Garem Strongfala Faith Long Kingdom
“Faith hem mekem man sure samting wea hem hope long hem bae kamap tru.”—HEB. 11:1.
1, 2. Wanem nao bae iumi storyim long disfala study, and hao nao diswan bae strongim faith bilong iumi? (Lukim piksa long start bilong study.)
IUMI Olketa Jehovah’s Witness strong for talemaot long pipol Kingdom bilong God nomoa bae stretem evri problem bilong iumi. Waswe, iumi barava bilivim Kingdom hem stap, and God bae iusim Kingdom for mekem plan bilong hem kamap tru? Why nao iumi savve garem strongfala faith long Kingdom?—Heb. 11:1.
2 Jehovah bae iusim Messiah Kingdom for mekem plan bilong hem for olketa man kamap tru. Iumi savve garem strongfala faith long Kingdom bikos Jehovah hem startim Kingdom hia, and Hem nao garem raet for rul. Hu nao King bilong disfala Kingdom? Hu nao olketa narawan wea bae rul witim King hia? Hu nao bae olketa rul ovarem? Iumi savve kasem ansa bilong olketa kwestin hia long samfala agreement wea Bible story abaotem. Samfala agreement hia Jehovah nao mekem, and wanfala agreement Son bilong hem Jesus Christ nao mekem. Olketa agreement hia fitim olketa standard bilong Jehovah. Taem iumi storyim olketa agreement hia long disfala study and long nextfala study, diswan bae helpem iumi for barava sure plan bilong Jehovah bae kamap tru, and for garem strongfala faith long Kingdom.—Readim Ephesus 2:12.
3. Wanem nao iumi bae storyim long disfala study and long nextfala study?
3 Bible story abaotem sixfala agreement wea join witim Messiah Kingdom wea Jesus Christ nao rulim. Olketa hia nao: (1) Agreement wea God mekem witim Abraham. (2) Law agreement. (3) Agreement wea God mekem witim David. (4) Agreement for kamap priest wea olsem Melchizedek. (5) Niu agreement. (6) Agreement for wanfala Kingdom. Bae iumi storyim wei wea olketa agreement hia join witim Kingdom, and hao God iusim olketa agreement hia for mekem plan bilong hem for earth and olketa man kamap tru.—Lukim datfala chart “Sixfala Agreement wea Mekem Plan Bilong God Kamap Tru.”
PROMIS WEA SHOWIMAOT PLAN BILONG GOD BAE KAMAP TRU
4. Wanem thrifala samting nao Jehovah talem abaotem olketa man, wea buk bilong Genesis storyim?
4 Bihaen Jehovah redyim earth for olketa man stap long hem, hem talem thrifala samting hia: (1) Hem bae wakem olketa man for garem olketa wei bilong hem. (2) Olketa man bae mekem disfala earth kamap paradaes and earth bae fulap long pipol wea raeteous. (3) Olketa man mas no kaikaim frut from datfala tree wea piksarem wei for savve long gud and nogud samting. (Gen. 1:26, 28; 2:16, 17) God no need for talem eni nara samting moa abaotem plan bilong hem for olketa man and disfala earth. Sapos olketa man obeyim hem, datfala plan bilong hem bae kamap tru. Bat wanem nao happen dastawe God mekem olketa agreement bihaen hem talem thrifala samting hia?
5, 6. (a) Wanem nao Satan duim for trae spoelem plan bilong God? (b) Wanem nao Jehovah duim taem Satan againstim hem long Eden?
5 Satan againstim God and trae for spoelem plan bilong hem. Hem switim Eve for kaikaim frut from datfala tree wea piksarem wei for savve long gud and nogud samting, bikos hem laekem olketa man for no obeyim God. (Gen. 3:1-5; Rev. 12:9) Taem hem duim datwan, hem kwestinim raet bilong God for rul ovarem olketa wea hem creatim. And tu, Satan sei olketa man worshipim God for kasem gud samting for olketa seleva nomoa.—Job 1:9-11; 2:4, 5.
