Word Bilong Jehovah Hem Laef
Olketa Main Point From Buk Bilong Leviticus
HEM no wan year yet from taem wea olketa Israelite kamap free from wei for slave long Egypt. Olketa kamap wanfala niu nation and olketa gogo for land bilong Canaan. Purpose bilong Jehovah hem for wanfala holy nation for stap long there. Bat, living and religion bilong pipol long Canaan hem dirty tumas. So tru God givim olketa law long kongregeson bilong Israel wea bae mekem olketa separate for duim service bilong hem. Olketa law hia stap insaed long Bible buk bilong Leviticus. Buk hia, wea profet Moses raetem long wilderness bilong Sinai long samting olsem 1512 B.C.E., hem storyim olketa samting wea happen insaed wanfala month nomoa. (Exodus 40:17; Numbers 1:1-3) Jehovah hem go ahed for talem olketa worshiper bilong hem for mas holy.—Leviticus 11:44; 19:2; 20:7, 26.
Olketa Witness bilong Jehovah distaem no stap anda datfala Law wea God givim thru long Moses. Dae bilong Jesus Christ hem finisim datfala Law. (Romans 6:14; Ephesians 2:11-16) Bat, olketa law wea stap long Leviticus savve helpem and teachim planti samting abaotem wei for worshipim God bilong iumi, Jehovah.
OLKETA HOLY SAKRIFAES—WEA MAN CHUS FOR GIVIM AND WEA MAN MAS GIVIM
Samfala sakrifaes bilong Law hem samting wea man seleva savve chus for givim, and samfala, olketa mas givim. Olsem example olketa bone sakrifaes hem samting wea man savve chus for givim. Olketa givim full sakrifaes hia long God, olsem wei wea Jesus Christ willing for givim evribit laef bilong hem olsem ransom sakrifaes. Communion sakrifaes wea man savve chus for givim hem samting wea olketa sharem. Wanfala part olketa givim long God long altar, nara part priest nao bae kaikaim, and nara part man wea offerim datwan nao bae kaikaim. For olketa anointed Christian, diswan semsem witim Memorial bilong dae bilong Christ wea hem olsem wanfala wei for sharem kaikai tugeta.—1 Corinthians 10:16-22.
Sin sakrifaes and guilt sakrifaes hem samting wea man mas givim. Sin sakrifaes hem for kavarem olketa sin wea man mistek for duim, or no min for duim. Guilt sakrifaes hem mekem God satisfae taem man hem spoelem right bilong narawan or taem olketa givim bak samfala right bilong samwan wea duim sin bat wea repent—or tufala evriwan. Olketa givim grain sakrifaes tu for showimaot olketa tinghae long olketa samting wea Jehovah provaedem. Evriting hia hem mekem iumi interest from olketa sakrifaes wea part bilong Law covenant point go long Jesus Christ and sakrifaes bilong hem or olketa gud samting wea iumi kasem from datfala sakrifaes.—Hebrews 8:3-6; 9:9-14; 10:5-10.
Ansa for Olketa Bible Kwestin:
2:11, 12—Why nao Jehovah bae no acceptim wei for offerim honey “olsem wanfala sakrifaes long fire”? Disfala honey hem no kaen honey wea olketa bee wakem. Nomata honey hia hem no samting wea olketa savve offerim “olsem sakrifaes long fire,” hem samting wea olketa savve givim olsem “olketa firstfala frut bilong . . . olketa samting wea kam from garden.” (2 Chronicles 31:5) Luk olsem disfala honey wea Leviticus storyim hem nao juice bilong olketa frut. From hem savve kamap saoa, hem no samting wea Jehovah acceptim olsem sakrifaes long altar.
2:13—Why nao olketa mas givim salt “witim evri sakrifaes”? Diswan no for mekem olketa sakrifaes for teist naes. Evriwea long world, pipol iusim salt olsem samting for mekem kaikai no kamap nogud. Luk olsem olketa givim diswan witim olketa sakrifaes bikos hem piksarem wei for free from wei for kamap nogud and rotten.
Olketa Leson for Iumi:
3:17. From pipol long datfala taem ting long gris olsem best part, wei wea Jehovah stopem olketa for kaikaim hem strongim long olketa Israelite hao best part hem bilong Jehovah. (Genesis 45:18) Diswan mekem iumi tingim hao iumi shud givim barava best bilong iumi long Jehovah.—Proverbs 3:9, 10; Colossians 3:23, 24.
7:26, 27. Olketa Israelite mas no kaikaim blood. Long tingting bilong God, blood hem piksarem laef. Leviticus 17:11 sei: “Soul bilong flesh hem insaed long blood.” Wei for stap klia from blood hem still samting wea olketa tru worshiper distaem mas duim.—Acts 15:28, 29.
