Help for Finisim Bigfala Hangre Hem Kam Nao!
MAET iu ask, ‘wanem kaen bigfala hangre?’ Bigfala hangre for spiritual kaikai! Wanfala Hebrew profet bifor profesi olsem abaotem disfala bigfala hangre: “‘Lukim! Olketa day bae kam,’ hem nao samting wea Sovereign Lord Jehovah hem talem, ‘and mi bae sendem wanfala bigfala hangre long disfala land, wanfala bigfala hangre, no for bred, and wei for thirsty, no for wata, bat for herem olketa toktok bilong Jehovah.’” (Amos 8:11) For help finisim disfala bigfala hangre, 48 member bilong mek-112 class bilong Watchtower Bible Skul Bilong Gilead, long Patterson, New York, bae go long 19 difren kantri long faevfala land and island long sea.
Olketa no tekem go really meat and grain, bat olketa tekem savve and training. For faevfala month olketa duim deepfala Bible study for strongim faith bilong olketa for duim missionary service long olketa difren kantri. Long March 9, 2002, datfala 5,554 wea attendim graduation program lisin witim bigfala hapi.
Stephen Lett, wea hem serve olsem wanfala member bilong Governing Body bilong Olketa Jehovah’s Witness, startim datfala program. Hem givim spesol welkam for olketa visitor wea kam from olketa difren part long world. Then hem iusim toktok bilong Jesus, “Iufala nao laet bilong world” taem hem storyim waka bilong olketa hia wea bae kamap missionary. (Matthew 5:14) Hem explainim olsem: ‘Long olketa assignment bilong iufala, iufala bae mekem planti difren part long waka bilong Jehovah “shaen” wea bae helpem pipol wea garem honest heart for lukim hao Jehovah and olketa purpose bilong hem barava naes tumas.’ Brata Lett encouragem olketa missionary for iusim laet bilong Word bilong God for helpem pipol luksavve long darkness bilong olketa giaman teaching and for leadim olketa wea lukaotem truth.
For Win Man Mas Garem Stretfala Tingting
Bihaen introduction bilong chairman, Baltasar Perla, wanfala member bilong United States Branch Komiti, givim firstfala tok for helpem olketa graduate for kamap olketa missionary wea win. Hem storyim theme, “No Fraet, Go Ahed Strong and Duim Disfala Waka.” (1 Chronicles 28:20) King Solomon bilong Israel bifor kasem wanfala hard assignment for duim samting wea no eniwan duim bifor—for buildim wanfala temple long Jerusalem. Solomon duim datfala waka, and witim saport bilong Jehovah, hem buildim datfala temple. For showimaot hao datfala leson fitim class, Brata Perla hem sei: ‘Iufala kasem wanfala niu assignment, hem nao for kamap olketa missionary, and iufala mas no fraet and go ahed strong.’ Olketa student barava kasem comfort from promis bilong Jehovah hao hem bae no lusim olketa sapos olketa stap klosap long hem. Brata Perla hem muvim audience taem hem finis witim experience bilong hemseleva: ‘Iufala savve duim planti gud samting olsem olketa missionary. Olketa missionary nao tekem kam truth long famili bilong mi!’
Samuel Herd, narafala member bilong Governing Body storyim theme “Depend Long Jehovah for Win.” Olketa student startim laef waka bilong olketa olsem missionary, and wei wea olketa fren gud witim Jehovah bae barava affectim wei wea olketa savve win. Brata Herd encouragem olketa: ‘Iufala barava savve long Bible from wei wea iufala study long Gilead. Iufala barava hapi for kasem diswan. Bat distaem, for barava win, iufala mas start for givimaot samting wea iufala lanem long nara pipol.’ (Acts 20:35) Olketa missionary bae garem planti chance for duim olsem taem olketa ‘pourimaot olketa seleva’ for helpem nara pipol.—Philippians 2:17.
Wanem nao lastfala kaonsel wea olketa instructor talem for olketa student? Mark Noumair storyim theme wea kam from Ruth 3:18, “Sidaon Kwaet Go Kasem Taem Iu Lukim Wanem Bae Happen.” Hem iusim example bilong Naomi and Ruth for encouragem olketa graduate for trustim evribit olketa arrangement wea organization bilong God long earth mekem and for respectim theocratic paoa. Brata Noumair muvim heart bilong olketa student taem hem sei: ‘Maet samfala taem iu no minim wanfala disison wea affectim iu or maet iu feel strong hao hem moabeta for duim wanfala samting long difren wei. Wanem nao bae iu duim? Waswe, bae iu standap and duim samting seleva, or bae iu “sidaon kwaet,” trustim direction bilong God and feel sure hao gogo, hem bae mekem gud samting kamap?’ (Romans 8:28) Advaes for ‘waka hard for olketa samting bilong Kingdom, for lukluk long samting wea organization bilong Jehovah hem duim and no long fasin bilong pipol,’ bae barava helpem olketa missionary hia long assignment bilong olketa.
