Word Bilong Jehovah Hem Laef
Olketa Main Point From Buk Bilong Genesis—II
START from taem wea God creatim first man, Adam, go kasem taem son bilong Jacob, Joseph hem dae, Genesis storyim 2,369 year long history bilong man. Long first 10-fala chapter and 9-fala verse bilong chapter 11, hem storyim samting wea happen start from creation go kasem taoa bilong Babel, wea wanfala article bilong disfala sem magasin storyim finis.a Disfala article bae storyim olketa main point from olketa nara chapter bilong Genesis, wea join witim hao God deal witim Abraham, Isaac, Jacob, and Joseph.
ABRAHAM KAMAP FREN BILONG GOD
Samting olsem 350 year bihaen long Flood, wanfala man wea kamap barava spesol long God hem born long olketa laen pikinini bilong son bilong Noah, Shem. Nem bilong hem Abram, wea bihaen hem change long Abraham. For followim komand bilong God, Abram lusim Ur taon bilong olketa Chaldea and kamap man wea stap long tent long land wea Jehovah promis for givim hem and olketa laen pikinini bilong hem. From faith bilong hem and wei for obey, Abraham kamap “fren bilong Jehovah.”—James 2:23.
Jehovah duim samting againstim wicked pipol wea stap long Sodom and olketa taon wea stap klosap, bat Lot and tufala dota bilong hem stap laef. Wanfala promis bilong God fulfill taem Isaac, son bilong Abraham hem born. Samfala year bihaen, faith bilong Abraham kasem test taem Jehovah givim order for hem offerim son bilong hem olsem wanfala sakrifaes. Abraham hem redy for obey bat angel nao stopem hem. No eni daot stap hao Abraham hem man bilong faith, and hem trustim hao thru long seed bilong hem, olketa nation bae blessim olketa seleva. Abraham sorre tumas taem waef wea hem lovem tumas, Sarah, hem dae.
Ansa for Olketa Bible Kwestin:
12:1-3—Wanem taem nao covenant bilong Abraham hem start for waka, and for hao long? Covenant bilong Jehovah witim Abram wea “evri famili bilong earth bae blessim olketa seleva thru long [Abram]” luk olsem hem start for waka taem Abram katkros long Euphrates taem hem gogo for Canaan. Diswan maet long Nisan 14, 1943 B.C.E.—430 year bifor Israel kamap free from Egypt. (Exodus 12:2, 6, 7, 40, 41) Datfala Covenant bilong Abraham hem “wanfala covenant for olowe.” Hem bae go ahed for waka go kasem taem blessing for olketa famili bilong earth and evri enemy bilong God finis evribit hem fulfill.—Genesis 17:7; 1 Corinthians 15:23-26.
15:13—Wanem taem nao datfala 400-year bilong trabol for olketa pikinini bilong Abram wea olketa talem profesi abaotem bae hem fulfill? Taem bilong disfala trabol hem start long 1913 B.C.E. taem son bilong Abraham, Isaac hem klosap 5 year and haf brata bilong hem, Ishmael, wea 19 year “mekfani” long hem. (Genesis 21:8-14; Galatians 4:29) Hem finis long taem wea olketa Israelite sev from wei for prisoner long Egypt long 1513 B.C.E.
16:2—Waswe hem stret for Sarai givim servant girl bilong hem Hagar olsem waef for Abram? Wanem Sarai duim hem fitim kastom long datfala taem—hao wanfala woman wea no savve garem pikinini mas givim for hasband bilong hem wanfala concubine mekem hem bornem pikinini. For garem winim wanfala partner hem firstaem start long laen bilong Cain. Gogo, hem kamap olsem wanfala kastom and samfala worshiper bilong Jehovah followim datwan. (Genesis 4:17-19; 16:1-3; 29:21-28) Nomata olsem, Jehovah nating lusim firstfala standard bilong hem saed long wei for maritim wanfala partner. (Genesis 2:21, 22) Noah and olketa son bilong hem, wea olketa kasem moa datfala komand ‘for garem pikinini and fulimap earth,’ evriwan maritim wanfala partner. (Genesis 7:7; 9:1; 2 Peter 2:5) And Jesus Christ barava strongim disfala standard for maritim wanfala partner nomoa.—Matthew 19:4-8; 1 Timothy 3:2, 12.
19:8—Waswe, hem no stret for Lot givim olketa dota bilong hem for olketa bilong Sodom? For fitim fasin bilong pipol long datfala ples, hem responsibility bilong man wea ownim haos for protectim olketa guest, defendim olketa nomata hem minim dae for hem. Lot hem willing for duim datwan. Hem no fraet for go aot long datfala sekson, satem door, and feisim olketa seleva. Kasem taem wea hem givim olketa dota bilong hem, maet Lot just luksavve hao olketa guest bilong hem olketa man for talem message from God, and hem maet tingim God savve protectim olketa dota bilong hem olsem hem protectim aunty bilong hem Sarah long Egypt. (Genesis 12:17-20) Tru nao, samting wea happen nao, Lot and olketa dota bilong hem stap sef.
