Hao, Iu Redi for Dedicatem Iuseleva lo Jehovah?

1-2. Bifor samwan baptaes, wat nao hem mas duim?

DURING faev years wea go pas, winim wan million pipol baptaes and kamap Olketa Jehovah’s Witness. Staka lo olketa hia olsem disaepol Timothy lo first century wea lanem truth taem olketa “baby yet.” (2 Tim. 3:​14, 15) Samfala lane abaotem Jehovah taem olketa big finis or taem olketa olo nao. No longtaem go nomoa, wanfala woman wea studyim Bible witim Olketa Jehovah’s Witness hem baptaes taem hem 97 years old!

² If iu wanfala Bible student or iu growap lo famili wea parents blo iu Witness, hao, iu tingting for baptaes? Datwan hem naes goal! Bat bifor iu baptaes, iu bae need for dedicatem iuseleva lo Jehovah. Disfala article bae storyim wat nao dedication hem minim. And hem bae helpem iu tu for lukim why iu shud no hol bak for dedicate lo God and baptaes lo taem iu redi for duim datwan.

WAT NAO DEDICATION HEM MINIM?

3. Hu nao samfala wea Bible storyim dat olketa dedicate lo Jehovah?

³ Lo Bible, taem samwan dedicate lo Jehovah hem minim hem kasem mark for duim wanfala spesol waka. Olketa Israelite insaed lo wanfala nation wea dedicate finis lo Jehovah. Bat samfala wea insaed datfala nation olketa dedicate lo Jehovah lo spesol wei. For example, lo datfala turban wea Aaron werem hem garem wanfala gold hedband, and datwan hem wanfala ‘holy saen wea showimaot hem dedicate lo God.’ Datfala gold hedband showim dat Jehovah chusim Aaron for servem hem lo wanfala spesol wei, wea hem nao for kamap hae priest blo Israel. (Lev. 8:​9, ftn) Olketa Nazirite tu dedicate lo Jehovah lo wanfala spesol wei. Disfala word “Nazirite” kam from wanfala Hebrew word nazirʹ, wea minim “samwan wea stap separate,” or “samwan wea dedicate.” Olketa Nazirite mas obeyim samfala spesol komand wea stap lo Law blo Moses for olketa.—Num. 6:​2-8.

4. (a) Taem iu dedicate lo Jehovah, wat nao important samting lo laef blo iu? (b) Wat nao hem minim for ‘givim laef blo iu for God’? (Lukim tu piksa.)

⁴ Taem iu dedicatem iuseleva lo Jehovah, iu chus for kamap disaepol blo Jesus Christ and important samting lo laef blo iu, hem for duim will blo God. Wat nao dedication hem minim? Jesus sei: “Sapos eniwan laek followim mi, hem mas givim laef bilong hem for God.” (Matt. 16:24) Greek toktok wea olketa transleitim lo “givim laef bilong hem for God,” hem savve minim tu for man “no duim samting wea hemseleva laekem.” From iu dedicate lo Jehovah, bae iu need for rejectim eniting wea bae mekem Jehovah no hapi. (2 Cor. 5:​14, 15) Datwan minim for iu rejectim olketa “nogud samting wea man laek for duim,” olsem for durong. (Gal. 5:​19-21; 1 Cor. 6:18) Hao, for obeyim olketa komand olsem bae mekem laef blo iu hard tumas? Nomoa, hem no hard if iu lovem Jehovah and luksavve hao olketa law hia savve helpem iu. (Ps. 119:97; Isa. 48:​17, 18) Brata Nicholas sei: “Iu savve ting lo olketa standard blo Jehovah olsem bar lo prison wea stopem iu for duim samting wea iu laekem or olsem olketa bar lo fence blo lion wea protectim iu from danger.”

5. (a) Hao nao iu savve dedicate lo Jehovah? (b) Wat nao difference between dedication and baptism? (Lukim tu piksa.)

⁵ Hao nao iu savve dedicate lo Jehovah? Iu talem wanfala prea lo Jehovah and promis for worshipim hem nomoa and for mekem will blo hem kamap main samting lo laef blo iu. Then iu promisim Jehovah dat bae iu go ahed for lovem hem lo “full heart bilong iu, long full soul bilong iu, long full mind bilong iu, and long full strong bilong iu.” (Mark 12:30) Dedication hem personal samting between iu and Jehovah nomoa. Bat, baptism hem samting wea evriwan bae lukim for showim iu dedicate finis lo Jehovah. Dedication wea iu mekem hem wanfala important promis and iu barava laek for keepim datfala promis and Jehovah expectim iu for duim datwan.—Eccl. 5:​4, 5.

WHY NAO IU DEDICATEM IUSELEVA LO JEHOVAH?