Wallace Liverance, wea wanfala missionary bifor and wea serve distaem olsem wanfala Gilead instructor, givim lastfala tok long disfala session. Theme bilong tok bilong hem “Tingim Goal Evritaem, Go Ahed Long Service bilong God.” Hem showim hao profet Daniel luksavve from wei wea Babylon hem finis and from samting Jeremiah talem, hao taem for olketa Israelite for go free hem klosap. (Jeremiah 25:11; Daniel 9:2) Daniel hem luksavve long schedule bilong Jehovah, and datwan helpem hem for tingim evritaem wei wea purpose bilong God hem go ahed for fulfill. Long wei wea difren, olketa Israelite long taem bilong profet Haggai sei: “Datfala taem hem no kam yet.” (Haggai 1:2) Olketa no ting strong long datfala taem wea olketa stap insaed long hem, bat olketa tingim nomoa samting for olketa seleva and lusim waka wea olketa kamap free from Babylon for duim, hem nao for buildim moa datfala temple. Brata Liverance hem sei long end: “So tingim goal evritaem long wei for go ahed tingim purpose bilong Jehovah.”
Next, Gilead instructor Lawrence Bowen hem conductim wanfala part wea garem theme “Jehovah Blessim Olketa wea Iusim Word Bilong Hem wea Laef.” (Hebrews 4:12) Insaed disfala part hem olketa experience wea class enjoyim long field service, and hem mekhae long wei wea Jehovah blessim olketa wea iusim Bible taem olketa preach and teach. Brata Bowen storyim wei wea Jesus Christ hem nambawan example for evri minister bilong God: ‘Jesus savve talem stret hao samting hem teachim hem no bilong hemseleva, bat hem talem Toktok bilong God.’ Pipol wea garem honest heart luksavve long truth and hapi for acceptim. (John 7:16, 17) Hem tru distaem tu.
Gilead Training Redyim Man for Evri Gudfala Waka
Richard Abrahamson and Patrick LaFranca, wea serve olsem olketa member bilong Bethel famili for longfala taem interviewim sixfala wea graduate from Gilead bifor wea distaem duim samfala difren spesol full-taem service. Olketa graduate bilong mek-112 class kasem encouragement for savve hao planti year bihaen, sixfala hia, nomata wanem assignment olketa garem distaem, go ahed for iusim training wea olketa kasem long Gilead saed long wei for studyim Bible, duim research project, and long hao for stap gud witim pipol.
Theodore Jaracz, wanfala member bilong Governing Body, givim main tok long program. Title bilong tok hem “Samting wea Kamaot From Wei for Stand Strong Againstim Satan.” Insaed faevfala month wea just go pas, olketa student stap long loving and theocratic ples. Bat, olsem olketa lanem long class rum, iumi stap long world wea againstim iumi. Evriwea long world pipol bilong Jehovah kasem attak. (Matthew 24:9) Brata Jaracz iusim samfala story insaed Bible for showim hao ‘iumi nao spesol target bilong Devil. Iumi mas strongim wei wea iumi fren witim Jehovah and kasem strong for deal witim olketa test.’ (Job 1:8; Daniel 6:4; John 15:20; Revelation 12:12, 17) Long end, Brata Jaracz talem hao nomata disfala wei for heitim pipol bilong God bae go ahed, Isaiah 54:17 hem sei, ‘eni samting for faet againstim iumi bae no win. Jehovah bae sevem iumi long taem and wei wea hem nao markem.’
From olketa graduate bilong mek-112 class bilong Gilead “barava redy,” olketa bae duim bigfala part for help finisim bigfala hangre for spiritual kaikai long olketa kantri wea olketa bae serve. (2 Timothy 3:16, 17) Iumi barava luk forward for herem olketa report abaotem wei wea olketa givimaot disfala gudfala message long pipol long olketa kantri hia.
[Box long page 23]
INFORMATION ABAOTEM CLASS
Haomas kantri olketa kam from: 6
Haomas kantri olketa bae go long hem: 19
Haomas student: 48
Average age: 33.2
Average year insaed truth: 15.7
Average year insaed full-taem ministry: 12.2
[Piksa long page 24]
Mek-112 Class Bilong Watchtower Bible Skul Bilong Gilead wea Graduate
List long daon start long front and go bihaen, and olketa nem start long left go long raet bilong each laen.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.