6 Wanem nao Jehovah duim taem olketa hia againstim hem? Hem fit for killim dae thrifala hia. Bat sapos hem duim datwan, plan bilong hem wea hem talem finis for Adam and Eve garem pikinini and fulimap earth bae no happen nao. So Jehovah disaed for no killim dae thrifala hia, bat hem talemaot wanfala nambawan profesi, wea hem nao datfala promis wea God talem long Eden. Disfala profesi showimaot evri promis bilong God for disfala earth and for olketa man bae kamap tru.—Readim Genesis 3:15.
7. Wanem nao God talem bae hem duim long Satan and olketa pikinini bilong hem?
7 Datfala promis wea God talem long Eden showimaot hem judgem datfala snek, wea piksarem Satan, for mas dae, and olketa pikinini bilong hem, wea minim evriwan wea againstim rul bilong God, for mas dae tu. God sei pikinini bilong datfala woman bae finisim olketa hia wea againstim God. So promis wea God talem long Eden showimaot hem bae finisim Satan and evri nogud samting wea kamaot from wanem Satan duim, and hao God bae duim datwan.
8. Wanem nao iumi luksavve long hem abaotem datfala woman and pikinini bilong hem?
8 Hu nao pikinini bilong datfala woman? Datfala pikinini hem mas wanfala spirit long heven. Why nao iumi sei olsem? Bikos pikinini hia bae “finisim” Satan, wea hem tu wanfala spirit. (Heb. 2:14) So datfala woman wea bornem pikinini hia mas long heven tu. Bihaen God talem datfala promis long Eden, olketa pikinini bilong datfala snek kamap staka, bat for klosap 4,000 year no eniwan savve hu nao datfala woman and pikinini bilong hem. Insaed long olketa year hia, Jehovah mekem samfala agreement for helpem pipol bilong Hem luksavve hu nao pikinini bilong datfala woman, and for showimaot datfala pikinini nao bae stretem evri nogud samting wea Satan duim.
AGREEMENT WEA SHOWIMAOT HU NAO DATFALA PIKININI
9. Wanem nao datfala agreement God mekem witim Abraham, and wanem taem nao diswan hem start?
9 Samting olsem 2,000 year bihaen God talem datfala promis long Eden, Jehovah talem Abraham for lusim hom bilong hem long Ur and go long Canaan. (Acts 7:2, 3) God sei long hem: “Lusim kantri bilong iu and olketa relative bilong iu and haos bilong dadi bilong iu and go long kantri wea mi bae showim long iu. Mi bae mekem wanfala big nation kamaot from iu and mi bae blessim iu and mi bae mekem iu garem bignem, and olketa narawan bae kasem blessing bikos long iu. Mi bae blessim olketa wea blessim iu, and mi bae cursim man wea talem nogud samting long iu, and evri nation long earth bae kasem blessing bikos long iu.” (Gen. 12:1-3) Datfala promis wea God talem long Abraham, hem nao agreement wea God mekem witim Abraham. Iumi no savve firstfala taem wea Jehovah mekem disfala agreement witim Abraham. Bat iumi savve datfala agreement hem start long 1943 B.C.E., taem Abraham hem 75 year and hem lusim Haran and go long narasaed long Euphrates River.
10. (a) Wanem nao Abraham duim wea showimaot hem garem strongfala faith long olketa promis bilong God? (b) Olketa wanem information abaotem pikinini bilong datfala woman nao Jehovah isisi showimaot?