6. Wat nao mekem samwan for dedicatem hemseleva lo Jehovah?

⁶ Main reason why iu dedicatem iuseleva lo Jehovah hem bikos iu lovem hem. Love wea iu garem for hem, hem no wanfala feeling nomoa. Bat, hem base lo “stretfala savve” and “wei for minim samting,” wea iu kasem taem iu lane abaotem Jehovah and datwan mekem iu for barava lovem hem. (Col. 1:9) Taem iu studyim Bible hem mekem iu for sure (1) Jehovah hem real, (2) Bible hem kam from God, and (3) hem iusim organization blo hem for duim will blo hem.

7. Wat nao iumi shud duim bifor iumi dedicatem iumiseleva lo God?

⁷ Olketa wea dedicate lo Jehovah shud savve finis lo olketa main teaching lo Bible and gohed obeyim olketa standard blo hem. Olketa duim best for talem olketa narawan abaotem wat olketa lanem. (Matt. 28:​19, 20) From love blo olketa for Jehovah hem kamap strong, olketa barava laek for worshipim Jehovah witim full heart. Hao, iu feel olsem tu? Taem iu garem diskaen love, bae iu no dedicate and baptaes just bikos iu laek for mekem study conductor or parents for hapi. And tu, bae iu no duim just bikos olketa frens blo iu baptaes.

8. Hao nao wei for appreciatim wat Jehovah duim savve helpem iu for dedicatem iuseleva lo Jehovah? (Psalm 116:​12-14)

⁸ Taem iu ting abaotem evri samting wea Jehovah duim for iu, bae iu appreciatim hem and laek for dedicate lo hem. (Readim Psalm 116:​12-14.) Bible sei Jehovah hem givim “evri gud and perfect present.” (Jas. 1:17) Best present Hem givim, hem taem hem sakrifaesim Son blo hem, Jesus. Diswan hem spesol tumas! Datfala ransom mekem hem possible for iu garem klos frenship witim Jehovah. And Jehovah givim iu chance for laef olowe. (1 John 4:​9, 10, 19) For dedicatem iuseleva lo Jehovah hem wanfala best wei for showimaot iu appreciatim datfala nambawan wei wea Jehovah showimaot love, and for evri nara blessing wea hem givim iu. (Deut. 16:17; 2 Cor. 5:15) Lo leson 46 point 4, lo Enjoyim Laef for Olowe! buk and datfala thri-minute video Givim Olketa Present blo Iu lo God, hem haelaetim diskaen wei for tinghae lo Jehovah.

HAO, IU REDI FOR DEDICATE AND BAPTAES?

9. If samwan tingse hem no redi yet for dedicate, why nao hem shud no feel hem mas duim datwan?

⁹ Maet iu ting iu no redi yet for dedicate and baptaes. Maet iu need for mekem samfala change lo laef blo iu for followim olketa standard blo Jehovah, or maet iu still needim taem for strongim faith blo iu. (Col. 2:​6, 7) Hao evri student muv ahed hem no semsem, and age blo olketa young wan wea disaed for dedicate and baptaes tu hem no semsem. Trae for ting raonem wat iu savve duim for impruvim spiritual laef blo iu and no comparem datwan witim narawan.—Gal. 6:​4, 5.

10. Wat nao iu savve duim if iu luksavve dat iu no redi yet for dedicate and baptaes? (Lukim tu box “For Olketa wea Growap lo Truth.”)

¹⁰ Maet iu luksavve iu no redi yet for dedicatem iuseleva lo Jehovah. Nomata olsem, gohed for markem datwan olsem goal blo iu. Prea lo Jehovah for helpem iu for mekem eni change wea iu need for duim lo laef blo iu. (Phil. 2:13; 3:16) Iu savve barava sure Jehovah bae herem prea blo iu and helpem iu.—1 John 5:14.

WHY NAO SAMFALA HOL BAK?

11. Hao nao Jehovah bae helpem iumi for gohed faithful?

¹¹ Nomata samfala redi finis for dedicate and baptaes, olketa still hol bak. Olketa maet ting, ‘Hao sapos bihaen mi baptaes mi duim wanfala big sin and mi disfellowship?’ If iu feel olsem, trustim dat Jehovah bae provaedem help wea iu needim for duim samting wea mekem hem hapi. (Col. 1:10) Jehovah bae givim iu tu strong for duim samting wea hem stret. Hao Jehovah strongim olketa narawan, hem pruvim dat hem bae strongim iu tu. (1 Cor. 10:13) Datwan hem wanfala reason why staka insaed kongregeson no disfellowship. Jehovah helpem pipol blo hem for gohed faithful.

