transportim wea no expensive tumas.”
From kantri hem short lo fuel and no staka trak stap, olketa young brata raedem baesikol blo olketa for total blo 18 kilometer for givimaot kaikai for olketa lo kongregeson blo olketa
Leonel, wanfala member lo Disaster Relief Komiti lo Venezuela, laekem tumas assignment blo hem. Hem sei: “Relief waka hem spesol. Disfala privilege barava encouragem mi bihaen waef blo mi dae lo COVID-19. Hem mekem mi busy and feel gud bikos mi savve helpem olketa brata wea garem need. Miseleva lukim hao Jehovah keepim promis blo hem for no lusim pipol blo hem.”
Wanfala brata wea kasem relief supply, hem tu bin waka lo wanfala relief komiti bifor. Hem sei: “Distaem mi nao needim help. Mi and waef blo mi no just kasem olketa material samting, bat olketa brata helpem mitufala for no wari. Olketa lukaftarem mitufala, sorre lo mitufala, and encouragem mitufala.”
Samfala taem olketa disaster seknomoa happen or iumi herem warning and no longtaem bihaen disaster hem happen. Bat plande taem, organization blo Jehovah savve kwiktaem kasem and transportim olketa relief supply bikos lo donation wea iu givim for waka raonem world. Samfala wei wea iumi savve givim donation hem stap lo donate.jw.org. Mifala tinghae lo donation wea iu givim.
a Datfala 2021 service year hem start lo September 1, 2020 go kasem August 31, 2021.
b Evri selen wea article storyim hem lo U.S. dollar.