10 Long tu-thri taem wea Jehovah talem moa datfala promis long Abraham, hem talem samfala nara information abaotem datfala agreement. (Gen. 13:15-17; 17:1-8, 16) From Abraham garem strongfala faith long olketa promis bilong God, hem willing for sakrifaesim son bilong hem. Jehovah lukim faith bilong Abraham dastawe hem strongim moa datfala agreement wea hem mekem witim Abraham. Diswan mekem Abraham barava sure God bae duim wanem hem promisim. (Readim Genesis 22:15-18; Hebrew 11:17, 18.) Bihaen datfala agreement wea God mekem witim Abraham hem start, Jehovah isisi showimaot olketa important information abaotem pikinini bilong datfala woman wea Genesis 3:15 storyim. Datfala pikinini bae kam from laen bilong Abraham, hem bae no wanfala man nomoa bat hem bae staka man, olketa bae rul olsem olketa king, olketa bae finisim evri enemy bilong God, and staka pipol bae kasem blessing bikos long olketa.
Abraham showimaot hem garem strongfala faith long olketa promis bilong God (Paragraf 10 storyim diswan)
11, 12. Wanem nao olketa nara gud samting wea Bible sei bae kamaot from datfala agreement wea God mekem witim Abraham, and hao nao iumi bae kasem gud samting from datwan?
11 Datfala promis wea Jehovah talem long Abraham hem kamap tru taem olketa Israelite, wea kam from laen bilong Abraham, go insaed long Promis Land. Nomata olsem, Bible sei staka nara gud samting bae kamaot from datfala agreement wea God mekem witim Abraham. (Gal. 4:22-25) Aposol Paul sei Jesus Christ nao main pikinini wea kam from laen bilong Abraham. Olketa anointed Christian, wea namba bilong olketa hem 144,000, olketa tu pikinini wea kam from laen bilong Abraham. (Gal. 3:16, 29; Rev. 5:9, 10; 14:1, 4) Bible sei datfala woman wea Genesis 3:15 storyim hem “Jerusalem antap,” wea hem nao olketa faithful angel long organization bilong Jehovah long heven. (Gal. 4:26, 31) Datfala agreement wea God mekem witim Abraham showimaot pikinini bilong datfala woman bae mekem olketa man kasem staka blessing.
12 Agreement wea God mekem witim Abraham hem showimaot datfala Kingdom long heven bae hem kamap, and hem openem wei for Jehovah givim datfala Kingdom long King and olketa wea bae rul witim hem. (Heb. 6:13-18) Hao long nao disfala agreement bae stap? Long Genesis 17:7 hem sei datfala agreement “bae stap for olowe.” Hem bae stap go kasem taem Kingdom finisim olketa enemy bilong God and evri nation long earth bae kasem blessing. (1 Cor. 15:23-26) Bat olketa gud samting wea bae kamaot from disfala agreement bae stap for olowe. Agreement wea God mekem witim Abraham hem pruvim plan bilong Jehovah for “fulimap earth” witim pipol wea raeteous bae kamap tru.—Gen. 1:28.
AGREEMENT WEA SHOWIMAOT KINGDOM BAE RUL FOR OLOWE
13, 14. Agreement wea God mekem witim David showimaot wanem samting abaotem rul bilong Jesus?
13 Datfala promis wea God talem long Eden and datfala agreement wea God mekem witim Abraham showimaot wei wea Jehovah rul hem evritaem fitim olketa raeteous standard bilong hem. Datfala Messiah Kingdom tu hem fitim olketa raeteous standard bilong God. (Ps. 89:14) Waswe, enitaem bae datfala Messiah Kingdom duim nogud samting mekem God mas changem witim nara gavman? Narafala agreement wea God mekem hem showimaot datwan bae no happen.
14 Jehovah talem wanfala promis long King David. Datfala promis hem agreement wea God mekem witim David. (Readim 2 Samuel 7:12, 16.) Jehovah promisim David bae Messiah kam from laen bilong hem. (Luke 1:30-33) Taem Jehovah duim datwan, hem helpem pipol for luksavve Messiah bae kam from laen bilong David. Jehovah sei datwan wea kam from laen bilong David bae “garem raet” for kamap King long datfala Messiah Kingdom. (Ezek. 21:25-27) Rul bilong David bae “gohed for olowe” bikos Jesus, wea kam from laen bilong David, bae “laef for olowe. Rul bilong hem bae stap for olowe, olsem sun hem stap for olowe.” (Ps. 89:34-37) Iumi sure olketa gud samting wea datfala Kingdom bae duim bae no savve finis, and no enitaem rul bilong Jesus bae duim nogud samting!
