Givim God Glory No Man
LONG olketa month wea just go pas, pipol raonem world wea lovem raeteous fasin lane for givim glory long God taem olketa hipap long olketa “Givim God Glory” Distrik Convention bilong Olketa Jehovah’s Witness. Distaem iumi reviewim datfala program.
Long staka ples datfala program wea storyim olketa samting from Bible hem go ahed for thrifala day bat olketa wea attendim spesol international convention olketa kasem fofala day. Olketa wea attend herem winim 30-fala tok wea story from Bible, insaed diswan hem olketa tok wea mekem moa deep wei wea man tinghae long olketa spiritual samting, olketa experience wea strongim faith, olketa demonstration wea mekhae long wei for followim Bible principle, and wanfala drama wea showimaot olketa challenge wea olketa Christian long first-century feisim. Sapos iu attendim wanfala long olketa convention hia, waswe iu fit for reviewim olketa note bilong iu taem iu readim disfala article? Mifala sure sapos iu duim diswan iu bae rememberim olketa nambawan samting wea iu kasem long datfala richfala spiritual feast and bae iu lanem samting tu.
Theme Bilong First Day: “Iu Nao Fit, Jehovah, . . . for Kasem Glory”
Bihaen first song and prea, first speaker hem welkamim evriwan taem hem mekhae long main reason for datfala convention: “Iumi Hipap for Givim God Glory.” Speaker talem toktok from Revelation 4:11 for strongim main theme bilong convention. Hem kwiktaem explainim wanem nao mining bilong wei for givim God glory. Hem iusim Psalms for strongim hao insaed wei for givim glory long God hem wei for “worship,” “sei thankiu,” and “praise.”—Psalm 95:6; 100:4, 5; 111:1, 2.
Next part garem title “Olketa wea Givim Glory Long God Kasem Blessing.” Speaker hem storyim wanfala interesting point. From winim six million Jehovah’s Witness stap long 234 kantri evriwea long world, hem minim day and naet olketa givim glory long Jehovah. (Revelation 7:15) Audience tinghae long olketa interview bilong samfala Christian brata and sista wea waka long olketa difren kaen spesol full-taem service and hem barava affectim heart bilong audience.
Next tok hem, “Creation Talemaot Glory Bilong God.” Nomata hem no savve toktok, physical heven mekhae long wei wea God hem nambawan and hem mekem wei wea iumi tinghae long loving kea bilong hem kamap moa deep. Speaker explainim gud diswan.—Isaiah 40:26.
Persecution, fasin for againstim, wei wea world savve affectim man, and feeling wea kamap from iumi sin hem challengem faithful fasin bilong olketa tru Christian. Dastawe, hem fitim for audience barava lisin gud long datfala tok “Wakabaot Long Faithful Fasin.” Speaker storyim each verse long mek-26 Psalm, and hem interviewim wanfala young Witness wea go long skul wea stand strong for stretfala fasin and narawan wea bin spendem staka taem for garem hapitaem wea no really stret bat wea gogo duim samting for stretem datfala problem.
Tok bilong theme, “Olketa Nambawan Profesi Vision Muvim Iumi for Go Ahed!” hem endim morning program. Speaker storyim hao profet Daniel and aposol John and Peter olketa olsem example for iumi, from faith bilong olketa kamap moa strong taem olketa lukim olketa nambawan profesi vision abaotem wei wea Messiah Kingdom bilong God hem start and go ahed for waka. Taem hem storyim olketa wea maet forgetim kliafala pruv wea showimaot distaem iumi stap long taem bilong end, speaker sei: “Sapos olsem, mifala barava hope olketa bae tingim moa wei wea Christ hem stap moa long Kingdom glory and bae kasem help for kamap strong moa long spiritual wei.”
Program long aftanun hem start witim tok wea garem title “Glory Bilong Jehovah Showaot Long Olketa wea Hambol.” Speaker explainim hao Jehovah showimaot example saed long hambol fasin, nomata hem nao Datwan wea hae winim eniwan long universe. (Psalm 18:35) Jehovah favorim olketa wea really hambol, bat hem againstim olketa wea showimaot olketa hambol taem olketa stap witim olketa wea semsem or olketa wea moa hae winim olketa bat, wea deal long raf wei witim olketa wea stap anda long olketa.—Psalm 138:6.
Next, wanfala tok wea garem thrifala part wea storyim Bible profesi and wea mekhae long olketa difren part bilong main theme: “Profesi Bilong Amos—Message Bilong Hem for Iumi Distaem.” First speaker point go long example bilong Amos, and showimaot hao iumi garem responsibility for warnim pipol abaotem judgment bilong Jehovah wea bae kam. Theme bilong tok hia hem, “Talemaot Toktok Bilong God Witim Fasin for No Fraet.” Mek-tu speaker askem disfala kwestin: “Waswe, bae Jehovah enitaem finisim wicked fasin and wei for safa from disfala earth?” Theme bilong hem, “Judgment Bilong God Againstim Wicked Pipol,” showim hao judgment bilong God hem olowe fitim, no eniwan savve ranawe from, and hem for olketa wea hem markem nomoa. Last Speaker for disfala tok wea garem thrifala part hem story abaotem theme “Jehovah Lukluk Gud Insaed Heart.” Olketa wea want for mekem Jehovah hapi bae followim toktok wea stap long Amos 5:15: “Heitim samting wea nogud, and lovem samting wea gud.”
