Olketa Sakrifaes Bifor wea God Hapi Long Hem
“Evri hae priest kasem appointment for offerim olketa present and sakrifaes tu.”—HEBREWS 8:3.
1. Why nao pipol feelim need for tan long God?
“FOR givim sakrifaes hem ‘wei’ bilong man long sem wei olsem for prea; wanfala showimaot feeling bilong hem abaotem hemseleva, and narawan feeling bilong hem abaotem God,” hem nao samting wea man wea studyim history bilong Bible, Alfred Edersheim hem raetem. From taem wea sin kam insaed world, hem mekem man feelim pain bilong wei for guilty, feel olsem hem stap farawe from God, and no garem hope. From olketa samting hia man needim help. Hem isi for minim hao taem pipol barava nogud olsem, olketa feelim need for tan long God for help.—Romans 5:12.
2. Wanem record bilong olketa first offering long God nao stap insaed long Bible?
2 Firstfala record insaed Bible abaotem olketa offering wea man givim long God hem bilong Cain and Abel. Hem read olsem: “Bihaen samfala taem go pas, Cain hem tekem kam samfala frut bilong graon olsem wanfala offering long Jehovah. Bat Abel, hem tu tekem kam samfala first animal bilong hem, and gris bilong olketa tu.” (Genesis 4:3, 4) Then, iumi read abaotem Noah, wea bihaen God keepim hem sef long datfala big Flood wea finisim evribit nogud genereson long taem bilong hem, diswan muvim hem “for offerim olketa bone offering antap long datfala altar” long Jehovah. (Genesis 8:20) Long planti taem, Abraham, faithful servant and fren bilong God, from olketa promis and blessing bilong God muvim hem, hem ‘buildim wanfala altar and singaot long nem bilong Jehovah.’ (Genesis 12:8; 13:3, 4, 18) Bihaen, Abraham kasem barava bigfala test long faith bilong hem taem Jehovah talem hem for offerim son bilong hem Isaac olsem wanfala bone offering. (Genesis 22:1-14) Olketa story hia, nomata short nomoa, showim iumi planti samting abaotem sakrifaes, wea iumi bae lukim.
3. Wanem part nao olketa sakrifaes garem insaed long worship?
3 From olketa story hia and olketa nara Bible story, hem klia hao wei for offerim sakrifaes hem wanfala important part bilong worship longtaem bifor Jehovah givim barava klia law for diswan. Long saed bilong datwan, wanfala buk givim mining bilong word “sakrifaes” olsem “kastom bilong religion wea olketa offerim samting long wanfala god for startim, keepim, or mekem gud moa wei wea man stap witim samting wea hem ting hem holy.” Bat diswan mekem samfala important kwestin kamap wea fitim iumi for tingting raonem, olsem: Why nao worship mas garem sakrifaes? Wanem kaen sakrifaes nao God acceptim? And wanem mining nao olketa sakrifaes bifor garem for iumi distaem?
Why Nao Need Stap for Sakrifaes?
4. Wanem nao happen long Adam and Eve taem tufala sin?
4 Taem Adam sin, hem min for duim. Wei wea hem tekem and kaikaim frut from tree bilong gud samting and nogud samting hem wei for no obey wea hem min for duim. Panis bilong wei for no obey hem dae, from God sei long klia wei: “Long day wea iu kaikai from hem iu mas dae.” (Genesis 2:17) Gogo Adam and Eve harvestim pei bilong sin—tufala dae.—Genesis 3:19; 5:3-5.
5. Why nao Jehovah hem first wan for duim samting for olketa pikinini bilong Adam, and wanem nao Hem duim for olketa?
5 Bat, waswe long olketa pikinini bilong Adam? From olketa born witim sin and wei for no perfect from Adam, olketa kasem sem wei for stap farawe from God, no garem hope, and dae wea first man and woman kasem. (Romans 5:14) Jehovah hem no wanfala God bilong justice and paoa nomoa bat tu—and diswan nao main wan—bilong love. (1 John 4:8, 16) So, hem first wan for duim samting for stretem wei wea man brekawe from hem. Bihaen Bible sei “pei bilong sin hem dae,” hem sei moa, “bat present wea God givim hem laef olowe thru long Christ Jesus Lord bilong iumi.”—Romans 6:23.
6. Wanem nao will bilong Jehovah long nogud samting wea kamaot from sin bilong Adam?
6 Samting wea Jehovah God duim for mekem datfala present hem barava help hem for provaedem samting wea bae kavarem samting wea lus from rong bilong Adam. Long Hebrew languis, datfala word ka·pharʹ hem firstaem minim “kava” or maet “rabemaot,” and olketa transleitim tu olsem “wei for kavarem.”a Or iumi savve sei, Jehovah provaedem samting wea fitim for kavarem sin wea iumi kasem from Adam and rabemaot nogud samting wea kamaot from datwan mekem olketa wea fit for kasem datfala present savve kamap free from panis bilong sin and dae.—Romans 8:21.
