No Shame Long Wei wea Iu Wanfala Christian!

“Man wea tok praod mas tok praod saed long Jehovah.”—1 CORINTHIANS 1:31.

1. Wanem kaen tingting saed long religion nao kamap big distaem?

WANFALA man for story abaotem olketa religion, hem storyim tingting bilong planti pipol distaem abaotem religion. Hem sei wei for no interest long religion hem kamap big tumas and staka pipol “biliv long God bat no mas interest long hem.”

2. (a) Why nao iumi no sapraes taem iumi lukim pipol no interest long olketa spiritual samting? (b) Why nao diswan danger samting for olketa tru Christian?

² Olketa wea studyim Bible nating sapraes taem olketa lukim diswan happen. (Luke 18:8) Taem iumi tingim samting wea olketa religion duim, diswan mekem iumi expectim pipol for garem kaen tingting olsem. For longfala taem nao false religion hem laea long pipol and mekem pipol feel nogud. (Revelation 17:15, 16) Bat, diskaen wei for hafhaf and no strong for religion hem danger samting for olketa tru Christian. Iumi bae kasem nogud samting sapos iumi no interest long samting wea iumi bilivim and sapos iumi lusim strong bilong iumi for God and for truth bilong Bible. Jesus talem warning abaotem kaen wei for hafhaf olsem taem hem sei long olketa Christian long Laodicea: “Iu no cold and iu no hot tu. Mi laekem iu for cold or hot. . . . Iufala hafhaf.”—Revelation 3:15-18.

Luksavve Hu Nao Iumi

3. Iumi mas hapi and no shame long olketa wanem samting wea showimaot iumi Christian?

³ For faet againstim kaen tingting olsem for no interest, olketa Christian need for luksavve hu nao olketa, and olketa mas hapi and no shame long wei wea olketa Christian. From iumi servem Jehovah and iumi olketa disaepol bilong Christ, Bible showimaot hu nao iumi. Iumi “olketa witness” bilong Jehovah. Iumi “waka witim God” taem iumi sharem “gud nius” long olketa narawan. (Isaiah 43:10; 1 Corinthians 3:9; Matthew 24:14) Iumi pipol wea “lovem each other.” (John 13:34) Olketa tru Christian olketa pipol wea “trainim paoa bilong olketa for luksavve long samting wea stret and no stret.” (Hebrews 5:14) Iumi “shaen olsem laet insaed long world.” (Philippians 2:15) Iumi trae hard for “keepim fasin bilong [iumi] gud midolwan long olketa nation.”—1 Peter 2:12; 2 Peter 3:11, 14.

4. Wanem nao wanfala worshiper bilong Jehovah mas no part long hem?

⁴ Olketa trufala worshiper bilong Jehovah savve tu long samting wea olketa no part long hem. “Olketa no part bilong world,” olsem wei wea Leader bilong olketa, Jesus Christ, hem no part bilong world. (John 17:16) Olketa stap separate from “olketa nation,” wea ‘stap long darkness, and wea stap farawe from laef wea God markem for man.’ (Ephesians 4:17, 18) From datwan, olketa hia wea followim Jesus “rejectim fasin wea no followim God and olketa samting wea world wantem and . . . [olketa] live followim stretfala tingting and raeteous fasin and fasin for lovem God insaed long world wea stap distaem.”—Titus 2:12.

5. Wanem nao wei for “tok praod saed long Jehovah” hem minim?

⁵ Wei wea iumi minim klia hu nao iumi and hao iumi garem wei for fren witim Sovereign Ruler bilong universe hem muvim iumi for “tok praod saed long Jehovah.” (1 Corinthians 1:31) Wanem kaen wei for tok praod nao diswan? Iumi olketa tru Christian hapi and no shame long wei wea Jehovah nao God bilong iumi. Iumi followim disfala kaonsel: “Man wea tok praod saed long hemseleva mas tok praod for disfala reason, wei wea hem garem fasin for luksavve and for savve long mi, hao mi nao Jehovah, datwan wea showimaot loving-kaeness, justice and raeteous fasin long earth.” (Jeremiah 9:24) Iumi “tok praod” saed long privilege wea iumi garem for savve long God and wei wea hem iusim iumi for helpem olketa narawan.