12. Hao nao iumi savve avoidim wei for duim wanfala serious sin?

¹² Iumi evriwan wea no perfect savve laek for duim samting wea no stret. (Jas. 1:14) Bat, iuseleva nao savve disaed if iu bae duim stret samting or nomoa. Tru samting nao, iuseleva garem kontrol lo wat iu savve duim lo laef blo iu. Nomata samfala maet talem opposite samting, iu savve lane for kontrolem feeling blo iu. And nomata if feeling for laek for duim samting wea no stret hem kamap, iu savve kontrolem datwan. For helpem iu, iu mas prea evriday. Followim wanfala schedule for duim personal study lo Bible evritaem. Attendim olketa meeting. Storyim faith blo iu lo olketa narawan. Taem iu gohed for duim olketa samting hia evritaem, bae hem strongim iu for gohed keepim dedication vow blo iu. And no forgetim Jehovah bae helpem iu for duim datwan.—Gal. 5:16.

13. Wat nao gudfala example wea Joseph showimaot for iumi?

¹³ Hem bae moa isi for keepim dedication vow blo iu, sapos iu disaedem firstaem wat bae iu duim if iu kasem temptation. Bible storyim samfala wea duim datwan nomata olketa tu no perfect. For example, staka taem waef blo Potiphar trae for switim Joseph. Bat Joseph disaedem finis wat hem bae duim. Bible talem iumi hao Joseph “rejectim datwan” and sei: “Why nao bae mi duim disfala barava nogud samting and sin againstim God?” (Gen. 39:​8-10) Hem klia, Joseph savve finis wanem hem bae duim bifor datfala woman trae for temptim hem. So taem hem kasem datfala temptation, hem moa isi for hem deal witim.

14. Hao nao iumi savve lane for sei no lo eni temptation?

¹⁴ Hao nao iu savve followim example blo Joseph and rejectim temptation? Iu savve disaedem distaem, wat bae iu duim if eni temptation kamap. Lane for stretawe sei no lo olketa samting wea Jehovah heitim, and no even ting abaotem tu. (Ps. 97:10; 119:165) Datwan bae helpem iu for no foldaon lo eni temptation, bikos iu savve finis lo wat for duim, and iu disaedem finis wat for followim.

15. Hao nao samwan savve showimaot hem “barava lukaotem” Jehovah? (Hebrew 11:6)

¹⁵ Maet iu savve finis dat iu faendem truth and iu laek for servem Jehovah witim full heart blo iu, bat samting mekem iu for hol bak for dedicate and baptaes. Hem gud for followim example blo King David. Iu savve askem Jehovah olsem: “O God, lukluk gud lo mi, and savve lo heart blo mi. Chekim mi gud, and savve lo tingting blo mi wea mekem mi wari. Lukim sapos eni nogud wei stap lo mi, and leadim mi followim road wea no savve finis.” (Ps. 139:​23, 24) Jehovah bae blessim olketa wea “barava lukaotem hem.” Taem iu gohed waka hard for kasem goal blo iu for dedicate and baptaes, hem showim lo Jehovah iu barava lukaotem hem.—Readim Hebrew 11:6.

GOHED FREN GUD WITIM JEHOVAH

16-17. Hao nao Jehovah leadim kam olketa wea growap lo truth? (John 6:44)

¹⁶ Jesus sei Jehovah nao leadim olketa disaepol for kam lo Hem. (Readim John 6:44.) Ting abaotem hao spesol nao datwan and hao disfala toktok hem for iu tu. Jehovah lukim gud samting lo each wan wea hem leadim kam lo hem. Jehovah lukim each wan lo olketa olsem “spesol pipol blo hem,” or “samting wea hem tinghae tumas lo hem.” (Deut. 7:6; ftn.) Hem tu hao Jehovah ting lo iu.

¹⁷ Bat, maet iu wanfala young wan wea growap lo truth. Maet iu feel olsem iu followim parents nomoa and no Jehovah nao leadim iu kam lo hem. Nomata olsem, Bible sei: “Fren gud witim God and bae hem fren gud witim iufala.” (Jas. 4:8; 1 Chron. 28:9) Taem iu duim samting for fren witim Jehovah, hem bae duim samting for fren witim iu. Jehovah no ting lo iu olsem iu part lo wanfala grup nomoa. Bat, hem leadim kam each wan lo iumi, wea minim olketa wea growap insaed lo truth tu. Taem samwan wea growap lo truth duim samting for fren gud witim Jehovah, Jehovah bae duim wat hem talem lo James 4:8.—Comparem 2 Thessalonica 2:13.

18. Wat nao bae iumi discussim lo next article? (Psalm 40:8)

¹⁸ Taem iu dedicatem iuseleva lo Jehovah and baptaes, iu followim example blo Jesus. Jesus willing for givim laef blo hem for duim eni samting wea Dadi blo hem laekem. (Readim Psalm 40:8; Heb. 10:7) Lo next article, bae iumi discussim wat nao bae helpem iu for gohed faithful for servem Jehovah bihaen iu baptaes.