19:30-38—Waswe, Jehovah acceptim wei wea Lot hem drunk and garem tufala son long tufala dota bilong hem? Jehovah no acceptim wei for duim sex witim klos famili member and fasin for drunk. (Leviticus 18:6, 7, 29; 1 Corinthians 6:9, 10) Lot barava feel nogud long wei bilong pipol long Sodom for “brekem law.” (2 Peter 2:6-8) Wei wea olketa dota bilong Lot mekem hem drunk barava showimaot hao olketa luksavve hem bae no agree for duim sex witim olketa taem hem no drunk. Bat olsem olketa stranger long datfala land, olketa dota bilong hem feel hao hem nomoa only wei for stopem famili bilong Lot for no finis. Datfala story hem stap long Bible for showimaot laen bilong olketa Moabite (thru long Moab) and olketa Ammonite (thru long Benammi) go kasem olketa laen pikinini bilong Abraham, olketa Israelite.
Olketa Leson for Iumi:
13:8, 9. Abraham showimaot barava nambawan example long wei for stretem olketa raoa! Iumi shud no enitaem changem wei wea iumi stap long peace witim wei for kasem selen, olketa samting wea man seleva laekem, or praod fasin.
15:5, 6. Taem Abraham gogo for olo and no garem yet wanfala son, hem story abaotem datfala samting long God. From diswan, Jehovah encouragem Abraham. Wanem nao kamaot? Abraham “putim faith long Jehovah.” Sapos iumi prea long Jehovah and talemaot wanem stap long heart, acceptim olketa encouragement from Bible, and obeyim hem, bae faith bilong iumi kamap strong.
15:16. Jehovah hol bak long judgment bilong hem againstim olketa Amorite (or, Canaanite) for fofala genereson. Why? Bikos hem wanfala patient God. Hem weit go kasem taem wea no eni hope stap nao for kamap moabeta. Olsem Jehovah, iumi tu need for patient.
18:23-33. Jehovah no distroem eni pipol nomoa. Hem protectim olketa wea raeteous.
19:16. Lot “go ahed for delay,” and olketa angel pullim hem and famili bilong hem aot from taon bilong Sodom. Hem no wise samting for iumi lusim tingting bilong iumi for hariap taem iumi weitim end bilong disfala wicked world.
19:26. Hem krangge samting for ting bak or barava wantem moa olketa samting wea iumi lusim finis long world!
JACOB GAREM 12-FALA SON
Abraham nao arrangem for Isaac maritim Rebekah, wanfala woman wea garem faith long Jehovah. Hem bornem tufala twin Esau and Jacob. Esau ting daonem present wea hem fit for kasem olsem firstborn and sellim long Jacob, wea bihaen Jacob kasem blessing from dadi bilong hem. Jacob ranawe go long Paddan-aram, long there nao hem maritim Leah and Rachel and lukaftarem olketa sheep bilong dadi bilong tufala for 20 year bifor hem and famili bilong hem lusim datfala ples. Hem garem 12-fala son and samfala dota long Leah, Rachel, and tufala servant girl bilong tufala. Jacob stragol witim wanfala angel and kasem blessing, and nem bilong hem change for kamap Israel.
Ansa for Olketa Bible Kwestin:
28:12, 13—Wanem nao mining bilong dream bilong Jacob abaotem “wanfala ladder”? Disfala “ladder,” wea maet luk olsem wanfala ladder wea garem olketa step wea olketa wakem long ston, hem showimaot wei hem stap for story midolwan long earth and heven. Wei wea olketa angel bilong God go ap and kamdaon hem showimaot olketa angel duim samfala important waka midolwan long Jehovah and olketa man wea hem appruvim.—John 1:51.
30:14, 15—Why nao Rachel lusim wanfala chance for sleep witim hasband bilong hem for kasem samfala mandrake? Long taem bifor, frut bilong mandrake olketa iusim long medicine olsem drug and for stopem or mekem pain kamap gud. Datfala frut olketa biliv hem fit for mekem strong feeling for duim sex and mekem hae chance for garem pikinini or isi for pikinini start. (Song of Solomon 7:13) Nomata Bible no talem wanem nao muvim Rachel for duim datwan, hem maet ting olketa mandrake hia bae helpem hem garem pikinini and bae finisim shame wea hem kasem from wei wea hem no garem pikinini. Nomata olsem, samfala year hem go pas firstaem bifor Jehovah “mekem hem savve garem pikinini.”—Genesis 30:22-24.
Olketa Leson for Iumi:
25:23. Jehovah garem paoa for talem evri samting abaotem wanfala pikinini wea no born yet and for iusim savve bilong hem and markem eniwan wea hem chusim for purpose bilong hem. Nomata olsem, hem no disaedem firstaem samting wea bae kasem man wanwan.—Hosea 12:3; Romans 9:10-12.