Waka Hard for Tingim Klia

6. Why nao hem no isi for samfala Christian evritaem tingim klia hu nao olketa?

⁶ For tok stret, hem no isi for iumi evritaem tingim klia hao iumi Christian. Wanfala young man wea growap insaed wanfala Christian famili talem hao hem kamap wik long spiritual wei for lelebet taem and hem sei: “Samfala taem, mi no savve why nao mi kamap wanfala Jehovah’s Witness. Mi savve long truth from taem mi baby yet. Samfala taem mi feel disfala religion hem semsem witim olketa narawan nomoa.” Maet samfala Christian letem hapitaem bilong world, olketa nius report, and tingting wea no followim God for affectim tingting and samting olketa duim. (Ephesians 2:2, 3) Samfala Christian maet daotem olketa seleva for lelebet taem and olketa maet lukluk gud long olketa seleva moa for luksavve long samting wea really important and goal wea olketa shud garem.

7. (a) Wanem kaen wei for lukluk long seleva nao hem fitim olketa servant bilong God?

⁷ Waswe, hem rong for iumi lukluk gud long iumiseleva samfala taem? Nomoa. Tingim hao aposol Paul hem encouragem olketa Christian for gohed lukluk gud long olketa seleva: “Gohed for testim sapos iufala biliv yet, gohed lukluk long wanem kaen man nao iufala.” (2 Corinthians 13:5) Disfala aposol encouragem man for lukluk gud long hemseleva witim goal for stretem eni samting wea hem wik long hem long spiritual wei. Wanfala Christian savve testim hemseleva for luksavve sapos hem biliv yet, taem hem mek sure toktok and samting hem duim hem followim wanem hem sei hem bilivim. Tru nao, iumi no laek for ‘shiprek saed long faith bilong iumi’!—1 Timothy 1:19.

Iumi Savve Feel Wikdaon

8, 9. (a) Wanem nao Moses talem, wea showimaot hem garem feeling for daotem hemseleva? (b) Wanem nao Jehovah duim taem Moses hem hol bak? (c) Wanem nao feeling bilong iu taem iu herem olketa promis bilong Jehovah?

⁸ Sapos wanfala Christian daotem hemseleva samfala taem, waswe, diswan minim hem wikdaon nao? Barava nomoa! Olketa Christian wea feel olsem savve kasem comfort from wei for savve hao diskaen feeling for daot hem no niu samting. Olketa faithful witness bilong God bifor tu feisim sem samting. Tingim example bilong Moses wea garem bigfala faith, loyal fasin, and love. Taem Moses mas duim wanfala waka wea luk olsem hem barava hard, hem feel shame and sei olsem: “Hu nao mi?” (Exodus 3:11) Luk olsem, long tingting bilong hemseleva hem sei, ‘mi man nating nomoa!’ or ‘mi iusles!’ Maet samfala samting wea kasem Moses bifor nao mekem hem feel hem no fit: Tingim hao hem kam from wanfala nation wea slave. Olketa Israelite rejectim hem. Hem no savve toktok gud. (Exodus 1:13, 14; 2:11-14; 4:10) And tu, hem wanfala shepherd, waka wea olketa bilong Egypt heitim. (Genesis 46:34) Dastawe hem feel hem no fit for duim disfala waka for mekem pipol bilong God kamap free!

⁹ Jehovah strongim Moses taem hem talem tufala strongfala promis: “Mi bae stap witim iu, and diswan nao saen for showimaot hao mi nao sendem iu: Bihaen iu tekem kamaot olketa pipol from Egypt, iufala bae servem tru God long disfala maunten.” (Exodus 3:12) God talem disfala servant bilong hem wea hol bak, hao Hem bae stap witim hem evritaem. And tu, Jehovah showimaot hao hem bae no fail for mekem pipol bilong hem kamap free. Insaed planti handred year wea go pas, God talem olketa promis olsem for givim sapot. Tingim disfala toktok wea hem talem thru long Moses for nation bilong Israel taem olketa redi for go insaed long Promis Land: “No fraet and kamap strong. . . . God bilong iu Jehovah hem march witim iu. Hem bae no lusim iu or leavim iu evribit.” (Deuteronomy 31:6) Jehovah hem strongim Joshua tu taem hem sei: “No eniwan bae strong for againstim iu long full laef bilong iu. . . . Mi bae stap witim iu. Bae mi no leavim iu or lusim iu evribit.” (Joshua 1:5) And hem promis olsem long olketa Christian: “Mi bae nating lusim iu and bae nating forgetim iu.” (Hebrews 13:5) From iumi garem strong sapot olsem iumi shud nating feel shame long wei wea iumi Christian!

10, 11. Wanem nao helpem Asaph for garem stretfala tingting abaotem service bilong hem for Jehovah?