7. (a) Wanem hope nao God givim taem hem talemaot panis bilong Satan? (b) Wanem nao price for mekem man kamap free from sin and dae?
7 Hope for kamap free from wei for slave long sin and dae hem kamap stretawe bihaen first man and woman tufala sin. Taem hem talem judgment bilong hem long Satan, wea snek nao stand for hem, Jehovah sei: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Genesis 3:15) From datfala profesi toktok wanfala laet bilong hope sutaot for evriwan wea putim faith long datfala promis. Bat, wanfala price stap for kasem datfala freedom. Datfala promis Seed bae no kam for distroem Satan nomoa; datfala Seed mas garekil long leg, wea minim, hem mas dae, bat no for olowe.
8. (a) Hao nao Cain no bringim hapi? (b) Why nao God acceptim sakrifaes bilong Abel?
8 Iumi sure Adam and Eve tingting strong long hu nao datfala promis Seed. Taem Eve bornem first son bilong hem, Cain, hem sei: “Mi bornem wanfala man witim help bilong Jehovah.” (Genesis 4:1) Waswe, hem ting maet son bilong hem nao datfala Seed? Nomata hem maet ting olsem or nomoa, Cain, and offering bilong hem no bringim hapi. Long narasaed, brata bilong hem Abel showimaot faith long promis bilong God wea muvim hem for offerim samfala firstborn long olketa animal bilong hem olsem sakrifaes long Jehovah. Iumi readim: “Thru long faith Abel offerim long God wanfala sakrifaes wea moabeta winim Cain, wea thru long disfala faith hem kasem witness hao hem raeteous.”—Hebrews 11:4.
9. (a) Abel garem faith long wanem, and hao nao hem showimaot diswan? (b) Wanem nao offering bilong Abel hem duim?
9 Faith bilong Abel hem no faith long God nomoa, wea maet Cain tu garem. Abel garem faith long promis bilong God abaotem wanfala Seed wea bae bringim salvation long olketa man wea faithful. Hem no savve hao nao diswan bae kamap, bat promis bilong God mekem Abel savve samwan bae garekil long leg. Tru nao, hem luksavve hao blood mas kapsaet—hia nao barava idea bilong sakrifaes. Abel offerim wanfala present bilong laef and blood go long Source bilong laef, olsem smol wei for showimaot hem barava wantem and luk forward long taem wea promis bilong Jehovah bae fulfill. Disfala samting wea showimaot faith nao mekem Jehovah hapi witim sakrifaes bilong Abel, and lelebet showimaot trufala mining bilong sakrifaes—wanfala wei wea olketa man wea sin savve kasem wei for God appruvim olketa.—Genesis 4:4; Hebrews 11:1, 6.
10. Hao nao mining bilong sakrifaes hem showaot klia taem Jehovah askem Abraham for offerim Isaac?
10 Barava deep mining bilong sakrifaes hem showaot klia tumas taem Jehovah komandim Abraham for offerim son bilong hem Isaac olsem wanfala bone offering. Nomata hem no go ahed for duim datfala sakrifaes, datwan piksarem samting wea Jehovah seleva bae duim—offerim only-born Son bilong hem olsem nambawan sakrifaes for fulfillim will bilong Hem for olketa man. (John 3:16) Witim olketa sakrifaes and offering long Law bilong Moses, Jehovah markem olketa example bilong profesi for teachim pipol wea hem chusim long wanem olketa mas duim for kasem forgiveness for sin bilong olketa and for strongim hope bilong olketa for salvation. Wanem nao iumi savve lanem from diswan?
Olketa Sakrifaes wea God Acceptim
11. Wanem tufala kaen offering nao hae priest bilong Israel hem offerim, and hem offerim for wanem?
11 Aposol Paul hem sei: “Evri hae priest kasem appointment for offerim olketa present and sakrifaes tu.” (Hebrews 8:3) Lukim hao Paul hem divaedem olketa offering wea hae priest bilong Israel bifor offerim long tufala sekson, hem nao, olketa “present” and “sakrifaes,” or “sakrifaes for olketa sin.” (Hebrews 5:1) Pipol savve givim present for showimaot love and wei for tinghae, and tu for mekem grow wei for fren, hapi, or for narawan acceptim olketa. (Genesis 32:20; Proverbs 18:16) Olsem tu, planti offering wea Law storyim olketa olsem “olketa present” long God for hem acceptim and hapi long pipol wea givim.b Olketa wea brekem Law needim wei for kamap gud moa, and for stretem datwan, olketa offerim “sakrifaes for olketa sin.” Faevfala first buk bilong Bible, especially Exodus, Leviticus, and Numbers, givim planti information abaotem olketa difren kaen sakrifaes and offering. Nomata maet hem wanfala big challenge for iumi rememberim evriting, hem gud for lukluk long samfala main point bilong olketa difren kaen sakrifaes.
