STUDY ARTICLE 18
Encouragem Each Other lo Olketa Kongregeson Meeting
“Iumi mas barava tingim narawan . . . [and] encouragem narawan.”—HEB. 10:24, 25.
SONG 88 Mekem Mi Savve Olketa Wei Bilong Iu
ARTICLE BAE STORYIMa
1. Why nao iumi koment lo olketa meeting?
WHY nao iumi attendim olketa kongregeson meeting? Main samting, hem for praisem Jehovah. (Ps. 26:12; 111:1) Iumi attendim olketa meeting tu mekem iumi savve encouragem each other lo olketa hard taem wea iumi feisim distaem. (1 Thess. 5:11) Iumi duim tufala samting hia taem iumi handsap and givim koment.
2. Olketa wanem chance nao iumi garem for koment lo meeting?
2 Each week, iumi garem chance for koment lo olketa meeting. For example, lo weekend meeting, iumi savve koment lo Wastaoa Study. Lo midol week meeting, iumi savve koment lo Faendem Gudfala Point, Kongregeson Bible Study, and lo olketa nara part wea iumi savve story tugeta.
3. Wat nao samfala challenge wea maet iumi feisim taem iumi laek koment, and hao nao Hebrew 10:24, 25 helpem iumi?
3 Iumi evriwan laek for praisem Jehovah and encouragem olketa brata and sista. Bat taem iumi laek for koment, maet iumi feisim samfala challenge. Maet iumi fraet for givim koment, or maet iumi laek for givim staka koment bat staka taem conductor no kolem iumi. Hao nao iumi savve deal witim olketa challenge hia? Wanem Paul talem lo leta blo hem for olketa Hebrew Christian savve helpem iumi. Taem hem storyim why hem important for meet tugeta, hem talem hao main goal blo iumi hem for “encouragem narawan.” (Readim Hebrew 10:24, 25.) Iumi bae no fraet tumas for handsap if iumi tingim hao wanfala simpol koment wea iumi givim wea showimaot faith blo iumi, savve encouragem olketa narawan. And if conductor no kolem iumi staka taem, iumi hapi nomoa bikos olketa narawan lo kongregeson bae garem chance for koment.—1 Pet. 3:8.
4. Wat nao thrifala point wea iumi bae storyim lo disfala article?
4 Lo disfala article, firstaem bae iumi storyim hao iumi savve encouragem each other insaed smol kongregeson wea staka no stap for koment. Then iumi bae storyim hao iumi savve encouragem each other lo big kongregeson wea staka nao handsap for koment. Last samting, bae iumi discussim hao iumi savve encouragem olketa narawan lo wat iumi talem lo koment blo iumi.
ENCOURAGEM EACH OTHER INSAED SMOL KONGREGESON
5. Hao iumi savve encouragem each other if olketa wea attendim meeting no staka?
5 Lo olketa smol kongregeson or grup hem no garem staka pablisa for koment. Samfala taem, maet conductor weit lelebet longtaem bifor samwan handsap for koment. Taem olsem, maet meeting hem boring and no encouragem kongregeson. Wat nao iu savve duim? Hem gud for handsap staka taem. Taem iu duim olsem, maet iu encouragem olketa narawan tu for koment staka taem.
6-7. Wat nao iumi savve duim for katem daon feeling for fraet for koment?
6 Waswe sapos iu fraet tumas for koment? Staka feel olsem tu, bat for encouragem olketa brata and sista, iu need for duim samting for mekem iu no fraet. Wat nao bae iu duim?
7 Samfala idea wea savve helpem iu, hem stap lo olketa Wastaoa article wea kamap finis.b For example, iumi need for prepare gud. (Prov. 21:5) Taem iu studyim gud datfala information, bae hem moa isi for iu givim olketa koment. And tu, givim olketa short koment. (Prov. 15:23; 17:27) Taem ansa blo iu short bae iu no fraet tumas. Wanfala short koment wea maet wan or tu sentence, hem bae isi for olketa brata and sista minim winim wanfala long koment wea staka idea nao insaed. Short koment wea iu talem lo own toktok blo iu showimaot iu prepare gud and minim datfala information.
8. Taem iu duim best blo iu, hao nao Jehovah ting lo datwan?
8 Hao if iu traem samfala lo olketa idea hia, bat iu still fraet for givim winim wanfala koment? No wari, Jehovah tinghae lo best wea iu fit for givim. (Luke 21:1-4) For duim best blo iu hem no minim iu bae duim wanem iu no fit for duim. (Phil. 4:5) Disaedem wat iu savve duim, markem goal for kasem datwan, and askem Jehovah for helpem iu for no fraet. Firstaem, markem goal for givim wanfala short koment.