¹⁰ Samting olsem 500 year bihaen Moses, wanfala faithful Levite wea nem bilong hem Asaph raet and talem stret hao hem daotem sapos man bae kasem gud samting from wei for followim raeteous fasin. Asaph lukim hao olketa wea ting daonem God gohed for kamap strong and rich, bat hemseleva stragol from hem kasem olketa test and temptation nomata hem servem God. Diswan mekem Asaph feel hao? Hem sei: “Saed long mi, leg bilong mi klosap tan go difren, klosap nomoa mi step rong and foldaon. From mi kamap jealous long olketa man wea tok praod, taem mi lukim wei wea wicked pipol stap long peace.” Hem start for feel hao wei for worshipim Jehovah hem no mekem man kasem eni gud samting. Hem ting olsem: “Hem barava iusles nomoa hao mi klinim heart bilong mi, and hao mi wasim hand long wei for no guilty. And mi safa long full day.”—Psalm 73:2, 3, 13, 14.

¹¹ Hao nao Asaph deal witim wei wea hem feel nogud olsem? Waswe, hem denyim wei wea hem feel olsem? Nomoa. Olsem iumi lukim long Psalm 73, hem talemaot feeling bilong hem taem hem prea long God. Wei wea Asaph visitim temple, hem helpem hem for changem tingting bilong hem. Taem hem stap long there, hem luksavve hao wei for servem God nomoa hem best wei. Bihaen hem strongim bak wei for tinghae long olketa spiritual samting, hem luksavve hao Jehovah heitim olketa nogud fasin and gogo bae hem panisim olketa wicked pipol. (Psalm 73:17-19) Taem hem gohed for stretem tingting bilong hem, Asaph strongim bak wei for tingim klia hu nao hem, hao hem garem privilege for servem Jehovah. Hem sei olsem long God: “Mi stap evritaem witim iu; iu holem nao raet hand bilong mi. Witim kaonsel bilong iu, bae iu leadim mi, and bihaen bae iu tekem mi go long glory.” (Psalm 73:23, 24) Asaph kasem bak feeling for hapi and no shame long God bilong hem.—Psalm 34:2.

Olketa Barava Tingim Klia Hu Nao Olketa

12, 13. Talem example bilong samfala long Bible wea tinghae and hapi long wei wea olketa fren witim God.

¹² Wanfala wei for strongim feeling bilong iumi for hapi and tinghae long wei wea iumi Christian, hem for ting raonem and followim faith bilong olketa loyal worshiper, wea nomata olketa kasem hard taem olketa gohed for hapi and no shame long wei wea olketa fren witim God. Tingim Joseph, son bilong Jacob. Taem hem young nomoa, olketa salem hem for kamap slave and olketa tekem hem go long Egypt, wea hem planti handred kilometer farawe from dadi bilong hem wea fraet long God and from famili bilong hem long hom. Taem hem stap long Egypt, no eni man stap for helpem Joseph luksavve long tingting bilong God, and hem mas feisim olketa hardfala test saed long fasin and wei wea hem depend long God. Nomata olsem, hem barava trae hard for evritaem tingim klia hao hem wanfala servant bilong God, and hem gohed for faithful for duim samting wea hem bilivim hem stret. Hem nating shame long wei wea hem wanfala worshiper bilong Jehovah nomata hem stap witim pipol wea no worshipim God, and hem no hol bak for talemaot tingting bilong hem.—Genesis 39:7-10.

¹³ Samting olsem 800 year bihaen, wanfala Israelite girl wea hem slave bilong Naaman, wea hem komanda long army bilong Syria, hem nating forgetim wei wea hem wanfala worshiper bilong Jehovah. Taem chance kamap, hem iusim datwan for witness for Jehovah taem hem talemaot hao Elisha hem profet bilong tru God. (2 Kings 5:1-19) Planti year bihaen datwan, young King Josiah wea stap midolwan pipol wea lusim tru worship, hem duim samting for strongim bak tru worship, hem repairim temple bilong God, and hem leadim datfala nation for worshipim Jehovah moa. Hem nating shame long faith and worship bilong hem. (2 Chronicles, chapter 34, 35) Daniel and thrifala Hebrew fren bilong hem long Babylon nating forgetim wei wea olketa servant bilong Jehovah, and nomata olketa kasem hevi and temptation, olketa gohed for faithful. Tru nao, olketa tu hapi and no shame long wei wea olketa servem Jehovah.—Daniel 1:8-20.