START BILONG SEKSON BILONG OLKETA HOLY PRIEST
Hu nao kasem responsibility for lukaftarem waka saed long olketa sakrifaes? Datwan hem for olketa priest. Moses followim samting God talem for mekem wanfala ceremony for Aaron kamap hae priest, and for fofala son bilong hem for kamap olketa priest wea waka anda long hem. Luk olsem datfala ceremony hem go ahed for sevenfala day, and then sekson bilong priest hia start for waka long day bihaen datwan.
Ansa for Olketa Bible Kwestin:
9:9—Wanem nao mining bilong wei for kapsaetem blood long botom bilong altar and putim lelebet long olketa nara samting? Diswan showimaot hao Jehovah acceptim blood for kavarem sin. Full arrangement for kavarem sin hem garem faondeson long blood. Aposol Paul raet olsem: “Klosap evri samting kamap klin thru long blood, and sapos no eni blood hem kapsaet, no eni wei for forgive hem stap.”—Hebrews 9:22.
10:1, 2—Wanem nao maet insaed datfala sin bilong tufala son bilong Aaron, Nadab and Abihu? No longtaem bihaen Nadab and Abihu no duim waka bilong olketa olsem priest long stretfala wei, Jehovah tambuim olketa priest for drinkim wine or alcohol taem olketa serve long tabernacle. (Leviticus 10:9) Diswan showimaot hao maet tufala son bilong Aaron drinkim alcohol bifor olketa waka. Bat, reason why olketa dae hem from olketa offerim “fire wea no stret, wea [Jehovah] no markem olketa for givim.”
Olketa Leson for Iumi:
10:1, 2. Olketa servant bilong Jehovah wea garem important waka distaem olketa mas followim olketa samting wea God markem olketa for duim. And tu, olketa mas no bighed taem olketa duim waka bilong olketa.
10:9. Iumi shud no drinkim alcohol bifor iumi duim waka wea God markem iumi for duim.
TAEM IUMI DUIM HOLY WORSHIP IUMI MAS KLIN
Olketa law saed long kaikai wea talem wanem animal hem klin and no klin, helpem olketa bilong Israel long tufala wei. Hem protectim olketa from nogud sik and strongim wei wea olketa difren from olketa nation wea stap raonem olketa. Olketa nara law deal witim wei wea man savve kamap dirty from body bilong man wea dae, wei for olketa woman kamap klin bihaen olketa bornem pikinini, samting wea man mas duim saed long leprosy, and wei for no klin from samting wea kamaot from private part bilong man and woman. Olketa priest nao mas helpem olketa wea kamap no klin.
Ansa for Olketa Bible Kwestin:
12:2, 5—Why nao wei for bornem pikinini mekem woman “no klin”? Jehovah wakem olketa private part bilong man and woman for pasim go perfect laef thru long wei for garem pikinini. Bat, bikos man born kam witim sin, wei for no perfect and laef wea sin hem pas go long olketa pikinini. Olketa taem wea olketa markem olsem ‘no klin’ wea join witim wei for bornem pikinini, and olketa nara samting tu, olsem sik bilong woman and wata bilong man, hem for mekem olketa tingim wei wea sin hem pas go long olketa. (Leviticus 15:16-24; Psalm 51:5; Romans 5:12) Olketa law saed long wei for kamap klin moa hem helpem olketa Israelite minim hao olketa needim wanfala ransom for kavarem sin and mekem olketa man kamap perfect moa. Dastawe law hem kamap “olsem man wea leadim [olketa] go long Christ.”—Galatians 3:24.
15:16-18—Wanem nao datfala “wata bilong man” wea olketa verse hia storyim? Luk olsem diswan storyim wata bilong man wea savve kamap taem man sleep and tu taem hem duim sex witim waef bilong hem.
Olketa Leson for Iumi:
11:45. Jehovah God hem holy and hem sei evriwan wea duim holy service long hem mas holy. Olketa mas aftarem holy fasin and stap klin long physical and spiritual wei.—2 Corinthians 7:1; 1 Peter 1:15, 16.
12:8. Jehovah letem olketa wea poor for offerim olketa bird olsem sin sakrifaes winim wei for offerim sheep wea kostim staka selen. Hem tingim olketa wea poor.
MAS KEEPIM HOLY FASIN
Olketa sakrifaes wea barava moa important saed long sin savve kamap evri year long datfala Day Bilong Atonement. Olketa savve offerim wanfala buluka for olketa priest and tribe bilong Levi. Olketa sakrifaesim wanfala goat for olketa nara tribe bilong Israel wea no priest. Narafala goat olketa sendem go long wilderness bihaen olketa holem hem and talemaot sin bilong pipol. Tufala goat hia olketa wanfala sin sakrifaes nomoa. Evri samting hia point go long wei wea Jesus Christ bae olsem wanfala sakrifaes and bae karem olketa sin go farawe.
