Tingting Bilong Bible

Wei for Decoratem Body—Need for Garem Gudfala Tingting

“PRAOD tingting savve kasholem gudfala tingting,” hem nao wanem wanfala man bilong France for raetem story hem raetem. Tru nao, olketa man nating iusim gudfala tingting long planti samting wea olketa duim long olketa seleva insaed olketa handred year wea go pas from olketa garem praod tingting. Olsem example, from olketa want for garem barava smolfala waist, olketa woman long mek-19 century werem taet kaleko raonem bele bilong olketa wea mekem olketa hard for breath gud. Samfala sei olketa garem waist wea hem 325 millimeter nomoa. Samfala woman barava skwisim olketa seleva witim kaleko wea taet gogo rib bilong olketa hem go insaed liver, and olketa dae from diswan.

Nomata diskaen fasin hem finis, praod tingting wea startim diswan hem still showaot distaem olsem hem showaot long dat taem tu. Olketa man and woman still go ahed for duim hardfala, or danger samting, for changem lukluk wea olketa born kam witim. Example hem olketa bisnis for mekem tattoo and wei for mekhol long body, wea bifor olketa olabaot wan long community nomoa duim, distaem hem kamap evriwea long olketa ples for shopping and taon. Tru nao, insaed wanfala year no longtaem go nomoa, wei for tattoo hem mek-six bisnis wea grow fast long United States.

Planti difren kaen wei for decoratem body wea barava difren kamap big, especially midolwan young pipol. Wei for mekhol long olketa part bilong body wea ova tumas—insaed diswan hem susu, nose, tongue, nomata long private part—hem kamap big tumas. For wanfala smol grup, kaen wei for mekhol long body wea ova tumas hem olsem samting nating nomoa. Olketa traem difren wei moa olsem wei for putim mark long body, katem,a and wei for sheipim body, long wei for putim samting anda long skin bilong olketa mekem olketa garem hol and laen long body.

Wanfala Kastom Bilong Bifor

Wei for decoratem or putim mark long body hem no niu samting. Long samfala ples bilong Africa, olketa iusim kat long body wea followim kastom and tattoo for planti handred year finis mekem olketa luksavve long difren kaen famili grup or tribe. Interesting samting, planti long olketa kantri hia, pipol les nao witim kaen kastom olsem and hem gogo for finis.

Wei for tattoo, mekhol long body, and wei for katem body hem stap long taem bilong Bible. Planti taem olketa heathen nation duim diswan followim religion bilong olketa. Dastawe, Jehovah stopem pipol bilong hem, olketa Jew, for followim olketa heathen hia. (Leviticus 19:28) Olsem olketa “spesol property,” olketa Jew kasem protection from nogud kastom bilong olketa giaman religion.—Deuteronomy 14:2.

Christian Freedom

Olketa Christian no stap anda long Law bilong Moses, nomata olsem hem showimaot samfala principle wea fitim Christian kongregeson. (Colossians 2:14) Followim diswan olketa free for showimaot fasin wea no ova tumas taem olketa chusim wanem kaen samting for werem. (Galatians 5:1; 1 Timothy 2:9, 10) Nomata olsem, disfala freedom garem spialaen.—1 Peter 2:16.

Paul raet olsem long 1 Corinthians 6:12: “Evri samting hem fitim law for mi; bat no evri samting hem gud.” Paul luksavve hao freedom bilong hem olsem wanfala Christian no mekem hem free for duim wanem hem want for duim sapos hem no tingim nara pipol. Love for nara pipol nao bossim fasin bilong hem. (Galatians 5:13) Hem givim kaonsel for “no interest long olketa samting bilong iufala seleva nomoa, bat interest long olketa samting bilong narafala pipol tu.” (Philippians 2:4) Wei wea hem no tingim seleva hem wanfala nambawan example for eni Christian wea tingting for decoratem body.

Olketa Bible Principle for Ting Raonem

Wanfala long olketa waka wea olketa Christian mas duim hem for preachim and teachim gud nius. (Matthew 28:19, 20; Philippians 2:15) Wanfala Christian bae no want for letem eni samting, insaed diswan hem lukluk bilong hem, for stopem nara pipol for lisin long datfala message.—2 Corinthians 4:2.

Nomata wei for decoratem body olsem wei for mekhol or tattoo hem big tumas midolwan samfala pipol, wanfala Christian need for askem hemseleva, ‘Hao nao pipol long area wea mi stap bae feel abaotem disfala wei for decoratem body? Waswe, pipol bae ting mi semsem witim olketa olabaot wan long community? Nomata conscience bilong mi hem letem, wei wea mi mekhol or tattoo long body bae affectim kongregeson long wanem wei? Waswe, olketa bae tingim diswan olsem hem showimaot “spirit bilong world”? Maet diswan mekem daot kamap long “stretfala tingting” bilong mi?’—1 Corinthians 2:12; 10:29-32; Titus 2:12.

Samfala kaen wei for mekem change olsem long body savve mekem kamap serious medical danger. Wei for tattoo witim nila wea dirty savve spreadim hepatitis and HIV. Olketa sik bilong skin kamaot samfala taem from dye wea olketa iusim. Wei for mekhol long body savve tekem samfala month for heal and hem savve soa tumas long taem olsem. And tu diswan savve mekem blood poison, lusim blood insaed long body, mekem blood clot, spoelem nerve, and olketa big sik olsem. And tu, samfala wei wea olketa duim diswan hem no isi for changem bak. Olsem example, long wei wea hem depend long size and color, for aotem bak wanfala tattoo hem kost tumas and hem pain fogud. Hol wea man mekem long body savve stap olowe.

Nomata man disaed for acceptim olketa danger hia or nomoa hem saed bilong man seleva. Bat man wea want for mekem God hapi mas luksavve hao for kamap wanfala Christian, man mas offerim hemseleva long God. Body bilong iumi hem living sakrifaes wea iumi givim long God and iusim for hem. (Romans 12:1) Dastawe, olketa mature Christian no ting long body bilong olketa olsem property bilong olketa wea olketa savve duim eni samting long hem. Main wan nao hem olketa wea kamap fit for lead long kongregeson wea pipol savve hao olketa no ova tumas long fasin, garem gudfala tingting, and wei for balance.—1 Timothy 3:2, 3.

Wei for mekem grow and iusim paoa bilong tingting wea Bible trainim bae helpem olketa Christian for stap klia from wei bilong world wea “stap farawe from laef wea kam from God.” (Ephesians 4:18) Long disfala wei olketa savve showimaot wei for balance front long evriwan.—Philippians 4:5.

[Footnote]