No Shame, Bat Hapi

14, 15. For tok praod abaotem wei wea iumi Christian hem minim wanem?

¹⁴ Olketa hia wea servem God win for duim diswan from olketa mekem grow feeling for tinghae and no shame long wei wea olketa servant bilong God. Waswe iumi distaem? Wei for tok praod and no shame long wei wea iumi Christian hem minim wanem?

¹⁵ Main samting nao, iumi mas barava tinghae long wei wea iumi pipol wea garem nem bilong Jehovah, and tu, for hem blessim and appruvim iumi. God nating konfius abaotem hu nao pipol bilong hem. Aposol Paul, wea stap long taem wea pipol konfius saed long religion, hem raet olsem: “Jehovah savve long olketa wea bilong hem.” (2 Timothy 2:19; Numbers 16:5) Jehovah nating shame long olketa “wea bilong hem.” Hem sei: “Man wea tasim iufala hem tasim eye bilong mi.” (Zechariah 2:8) Tru nao, Jehovah lovem iumi. So iumi tu shud garem deepfala love for hem. Paul hem sei: “Sapos eniwan lovem God, God savve long hem.”—1 Corinthians 8:3.

16, 17. Why nao olketa young and olo Christian barava tinghae and no shame long spiritual samting wea olketa kasem from bifor kam?

¹⁶ Olketa young wan wea growap insaed truth shud lukluk gud sapos wei wea olketa tingim klia hao olketa Christian hem kakamap moa strong bikos long wei wea olketa fren gud witim God. Olketa shud no depend long faith bilong mami and dadi. Saed long olketa servant bilong God, Paul raet olsem: “Sapos man hem standap or foldaon datwan depend long masta bilong hem.” Dastawe, Paul sei moa: “Iumi wanwan bae givim ansa for iumiseleva long God.” (Romans 14:4, 12) So for tok stret, bae man hard for keepim wei for fren gud witim Jehovah sapos only reason hem worshipim Jehovah hem from hem growap insaed long truth.

¹⁷ Olketa Witness bilong Jehovah stap kam from taem bifor. Diswan start witim Abel samting olsem 6,000 year bifor, and hem gohed kasem “bigfala crowd” bilong olketa Witness distaem. And tu, diswan bae gohed long future from planti Witness moa bae worshipim Jehovah and bae kasem laef olowe. (Revelation 7:9; Hebrews 11:4) Iumi distaem part long disfala sekson bilong olketa faithful worshiper. Wei wea iumi Witness for Jehovah hem wanfala nambawan spiritual samting wea iumi kasem from bifor kam!

18. Hao olketa fasin and standard bilong iumi mekem iumi difren from world?

¹⁸ Iumi garem tu olketa fasin and standard wea savve showimaot hao iumi Christian. “Datfala Wei,” hem nomoa only wei wea savve mekem iumi win long laef and mekem God hapi. (Acts 9:2; Ephesians 4:22-24) Olketa Christian “mek sure long evri samting” and “hol strong long samting wea gud”! (1 Thessalonians 5:21) Iumi minim klia hao Christian Wei and wei bilong world wea stap farawe from God hem barava difren. Jehovah barava showimaot klia tru worship and false worship. Hem tok olsem thru long profet bilong hem Malachi: “Iufala bae barava lukim klia moa wei wea raeteous man hem difren from wicked man, wei wea man wea servem God hem difren from man wea no servem hem.”—Malachi 3:18.

19. Wanem nao olketa tru Christian bae no duim?

¹⁹ From iumi stap insaed world wea konfius and olobaot, hem barava important for iumi tok praod saed long Jehovah. Bat wanem nao bae helpem iumi for gohed for tinghae and no shame long God bilong iumi and barava tingim klia hao iumi Christian? Samfala idea for helpem iumi stap insaed next article. Taem iumi ting raonem olketa point hia, iumi sure long diswan: Olketa tru Christian bae no enitaem “biliv long God bat no mas interest long hem.”

Waswe, Iu Remember?

• Hao nao olketa Christian savve “tok praod saed long Jehovah”?

• Wanem nao iu lanem from example bilong Moses and Asaph?

• Long Bible, hu nao samfala wea showimaot olketa nating shame from olketa servant bilong God?

• Wanem nao hem minim for tok praod saed long wei wea iumi Christian?

[Piksa long page 14]

For lelebet taem, Moses daotem hemseleva

[Piksa long page 15]

Planti servant bilong Jehovah no shame long hu nao olketa