Olketa law saed long wei for kaikaim meat and olketa nara samting strongim long iumi hao iumi need for holy taem iumi worshipim Jehovah. Hem barava fitim hao olketa priest mas keepim olketa seleva holy. Thrifala festival wea kamap evri year olketa taem bilong bigfala hapi and taem for sei thankiu long Creator. Jehovah givim tu olketa law saed long wei wea samwan spoelem holy nem bilong hem, for keepim olketa Sabbath and olketa Jubilee, hao for deal witim olketa wea poor and olketa wea slave. Hem talemaot olketa blessing wea bae kamap sapos olketa obeyim God and olketa curse wea bae olketa kasem sapos olketa no obey. Olketa law stap tu abaotem wei for givim sakrifaes saed long olketa promis, wei for markem kost, wei for givim firstborn bilong olketa animal, and for givim mek ten part olsem “samting wea holy long Jehovah.”
Ansa for Olketa Bible Kwestin:
16:29—Long wanem wei nao olketa Israelite mas ‘mekem soul bilong olketa safa’? Diswan hem join witim wei for askem forgiveness for sin, wea olketa duim long Atonement Day. Wei for no kaikai hem join witim wei for showimaot hao olketa sin. So luk olsem, wei for ‘mekem soul bilong olketa safa’ hem minim wei for no kaikai.
19:27—Wanem nao mining bilong komand for no “katem short olketa hair long saed” or “katem end” beard? Luk olsem disfala law hem for stopem olketa Jew from wei for katem beard or hair followim wei bilong olketa heathen. (Jeremiah 9:25, 26; 25:23; 49:32) Bat, komand bilong God hem no stopem wei for lelebet katem beard or hair bilong olketa for mekem hem stret.—2 Samuel 19:24.
25:35-37—Waswe, evritaem hem rong for olketa bilong Israel askem interest? Sapos olketa kaonem selen for bisnis, man wea givim kaon savve askem interest. Bat, Law stopem wei for askem interest long selen wea olketa poor man kaonem. Wei for kasem selen from wei wea neiba bilong olketa hem kasem hard taem hem no stret.—Exodus 22:25.
26:19—Hao nao ‘skae kamap olsem iron and earth olsem copper’? From no eni rain, skae long land bilong Canaan bae luk olsem iron wea no eni wata savve kamaot from. From no eni rain, earth bae kala olsem copper wea braet tumas.
26:26—Wanem nao mining bilong wei wea ‘tenfala woman beikem bred long wanfala oven’? Long evriday living, each woman bae need for garem separate oven for fitim kaikai wea hem bae beikem. Bat toktok hia showimaot hao kaikai bae no staka dastawe tenfala woman bae savve kuki long wanfala oven nomoa. Diswan hem warning abaotem samting wea bae happen sapos olketa no keepim holy fasin.
Olketa Leson for Iumi:
20:9. Long tingting bilong Jehovah fasin for heit and laek spoelem narawan hem semsem olsem wei for killim dae man. Dastawe man wea tok daonem parents bilong hem bae kasem sem panis olsem sapos hem killim olketa dae. Diswan muvim iumi for showimaot love long olketa Christian brata bilong iumi.—1 John 3:14, 15.
22:32; 24:10-16, 23. Nem bilong Jehovah hem no samting for tok daonem. Bat iumi mas praisem nem bilong hem and prea for datfala nem kamap holy.—Psalm 7:17; Matthew 6:9.
HAO LEVITICUS AFFECTIM WORSHIP BILONG IUMI
Olketa Jehovah’s Witness distaem no stap anda long Law. (Galatians 3:23-25) Bat, from toktok long Leviticus helpem iumi for savve long tingting bilong Jehovah abaotem planti samting, hem savve affectim wei wea iumi worshipim hem.
Taem iu duim Bible reading evri week for prepare for Theocratic Ministry Skul, for sure iu bae interest tumas long wei wea God bilong iumi hem wantem evri servant bilong hem for holy. Disfala Bible buk savve muvim iu for givim best bilong iu for Datwan wea Most Hae, for olowe keepim holy fasin wea bae mekem hem kasem praise.
[Piksa long page 21]
Olketa sakrifaes wea olketa offerim anda long Law hem point go long Jesus Christ and sakrifaes bilong hem
[Piksa long page 22]
Festival Bilong Olketa Cake wea No Garem Yeast hem taem bilong bigfala hapi
[Piksa long page 23]
Olketa festival wea kamap evri year, olsem Festival Bilong Olketa Smol Leaf Haos, hem taem for thankiu long Jehovah