12. Wea long Bible nao iumi savve faendem olketa main point bilong olketa sakrifaes, or offering, insaed long Law?
12 Iumi lukim long Leviticus chapter 1 go kasem 7, faevfala difren offering—bone offering, grain offering, communion sakrifaes, sin offering, and guilt offering—wea olketa chapter hia talem evriwan, nomata olketa offerim samfala hia tugeta. Iumi lukim tu hao olketa chapter hia storyim olketa offering tufala taem, witim difren goal; first wan, long Leviticus 1:2 go kasem 6:7, wea storyim wanem nao for offerim long altar, and mek-tu taem, long Leviticus 6:8 go kasem 7:36, wea showimaot haomas nao olketa markem for olketa priest and for man wea givim offering. Then, long Numbers chapter 28 and 29, iumi faendem wanfala timetable, wea showim wanem for offerim evri day, evri week, evri month, and evri year long olketa festival.
13. Story abaotem olketa offering wea pipol laek for offerim olsem present for God.
13 Samfala long olketa offering wea pipol laek for offerim olsem present or wei for go long God for hem appruvim man hem olketa bone offering, grain offering, and communion offering. Samfala savveman sei Hebrew word for “bone offering” hem minim “wanfala offering bilong go ap” or “wanfala offering wea go ap.” Diswan hem fitim bikos long wanfala bone offering, animal wea olketa busarem olketa bonem long altar and wanfala naes smel go ap long heven long God. Samting wea spesol long bone offering hem wei wea bihaen olketa splasem blood bilong hem raonem altar, olketa offerim full animal long God. Olketa priest mekem “evri part long hem smoke long altar olsem wanfala bone offering, wanfala offering wea kam from fire wea smel naes long Jehovah.”—Leviticus 1:3, 4, 9; Genesis 8:21.
14. Hao nao olketa offerim grain offering?
14 Leviticus chapter 2 hem story abaotem grain offering. Hem wanfala offering bilong contribution wea olketa iusim gudfala flour, wea olketa putim oil insaed, witim frankincense wea smel naes. “Priest mas tekem long hand flour witim oil and frankincense wea part bilong hem; and hem mas mekem smoke antap long altar olsem samting for rememberim, olsem wanfala offering wea kam from fire wea smel naes long Jehovah.” (Leviticus 2:2) Frankincense hem wanfala long olketa samting insaed long holy incense wea bone antap long altar bilong incense insaed long tabernacle and temple. (Exodus 30:34-36) King David tingim diswan taem hem sei: “Letem prea bilong mi kamap olsem incense front long iu, wei wea mi apim hand bilong mi olsem grain offering bilong evening.”—Psalm 141:2.
15. Wanem nao purpose bilong communion sakrifaes?
15 Narafala offering hem communion sakrifaes wea Leviticus chapter 3 hem story abaot. Olketa savve transleitim tu olsem “sakrifaes bilong olketa peace offering.” Long Hebrew languis, datfala word “peace” minim moa samting winim wei for free from war or trabol. “Insaed long Bible, hem minim datwan, and tu wei for fren long peace witim God, gudfala living, and hapi,” disfala buk Studies in the Mosaic Institutions hem talem olsem. So, olketa offerim communion sakrifaes, no for kasem peace witim God thru long wei for mekem hem no kros, bat for showimaot thankiu or for celebratem peace wea olketa wea hem appruvim garem witim God. Olketa priest and man wea givim offering kaikaim datfala sakrifaes bihaen olketa offerim blood and gris long Jehovah. (Leviticus 3:17; 7:16-21; 19:5-8) Long naesfala and tokpiksa wei, man wea givim offering, olketa priest, and Jehovah God kaikai tugeta, wea showimaot wei for garem peace midolwan long olketa.
16. (a) Wanem nao purpose bilong sin offering and guilt offering? (b) Hao nao olketa hia difren from bone offering?
16 Tufala long olketa sakrifaes wea olketa offerim for kasem forgiveness long sin or for kavarem rong wea man duim againstim Law hem sin offering and guilt offering. Nomata olketa mas bonem olketa sakrifaes hia antap long altar, olketa difren from bone offering from olketa no offerim full animal long God, olketa offerim gris nomoa and samfala part bilong animal. Olketa nara part bilong animal olketa torowem aotsaed long camp or for samfala priest nao kaikaim. Wei wea diswan difren hem garem mining. Datfala bone offering olketa givim long God olsem wanfala present for letem olketa kam long hem, so olketa offerim evribit long God. Interesting samting, olketa planti taem givim wanfala sin offering or wanfala guilt offering bifor olketa givim bone offering, wea minim for mekem God acceptim present bilong man wea sin, hem needim forgiveness firstaem.—Leviticus 8:14, 18; 9:2, 3; 16:3, 5.
