Kwestin From Reader
Hu nao Jehovah minim taem hem sei, “olsem iumi” long Genesis 3:22?
Hem luk olsem Jehovah God story abaotem hemseleva and only-born Son bilong hem taem hem sei: “Man hia kamap olsem iumi for savve long gud samting and nogud samting.” (Genesis 3:22) Iumi lukluk long why nao olsem.
Jehovah talem toktok hia bihaen hem talemaot panis long firstfala man and woman. Samfala tingse disfala toktok “olsem iumi” hem olsem wei wea king kolem hemseleva witim datfala word “mifala.” Olsem example king maet sei “mifala no hapi” taem hem tok nomoa abaotem hemseleva. Saed long Genesis 1:26 and 3:22, man for studyim Bible Donald E. Gowan sei: “Long O[ld] T[estament] no eni samting saportim olketa tingting hia: Datfala wei wea king iusim ‘mifala’ for mekhae long position bilong hem, wei wea man iusim word ‘mifala’ taem hem ting raonem wanem for duim, for iusim ‘mifala’ for minim full samting, or minim winim wanfala man stap long datfala Godhead. . . . No eniwan long olketa tingting hia mek sense witim 3:22, wea sei ‘olsem iumi.’ ”
Waswe, Jehovah storyim Satan datfala Devil, wea startim wei for disaedem seleva “gud and nogud samting” and wea encouragem tufala first man and woman for duim sem samting? Nomoa. Long hia Jehovah iusim toktok “olsem iumi.” Satan no stap nao midolwan bigfala sekson bilong olketa faithful angel bilong Jehovah, so hem bae no wanfala long olketa wea stap long saed bilong Jehovah.
Waswe, God storyim olketa faithful angel? Iumi no sure. Bat, wei wea olketa toktok long Genesis 1:26 and 3:22 klosap semsem hem givim iumi idea. Iumi readim long Genesis 1:26 hao Jehovah hem sei: “Letem iumi wakem man long image bilong iumi, olsem iumi.” Hu nao hem talem olketa toktok hia for hem? Taem aposol Paul tok abaotem datfala spirit creature wea kamap datfala perfect man Jesus, hem sei: “Hem image bilong God wea iumi no savve lukim, firstborn bilong evri creation; bikos thru long hem evri [narafala] samting kamap long heven and long earth.” (Colossians 1:15, 16) Tru nao, hem barava stret for sei long Genesis 1:26, Jehovah hem tok long only born Son bilong hem, datfala “nambawan wakman” wea stap witim hem long full taem wea hem creatim heven and earth. (Proverbs 8:22-31) Wei wea datfala toktok long Genesis 3:22 hem klosap semsem showimaot Jehovah toktok moa long only born Son bilong hem, wea barava klos long hem.
Luk olsem datfala only born Son bilong God hem garem savve long “gud and nogud samting.” From hem stap longfala taem witim Jehovah and barava waka klos witim hem, hem barava lanem gud tingting, olketa principle, and olketa hae mark bilong dadi bilong hem. From hem barava sure Son hem savve gud long evri samting hia and loyal long olketa, maet Jehovah givim hem freedom for deal witim samting nomata hem no askem dadi firstaem. From diswan Son hem fit and garem paoa for disaedem wanem hem gud and nogud. Nomata olsem, long wei wea difren from Satan, Adam, and Eve, Jesus hem no putim wanfala standard for gud samting and nogud samting wea againstim standard bilong Jehovah.