Man savve iusim long rongfala wei olketa alcohol drink, olsem wine wea hem wanfala present from God for mekem heart hem hapi. Long tok “Stap Klia Long Trap for Ova Tumas Long Alcohol,” speaker talem olketa physical and spiritual danger wea kamap from wei for ova tumas long alcohol, nomata sapos man no kamap drunk. Hem talem wanfala principle for leadim man: From each wan hem difren saed long haomas alcohol bae affectim hem long nogud wei, iumi mas tingim hao sapos alcohol wea iu drinkim hem spoelem “wisdom wea helpem man and wei for tingting gud” hem ova tumas for iu.—Proverbs 3:21, 22.
From iumi stap insaed long hardfala taem, next tok, “Jehovah, ‘Strongfala Haos Bilong Iumi Long Taem Bilong Trabol,’ ” hem barava comfortim audience. Prea, holy spirit, and olketa nara Christian savve helpem iumi for deal witim laef.
Lastfala tok long datfala day, “ ‘Datfala Gud Land’—Example Bilong Paradaes,” hem end witim wanfala hapi sapraes for evriwan—wanfala niu pablikeson wea garem staka Bible map insaed! Title bilong hem See the Good Land.
Theme Bilong Mek-tu Day: “Talemaot Glory Bilong Hem Long Olketa Nation”
Bihaen wei for story raonem text evriday, mek-tu tok wea garem thrifala part wea kamap long datfala convention hem start, theme bilong hem “Showimaot Glory Bilong Jehovah Olsem Olketa Mirror.” First part hem story klia abaotem “Taem Iumi Talemaot Gud Nius Evriwea” and insaed diswan hem wei wea olketa actim moa olketa experience wea really happen long field service. Mek-tu part hem showim wanfala demonstration bilong wanfala return visit taem speaker storyim datfala theme “Aotem Kava From Eye Bilong Olketa wea Blind.” Last part, wea garem title “Taem Iumi Duim Long Bigfala Wei Moa Long Ministry,” hem barava naes tumas from olketa interesting interview abaotem olketa experience long field.
Nextfala part long program garem title “Olketa Heitim Iumi Nomata Olketa No Garem Reason.” Insaed diswan olketa interviewim olketa faithful man wea kasem strong from God for keepim faithful fasin nomata pipol againstim olketa.
Wanfala samting wea evriwan luk forward long hem long olketa convention hem nao datfala baptism tok wea bihaen datwan evriwan wea fit and redy for baptaes mas go anda long wata evribit. Baptism hem piksarem man hem barava dedicate long Jehovah. Dastawe, theme bilong hem barava fitim: “For Live Followim Dedication Bilong Iumi Givim God Glory.”
Aftanun program hem start witim wanfala tok wea encouragem iumi for lukluk gud long iumiseleva, “Mekem Grow Sem Tingting Olsem Christ Abaotem Wei for Win.” Speaker showimaot disfala interesting point: Wei for win kamaot from wei for followim hambol fasin bilong Christ. Dastawe, wanfala Christian shud no aftarem position wea garem responsibility for satisfaem nomoa feeling bilong hemseleva for win. Hem shud askem hemseleva, ‘Waswe, mi willing for help long kaen waka wea pipol maet no lukim mi duim?’
Waswe, enitaem iu feel taed? Ansa hem klia tumas. Evriwan barava tinghae long datfala tok “Taed Long Physical Wei bat No Long Spiritual Wei.” Olketa interview bilong olketa wea Witness for longfala taem showim hao Jehovah savve mekem iumi kamap “strongfala man. . . thru long spirit bilong hem.”—Ephesians 3:16.
Fasin for give hem no wanfala fasin wea man born witim bat hem samting wea man mas lanem. Disfala important point hem kamap insaed datfala tok “No Hol Bak, Redy for Share.” And disfala kwestin for mekem man tingting hem kamap: “Waswe, iumi redy for sharem samfala minute insaed day witim olketa brata and sista bilong iumi wea olo, sik, sorre, or lonely?”
“Keakea Long ‘Voice Bilong Olketa Stranger’ ” hem barava kasem mind bilong audience. Datfala tok markem olketa wea followim Jesus olsem sheep wea lisin long voice bilong “gudfala shepherd” and wea no lisin long “voice bilong olketa stranger” wea toktok thru long planti difren wei wea Devil iusim.—John 10:5, 14, 27.
Wanfala grup mas sing tugeta mekem man heresavve long wanem olketa talem. For olketa tru worshiper givim glory long God, olketa mas wan mind evriwea long world. Dastawe, “Givim God Glory ‘Witim Wan Mouth’ ” hem givim gudfala instruction for showim iumi hao for toktok long wanfala “klin languis” and servem Jehovah “tugeta witim wan mind.”—Zephaniah 3:9.