17, 18. Sin offering hem for wanem, and wanem nao purpose bilong guilt offering?
17 Sin offering hem only fit sapos man wea sin againstim Law no min for duim, wea sin hia kamap bikos long wik point bilong man. “Sapos wanfala soul hem mistek and sin long eni samting wea Jehovah komandim for no duim,” then man wea duim sin mas offerim wanfala sin offering fitim responsibility, or position, bilong hem insaed long community. (Leviticus 4:2, 3, 22, 27) Long narasaed, man wea duim sin wea no repent olketa mas killim hem dae; no eni sakrifaes fitim hem.—Exodus 21:12-15; Leviticus 17:10; 20:2, 6, 10; Numbers 15:30; Hebrews 2:2.
18 Mining and purpose bilong guilt offering hem showaot klia long Leviticus chapter 5 and 6. Man maet no min for duim sin. Nomata olsem, rong wea hem duim maet mekem hem guilty for spoelem samting saed long nara pipol or Jehovah God, and hem mas stretem datfala rong long tufala evriwan. Insaed diswan hem samfala difren sin. Samfala sin saed long man seleva (5:2-6), samfala sin againstim “olketa holy samting bilong Jehovah” (5:14-16), and samfala, nomata man minim lelebet hao hem rong, olketa nao sin wea kamaot from rong feeling for laekem samting or wik point bilong body (6:1-3). For join witim wei for konfesim olketa sin olsem, man wea duim rong mas duim samting for givim compensation and then givim wanfala guilt offering long Jehovah.—Leviticus 6:4-7.
Samting wea Moabeta Bae Kam
19. Nomata olketa garem Law and olketa sakrifaes bilong hem, why nao Israel fail for mekem God hapi long olketa?
19 Law Bilong Moses, witim planti sakrifaes and offering bilong hem, hem for mekem olketa Israelite fit for kam long God and kasem and keepim blessing bilong hem go kasem taem wea promis Seed hem kam. Aposol Paul, wanfala really Jew, raet olsem: “Law hem kamap teacher bilong iumi wea lead go long Christ, mekem iumi kamap raeteous thru long faith.” (Galatians 3:24) Sorre tumas, olsem wanfala nation, Israel no followim datfala teaching bat olketa spoelem datfala privilege. From diswan, evri sakrifaes bilong olketa kamap samting wea Jehovah heitim, wea hem sei: “Mi no wantem moa olketa bone offering bilong man sheep and gris bilong olketa fat animal; and blood bilong olketa pikinini buluka and pikinini man sheep and man goat mi no hapi long olketa.”—Isaiah 1:11.
20. Wanem nao happen long 70 C.E. long saed bilong Law and olketa sakrifaes bilong hem?
20 Long 70 C.E., system bilong olketa Jew, witim temple and sekson bilong olketa priest, kasem end bilong hem. Bihaen datwan, olketa no savve mekem olketa sakrifaes wea Law askem. Waswe, diswan minim olketa sakrifaes, olsem wanfala important part bilong Law, lusim evri mining for olketa wea worshipim God distaem? Bae iumi lukluk long diswan insaed next article.
[Olketa Footnote]
a Insight on the Scriptures, wea Watchtower Bible and Tract Society of New York, Inc., nao pablisim hem sei: “Taem Bible iusim ‘wei for kavarem,’ main mining bilong hem nao for ‘kavarem’ or ‘exchangem,’ and tu samting wea olketa givim for exchangem, or olsem wanfala ‘kava’ for samting, and diswan hem samting wea mas semsem. . . . For mekem samting wea fit for kavarem samting wea Adam lusim, olketa mas offerim laef bilong wanfala perfect man.”
b Wanfala Hebrew word wea olketa planti taem transleitim olsem “offering” hem qor·banʹ. Taem hem story abaotem wei wea Jesus tok againstim olketa nogud fasin bilong olketa scribe and Pharisee, Mark sei “corban” hem minim “wanfala present bilong God.”—Mark 7:11.
Waswe, Iu Savve Minim?
• Wanem nao muvim olketa man witim faith bifor for offerim sakrifaes long Jehovah?
• Why nao need stap for olketa sakrifaes bifor?
• Wanem nao olketa main sakrifaes wea olketa offerim anda long Law, and wanem nao purpose bilong olketa?
• Olsem Paul talem, wanem nao main goal bilong Law and olketa sakrifaes bilong hem?
[Piksa long page 14]
God hapi long sakrifaes bilong Abel bikos datwan showimaot hem garem faith long promis bilong Jehovah
[Piksa long page 15]
Waswe, iu tinghae long mining bilong disfala piksa?