AGREEMENT FOR KAMAP PRIEST
15-17. Datfala agreement for kamap priest wea olsem Melchizedek showimaot datfala pikinini bae garem wanem nara waka, and why nao olsem?
15 Agreement wea God mekem witim Abraham and agreement wea God mekem witim David showimaot pikinini bilong datfala woman bae kamap wanfala king. Bat for evri man barava kasem gud samting from rul bilong hem, datfala pikinini mas kamap wanfala priest tu. Priest nomoa savve offerim sakrifaes wea olketa man needim for kamap free from sin and for kam insaed famili bilong Jehovah long heven and long earth. So for mekem datfala pikinini garem raet for kamap wanfala priest, Jehovah mekem nara agreement, wea hem nao agreement for kamap priest wea olsem Melchizedek.
16 Samting wea King David raetem showimaot God bae mekem wanfala agreement witim Jesus Christ. Tufala samting nao insaed long datfala agreement. First samting, Jesus bae “sidaon long raet saed bilong [God]” and bae hem garem paoa for winim evri enemy bilong hem. Mek-tu samting, Jesus bae “wanfala priest for olowe olsem Melchizedek.” (Readim Psalm 110:1, 2, 4.) Why nao scripture hia sei Jesus hem priest “olsem Melchizedek”? Bifor olketa Israelite tekovarem Promis Land, Melchizedek hem king long taon wea olketa kolem Salem and hem “priest bilong Barava Haefala God.” (Heb. 7:1-3) Jehovah nao markem Melchizedek for kamap king and priest, and hem nomoa man wea olketa Hebrew Scripture sei hem duim tufala waka hia long semtaem. No eniwan wea stap bifor or wea kam bihaen long Melchizedek duim tufala waka hia long semtaem. So hem olsem Melchizedek hem “wanfala priest for olowe.”
17 Datfala agreement for kamap priest wea olsem Melchizedek showimaot God hem anointim Jesus for kamap priest. Jesus bae “priest for olowe olsem Melchizedek.” (Heb. 5:4-6) Disfala agreement showimaot Jehovah bae iusim Messiah Kingdom for mekem plan bilong hem for olketa man and disfala earth kamap tru.
OLKETA AGREEMENT PRUVIM KINGDOM HEM FITIM STANDARD BILONG GOD
18, 19. (a) Long wanem wei nao olketa agreement wea iumi storyim finis join witim Kingdom? (b) Wanem nao bae iumi storyim long nextfala study?
18 Long disfala study iumi storyim wei wea olketa agreement hia join witim datfala Messiah Kingdom, and wei wea olketa agreement hia pruvim Kingdom hem fitim olketa standard bilong God. Datfala promis wea God talem long Eden showimaot Jehovah bae iusim pikinini bilong datfala woman for mekem plan bilong hem for earth and olketa man kamap tru. Agreement wea God mekem witim Abraham showimaot datfala pikinini hem piksarem Jesus Christ and olketa anointed Christian, wea bae rul insaed Kingdom.
19 Agreement wea God mekem witim David showimaot Messiah bae kam from laen bilong hem. And tu, datfala agreement showimaot Jesus garem raet for rul ovarem earth for olowe. Datfala agreement for kamap priest wea olsem Melchizedek showimaot Jesus bae duim waka bilong priest. Bat olketa narawan tu bae waka witim Jesus for helpem olketa man kamap perfect. God markem olketa hia for kamap olketa king and priest. Olketa hia kam from wea? Bae iumi storyim diswan long nextfala study.