25:32, 33; 32:24-29. Wei wea Jacob interest for kasem datfala present bilong firstborn and stragol for full naet witim angel for kasem blessing showimaot hao hem barava tinghae long olketa holy samting. Jehovah givim iumi planti holy samting, olsem wei wea iumi fren witim hem and organization bilong hem, ransom, Bible, and Kingdom hope bilong iumi. Letem iumi pruvim iumi olsem Jacob long wei for showim iumi tinghae long evri samting hia.
34:1, 30. Trabol wea “bringim shame” long Jacob hem start from Dinah fren witim pipol wea no lovem Jehovah. Iumi mas chusim kaban bilong iumi long wisefala wei.
JEHOVAH BLESSIM JOSEPH LONG EGYPT
Jealous fasin muvim olketa son bilong Jacob for sellim brata bilong olketa Joseph olsem wanfala slave. Taem hem long Egypt, Joseph go long prison from hem faithful and strong for saportim standard bilong God saed long fasin. Gogo, olketa tekem hem from prison go front long Pharaoh for minim dream bilong hem, wea hem talem sevenfala year bilong planti kaikai and sevenfala year bihaen wea bae nomoa eni kaikai. Then Joseph kamap man for lukaftarem kaikai long Egypt. From hangre kamap, olketa brata bilong hem kam long Egypt for luk aotem kaikai. Famili hia stap tugeta moa and stap long land bilong Goshen. Taem hem gogo for dae, Jacob blessim olketa son bilong hem and talem wanfala profesi bilong hope bilong olketa bigfala blessing wea farawe yet long future. Olketa tekem body bilong Jacob long Canaan for berem. Joseph dae taem hem 110 year, olketa putim medicine long body bilong hem, gogo olketa tekem go long Promis Land.—Exodus 13:19.
Ansa for Olketa Bible Kwestin:
43:32—Why nao hem barava rabis samting long olketa bilong Egypt for kaikai witim olketa Hebrew? Long bigfala wei diswan maet from wei wea olketa heitim narafala religion or ting daonem nara kantri wea man kam from. Olketa bilong Egypt barava heitim tu olketa shepherd. (Genesis 46:34) Why? Olketa shepherd garem barava low position long Egypt. Or maet hem from ples for wakem garden hem smol, so olketa long Egypt barava heitim olketa wea luk aotem ples for sheep kaikaim grass.
44:5—Waswe, Joseph barava iusim wanfala kap for talem olketa saen? Datfala silver kap and wanem olketa talem abaotem hem part bilong wanfala trik. Joseph hem wanfala faithful worshiper bilong Jehovah. Hem nating iusim datfala kap for talem olketa saen, olsem tu Benjamin no really stealim datfala kap.
49:10—Wanem nao mining bilong “iron stik” and “stik bilong komanda”? Wanfala Iron stik hem stik wea wanfala ruler nao savve karem witim hem for showim saen olsem paoa bilong king. Datfala stik bilong komanda hem stik for showim paoa for komand. Olketa toktok hia bilong Jacob showim hao datfala important wei for rul and paoa bae stap long tribe bilong Judah go kasem taem Shiloh hem kam. Diswan wea kam from laen bilong Judah hem Jesus Christ, datwan wea Jehovah givim hem paoa for rul long heven. Christ nao holem paoa bilong king and garem paoa for komand.—Psalm 2:8, 9; Isaiah 55:4; Daniel 7:13, 14.
Olketa Leson for Iumi:
38:26. Judah hem deal long wei wea no stret witim dota-in-law bilong hem, Tamar. Nomata olsem, taem Tamar sei hem nao mekem hem babule, Judah hambol nomoa for talemaot mistek bilong hem. Iumi tu shud kwiktaem talem olketa mistek bilong iumi.
39:9. Hao Joseph deal witim waef bilong Potiphar showim hao tingting bilong hem followim tingting bilong God saed long fasin and hem letem olketa principle bilong God nao for leadim hem. Iumi tu shud waka hard for duim sem samting taem iumi grow long stretfala savve bilong truth.
41:14-16, 39, 40. Jehovah fit for changem living bilong olketa wea fraet long hem. Taem trabol happen, hem wise samting for iumi putim trust long Jehovah and go ahed for faithful long hem.
Olketa Garem Faith for Olowe
Abraham, Isaac, Jacob, and Joseph olketa man bilong faith wea fraet long God. Olketa story abaotem laef bilong olketa wea stap long buk bilong Genesis, hem barava strongim faith bilong iumi and teachim iumi planti important leson.
Iu bae kasem gud samting from diswan taem iu go ahed for readim Bible reading assignment for Theocratic Ministry Skul evri week. Wei for tingting raonem bae mekem olketa story hia kamap tru samting long iumi.
[Footnote]
a Lukim article “Word Bilong Jehovah Hem Laef—Olketa Main Point From Buk Bilong Genesis—I” long January 1, 2004, Wastaoa.
[Piksa long page 26]
Jehovah blessim Joseph
[Piksa long page 26]
Abraham hem man bilong faith
[Piksa long page 26]
Raeteous Lot and tufala dota bilong hem stap laef
[Piksa long page 29]
Jacob tinghae long olketa holy samting. Iu olsem tu?