ENCOURAGEM EACH OTHER LO BIG KONGREGESON
9. Wanem challenge nao iu savve feisim lo big kongregeson?
9 Sapos iu lo wanfala big kongregeson, iu bae feisim difren challenge. Maet staka brata and sista givim koment, so olketa no kolem iu nomata iu handsap. For example, Sista Danielle, hem evritaem laek for givim koment lo olketa meeting.c Hem ting lo datwan olsem, part lo worship blo hem, wanfala wei for encouragem olketa narawan, and hem strongim truth insaed lo mind blo hemseleva. Bat taem hem muv go lo wanfala big kongregeson olketa no kolem hem staka taem. And samfala taem, nomoa nao. Hem sei: “Mi savve feel nogud, mi feel olsem mi misstim nao datfala privilege. Taem hem happen staka taem, mi start for tingse olketa min for duim nomoa.”
10. Wat nao iu savve duim for garem chance for koment?
10 Waswe, iu tu feel olsem Danielle? If olsem, maet iu ting for givap and just sidaon nomoa and lisin lo meeting. Hem gud for no givap for trae for koment. Wat nao iu savve duim for helpem iu? Maet hem gud for iu preparem tu-thri koment for each meeting, then if conductor no chusim iu lo start, iu still garem chance for koment lo meeting. Taem iu preparem Wastaoa Study article, ting abaotem hao datfala paragraf join witim theme blo article. If iu duim olsem, bae iu garem staka naes koment for givim lo full article. And tu, maet hem gud for preparem koment lo olketa paragraf wea storyim olketa deep truth wea maet no isi for explainim. (1 Cor. 2:10) Why nao olsem? Bikos staka nao maet no handsap lo datfala paragraf. Hao sapos iu followim olketa idea hia bat bihaen tu-thri meeting, iu still no garem chance for koment? Maet iu savve story witim conductor bifor lo meeting, and talem hem paragraf wea iu laek ansa lo hem.
11. Wat nao Philippi 2:4 encouragem iumi for duim?
11 Readim Philippi 2:4. Spirit blo Jehovah muvim aposol Paul for encouragem olketa Christian for tingim narawan. Hao nao iumi savve followim datfala kaonsel lo olketa meeting? Iumi duim datwan, taem iumi tingim hao olketa narawan tu laek for koment.
Lo sem wei wea iu givim chance lo olketa narawan for story, iu savve givim chance tu lo olketa narawan for koment lo olketa meeting (Lukim paragraf 12)
12. Wat nao wanfala gud wei for encouragem olketa narawan lo olketa meeting? (Lukim tu piksa.)
12 Tingim diswan. Taem iu story witim olketa frens blo iu, waswe, iuseleva nomoa bae story and no givim chance lo olketa narawan? Nomoa! Iu laekem olketa tu for story. Olsem tu, lo olketa meeting iumi laek for givim chance tu lo olketa narawan for koment. Wanfala best wei for encouragem olketa brata and sista blo iumi hem taem iumi givim chance for olketa talemaot faith blo olketa. (1 Cor. 10:24) Distaem bae iumi storyim hao iumi savve duim datwan.
13. Hao nao iumi savve givim chance for staka lo audience for koment?
13 Wanfala samting iumi savve duim, hem for givim short koment, and datwan bae givim chance for olketa narawan for koment tu. Olketa elder and olketa experience pablisa savve showim gud example lo diswan. Nomata taem iu givim short koment, no storyim staka point tumas. If iu storyim evri samting lo paragraf bae olketa narawan no garem eniting for koment lo hem. For example, disfala paragraf storyim tufala point: Givim short koment and no storyim staka point. If iu nao first wan for ansa lo disfala paragraf, hao sapos iu storyim nomoa wanfala lo olketa point hia?
Wat taem nao maet iu chus for no handsap lo meeting? (Lukim paragraf 14)f
14. Wat nao savve helpem iumi for disaedem haomas taem nao for handsap? (Lukim tu piksa.)
14 Garem wei for luksavve taem iu disaedem haomas taem nao bae iu handsap for koment. If iumi handsap staka taem tumas, maet iumi putim pressure lo conductor for kolem iumi nomata olketa narawan no garem yet chance for koment. Datwan savve mekem olketa narawan discourage for apim hand blo olketa.—Eccl. 3:7.