Parents, especially olketa wea garem olketa young pikinini, barava hapi tumas long last tok bilong datfala day, “Olketa Pikinini—Wanfala Spesol Present.” Wanfala niu pablikeson wea garem 256 page hem release, wea mekem audience sapraes. Learn From the Great Teacher hem wanfala buk wea bae helpem parents for spendem taem saed long spiritual samting witim pikinini bilong olketa wea olketa present from God.
Theme Bilong Mek-thri Day: “Duim Evri Samting for Glory Bilong God”
Olketa reminder bilong text evriday nao startim lastfala day bilong convention witim samfala spiritual samting for ting raonem. Firstfala part long program bilong datfala day hem garem samfala point moa for olketa famili. Firstfala tok, “Parents, Buildimap Famili Bilong Iufala,” hem redyim mind bilong audience. Bihaen wei for reviewim olketa responsibility bilong parents for provaedem olketa material samting for famili bilong olketa, speaker pruvim hao main responsibility bilong olketa hem for provaed for spiritual need for olketa pikinini bilong olketa.
Speaker bihaen, hem tok for olketa pikinini and storyim topic “Wei wea Olketa Young Wan Praisem Jehovah.” Hem sei olketa young wan olsem “dew drop” bikos olketa kamap planti and from olketa serve witim strong wea barava encouragem man. Olketa full grown man hapi for waka witim olketa insaed long service bilong Jehovah. (Psalm 110:3) Disfala part hem finis witim olketa nambawan interview bilong olketa young wan wea showimaot gud example.
Evritaem wanfala samting wea interesting tumas long olketa distrik convention hem olketa Bible drama, and disfala convention tu garem. Datfala drama “No Fraet for Givim Witness Nomata Pipol Againstim Iumi” hem story abaotem olketa first-century follower bilong Jesus. Hem no just interesting bat, long wei wea moa important, hem teachim iumi samfala samting. Tok wea kamap bihaen drama, “‘Nating Givap’ for Talemaot Gud Nius,” hem barava strongim olketa point wea kamap insaed drama.
Evriwan wea attend barava luk forward long wanfala main tok long program long Sunday, hem nao datfala pablik tok, “Hu Nao Olketa wea Givim God Glory Distaem?” Speaker talemaot olketa pruv hao pipol saed long science and religion olketa nating givim glory long God. Only pipol for nem bilong hem, olketa wea preachim and teachim truth abaotem Jehovah, nao olketa wea really givim glory long nem bilong hem distaem.
Bihaen pablik tok hem olketa main point bilong Wastaoa study bilong datfala week.Then hem last tok, “‘Go Ahed for Garem Planti Frut’ for Givim Jehovah Glory.” Speaker explainim wanfala resolution wea garem tenfala point for evriwan wea attend for acceptim. Hem showimaot samfala wei wea man savve givim glory long Jehovah, datfala Creator. Wei wea evriwan wan mind for ansa “yes” hem kamap long evri convention evriwea long world.
So datfala convention hem end witim wei wea evriwan wea attend ting strong long datfala theme “Givim God Glory.” And witim help bilong spirit bilong Jehovah and organization bilong hem wea iumi savve lukim, iumi mas olowe luk aotem wei for givim Glory long God and no long olketa man.
[Box/Olketa Piksa long page 23]
Olketa International Convention
Olketa international convention wea go ahed for fofala day, kamap long Africa, Asia, Australia, Europe, and North and South America. Samfala Witness wea kasem invitation from evriwea long world olketa hipap long datfala taem. Long wei olsem olketa visitor and olketa wea lukaftarem olketa “givimaot encouragement” long each other. (Romans 1:12) Olketa olo fren meet bak moa, and mekem samfala niu fren tu. Wanfala spesol part long olketa international convention hem olketa part long program wea garem title “Olketa Report From Nara Kantri.”
[Box/Olketa Piksa page 25]
Olketa Niu Pablikeson wea Givim God Glory
Tufala niu pablikeson wea release long datfala “Givim God Glory” Distrik Convention. Datfala Bible buk wea garem olketa map See the Good Land hem garem strong kava and 36 page wea garem olketa map and piksa bilong olketa Bible ples. Evri page hem garem kala and garem olketa map bilong olketa rul bilong Assyria, Babylon, Medo-Persia, Greece, and Rome. Olketa nara map stap wea showimaot ministry bilong Jesus and wei wea Christian Wei hem muv.
Learn From the Great Teacher hem wanfala buk wea garem 256 page and 230 piksa. Man savve barava enjoyim wei for story witim olketa pikinini nomata long wei for iusim olketa piksa nomoa and ansarem olketa kwestin wea mekem pikinini tingting wea stap insaed datfala buk. Olketa wakem disfala niu pablikeson for protectim olketa young wan from wei wea Satan attakim olketa long wei for spoelem fasin bilong olketa.
[Piksa long page 23]
Olketa Missionary storyim olketa experience wea strongim faith
[Olketa Piksa long page 24]
Baptism hem important part bilong olketa “Givim God Glory” convention
[Olketa Piksa long page 24]
Olketa wea young and olo enjoyim olketa Bible drama