15. (a) Wat nao iumi shud duim if conductor no kolem iumi? (b) Wat nao olketa conductor savve duim for showimaot olketa tingim evriwan? (Lukim box “If Iu Nao Conductor.”)
15 Taem staka pablisa handsap lo taem blo meeting, maet iumi no savve givim staka koment olsem iumi laekem. Samfala taem maet conductor no kolem iumi nao. Datwan savve mekem iumi discourage, bat iumi shud no feel nogud taem conductor no kolem iumi.—Eccl. 7:9.
16. Hao nao iumi savve encouragem olketa narawan wea koment?
16 If iu laek for koment staka taem bat hem hard, hem gud for barava lisin lo olketa narawan wea koment, then bihaen meeting iu savve talem thankiu lo olketa. Taem iu duim olsem, olketa brata and sista savve kasem encouragement wea semsem olsem taem iu givim koment. (Prov. 10:21) So iumi encouragem olketa narawan taem iumi praisem olketa.
SAMFALA NARA WEI FOR ENCOURAGEM EACH OTHER
17. (a) Hao nao parents savve helpem pikinini blo olketa for redyim koment wea fitim? (b) Olsem iumi lukim lo video, wat nao fofala samting man savve duim for preparem koment? (Lukim footnote.)
17 Wanem moa iumi savve duim for encouragem each other lo olketa meeting? If iu wanfala mami or dadi, helpem pikinini blo iu for redyim koment wea fitim age blo hem. (Matt. 21:16) Samfala taem, olketa study article storyim olketa serious samting olsem marit problem or olketa serious samting wea pipol duim. Nomata olsem, maet olketa pikinini savve ansa lo samfala paragraf wea fitim olketa. And tu, hem gud for helpem pikinini blo iu for minim why conductor bae no kolem olketa evritaem olketa handsap. Taem iu duim olsem, datwan bae helpem olketa for no feel nogud taem conductor chusim narawan.—1 Tim. 6:18.d
18. Wat nao iumi savve duim for no story tumas abaotem iumiseleva taem iumi koment? (Provebs 27:2, SIPB)
18 Iumi evriwan savve preparem olketa koment wea givim praise lo Jehovah and encouragem olketa brata and sista. (Prov. 25:11) Samfala taem iumi savve givim short koment abaotem experience blo iumiseleva, bat iumi shud no story tumas abaotem iumiseleva. (Readim Provebs 27:2, SIPB; 2 Cor. 10:18) Main samting iumi laek storyim, hem Jehovah, Bible, and pipol blo hem. (Rev. 4:11) Bat if kwestin lo paragraf askem iumi for storyim experience blo iumi, hem fitim for iumi duim datwan. Example blo diswan bae kam lo next paragraf.
19. (a) Wanem gud samting nao bae kamaot taem iumi tingim evriwan wea attendim meeting? (Rome 1:11, 12) (b) Wat nao iuseleva tinghae lo hem abaotem wei for koment lo olketa meeting?
19 No eni strict rul stap for givim koment, bat iumi evriwan savve duim best blo iumi for encouragem each other. So maet iumi savve givim staka moa koment winim bifor. Or maet iumi satisfae nomoa witim olketa chance wea iumi garem for koment and hapi hao olketa narawan tu laek for koment olsem iumi. Taem iumi tingim olketa brata and sista lo meeting, bae iumi evriwan savve “strongim” and encouragem each other.—Readim Rome 1:11, 12.
SONG 93 Blessim Meeting Bilong Mifala
a Taem iumi givim koment lo meeting iumi encouragem each other. Bat samfala fraet for givim koment. Olketa narawan enjoy for givim koment and wish conductor kolem olketa staka taem. Lo tufala situation hia, hao nao iumi savve showimaot iumi tingim narawan mekem iumi evriwan kasem encouragement? And hao nao iumi savve givim koment wea savve encouragem olketa brata and sista for showimaot love and duim olketa gudfala samting? Disfala article bae storyim datwan.
b For samfala idea moa, lukim Wastaoa blo January 2019, page 8-13, and September 1, 2003, page 19-22.
c Mifala changem nem.
d Watchim video lo jw.org Kamap Fren Bilong Jehovah—Preparem Koment Bilong Iu.
f PIKSA: Lo big kongregeson, wanfala brata wea givim koment finis givim chance lo olketa narawan for koment.